19
1 Hwah dah koh soeu thoq lyis dan cho chank suh dah shohjyen soeu ka zes gis.
2 Dius dvyuk xiklyis seq cho ma bos dah nhaiq wvng zis gas ma gis. Khyei nyap soeu ka seq shuot loh.
3 Dius dvyuk gas nyah dah koh cho yah nyang lyis dyoqbis loh nhang; Nghuot laus eq nyah ehnyet mas nyang Yhensain lhyi yobos huon.
4 Nyeisgis yaplhoq lyis dyenschangh nyo, nghuot laus eq shohjyen lhyi nyah dyenschangh nyang lyis toh khoq.
5 Ma ying kanghjyoeng ka yobos ma xauh ma mus, hwah soeu eq yobos ma luiq.
6 Dius nyoshoq gas zau jens lyis seq khyoeuq. Jyungshuk dyei soeu lhyi yuk khanghmuh dyenschangh kuot.
7 Nyungs soeu dah buisnoms dvnganh gas nyang lyis hoeng lhyi, nyah dyenschangh jens nyang lyis zes hoeng lha we we jhank loh. Nyang tungh chank lui lyis eq ma nyvng lo.
8 Joeui yoh soeu ka nyah dyos lyis jyet. Seqgyo cho lhyi tsomh soeu ka gis zis xauh das.
9 Ma ying kanghjyoeng ka yobos ma xauh ma mus, hwah dang taiq soeu ka dyoqbis das.
10 Koh soeu ka dis soeu teh pyo pyo nyeis das zis ma doeus, jyeidwis gas zau lyis guon das zis zes ma doeus.
11 Zaih soeu ka nyang nhaiqyo zis lvnyap ma chixoeuq. Shuot cho lhyi ma yoeuh gvng mas nyang phunk xauh yoeus.
12 Hwankti dah nhaiqyo zis gas khangkhyi nyings teh nghuot. Nyang nyoqnho dyei zis gas mhanh thoq mas jyweh gyoh teh nghuot.
13 Lokoh jens gas nyhiphoq lyis dyoqbis cho she los dyei. Nyingh nyo dah yhensain nyhiq gas mauyaus mauzoq teh lhoq yau.
14 Yhen yahge dis cho ka nyhiphoq jyank masyah dah vso nghuot. Wotwons dah yhensain nyhiq gas Yhensain jyank masyah yoh dah jyungshuk dvnghuot.
15 Dius dvyuk gas lan las vjangh yhet joq lyis, nyang vjangh yuot das.
16 Mangso dah tyingtoh dang lyis chank kuot soeu ka nyah kang lhyi gomh nyeis. Nghuot laus eq Mangso dang lyis jwangh soeu ka shei das.
17 Nyungs soeu lhyi nhaiqnyen soeu ka Yhensain lhyi jyeih dyei zis nghuot las Yhensain ka nyang kuot cho gis lyis phauh shangh das.
18 Nghamhloms chank bos shih lyis nah lo jens lyis jyauh mhoq aq. Nyang dyoqbis loh shoq nhaiq vnyen nyeis.
19 Phyiqkhyi chung soeu yobos dyei zis xauh chah. Nyang lyis dvlhain khyuot yoeus lyis, doms khyuot yoeus chah das.
20 Joeui da dyei zis gyo las taiq shet dang lyis lhom yoeus aq, nvng thang pheh joeui bos soeu duot das.
21 Dius jens gas nghamh toeuq cho vja ja kuot mvbeh, nghuot laus eq Yhensain toeuq toh cho bweh los das.
22 Nyoqnoq zis gas xoqphuh cho nghuot. Shohjyen zis gas hwah soeu bweh das thoq lyis zes gis.
23 Yhensain lhyi gyukwoms zis gas kang xing; nhaiqtap las nyang gas yau cho mhayah luiq das.
24 Lan soeu ka nyah loq khuq mas lap toh laus eq nyah nhuot mas yangh ma mes yoeus kat.
25 Jwangh soeu lhyi lyuk lyis cha ma seq soeu soh los das. Seqgyo soeu lhyi taiq kyingh lyis, nyang seq cho vlhomuh bos das.
26 Nyah uwus lyis thyoq zo las nyah ungwes lyis khat tyamp dah lo gas vxoq vcaiq, xoqphuh zis xauh.
27 Ngah lo eh, jyauh cho lhyi ma gyo lyis, nvng xuq toh goeus zis tohnyhik das.
28 Hwah dah kanghjyoeng ka lyi jus cho lhyi jwangh. Lhung soeu ka lyi ma chi cho lhyi jyet.
29 Jwangh bang xiklyis joeng cho, koh bang gvnungh xiklyis lyuk cho sont toh.