12
1 Jyauh cho lhyi jyet soeu hank eq seq cho lhyi jyet. Taiq kyingh yvlyis hoeng soeu ka koh soeu dvnghuot.
2 Gis soeu ka Yhensain jyank masyah nyoqnho yoh. Lhung dah khaujeini soeu ka dang thang thyet zis dvxauh das.
3 Dius gas lhung cho yah ma yoh goeng joq. Nghuot laus eq dan bang gas saiq nyet chent teh ma lop ma loeh.
4 Wotwons dah yhensain nyhiq gas nyah yhensain phoq dah buismuk teh nghuot. Xoq lhoeu phuh dah yhensain nyhiq gas, yhensain phoq dah shohyau mas bopyuq teh nghuot.
5 Dan bang dah nghamhtoh cho ka lyi jus. Lhung bang dah khaujeini zis gas mhuih cho dvnghuot.
6 Lhung bang dah dang gas suih huot das zis lhom nyeis. Nghuot laus eq dan bang dah dang gas dius kang lhyi khyuot yoeus das.
7 Lhung bang gas dyoqbis las ma nyeis lo, nghuot laus eq dan bang dah yhenbang gas goeng joq das.
8 Dius gas nyamoq joeui khyvlyis chungh zis xauh das. Ehnyet guih soeu ka dius ngis khyoq zis dvxauh das.
9 Diuslaiq khyvlyis nyah womdau nyang khoeu chah zis gas, dius zains nyings wons las zonoms ma yoh mus thoq lyis zes gis.
10 Dan soeu ka nyah gaunyhauq lyis jyauhhuh. Lhung soeu ka nyah nhaiqnyen cho yangh lhoeng zis dvnghuot.
11 Vsainnyang yos zwizo soeu ka jo shoq xauh zo. Nghuot laus eq ma gis bweh dah nghamhloms cho lhyi chank khat soeu ka seqgyo cho ma bos.
12 Lhung soeu ka ma gis bang dah lvnyhvp lyis o. Nghuot laus eq dan bang gas nyamoq yoh zis gohyuk lyis dyei mes.
13 Lhung soeu ka nyah nhuotkuk mas dang lyis lhyweq gvng mas lhyik mas nyih. Dan soeu ka yau cho mhayah luiq los das.
14 Dius gas nyamoq taiq khyvlyis, kuot khyvlyis phauh shangh zis xauh das. Nyamoq yoh vvng zis yah dvyhangteh xauh kham das.
15 Koh soeu ka vjangh nyang kuot cho jus ge nghamh. Nghuot laus eq joeui bos soeu ka joeui dyei zis gyo yoeus.
16 Koh soeu ka nyang nhaiqyo cho lvnyap chixoeuq. Zaih soeu ka nhaiqyo cho ma chixoeuq.
17 Jyoeng zis taiq soeu ka dan cho lhyi chixoeuq, ma ying kanghjyoeng ka mhuih cho lhyi dvchixoeuq.
18 Moengsa yah thauh teh taiq soeu bos laus eq, joeui bos dah lhyo ka yanghzan los nhang.
19 Jyoeng dah nhuotkuk gas vcaiq vto goeng joq das. Hwah dah lhyo ka dvsoq kyingh dvnghuot.
20 Ma gis khaujeini bang ehnyet mas mhuih cho bos. Nghuot laus eq nyenstap cho joeui da bang dah ehnyet mas gauslaus cho bos.
21 Dan soeu ka yaukyenh shanghsenh ma xauh. Lhung soeu mha ka shanghsenh cho kyingh dvdyingh joq das.
22 Yhensain ka hwah soeu lhyi choqh. Nghuot laus eq nyang taiq dang lyis chank kuot soeu lhyi nyang nhaiqdoeus.
23 Zaih soeu ka seq cho lhyi samlo toh. Nghuot laus eq koh soeu ka koh cho taiq hoeuh.
24 Yomkat dah muhzwi bang gas guon bang duot das. Lan bang gas jons dvduot das.
25 Chiqh ehnyet gas dius lyis nhaiqkuk nhang. Nghuot laus eq yomdyei dang gas gausyis nhang.
26 Dan soeu ka nyah yhenkyoh lyis choshet. Lhung bang gas nyamoq yhenkyoh lyis cho shwih whang loh.
27 Lan soeu ka nyang xo zis khanhamp eq ma yoh das. Nghuot laus eq yomkat soeu ka phauh bos dah zisyos yoh das.
28 Dan dah cho ka kang dwis cho pheh shwih loh. Lhung cho ka shei cho pheh dvloh.