3
Aron Lo jens
1 Heika Sina boms mas Yhensain Moshe lhyi jis uhlyis Aron yahge Moshe dah yhenbang nghuot.
2 Aron mas loloeu jens nyei yuk bos. Loxeih Nadab, Abihu, Eleaza, Ithama tsain nghuot.Ref 3.2: Gyu 26.60
3 Nyamoq gas phudyei bang khyvlyis coeu juot las muh huon toh bang nghuot.
4 Nadab yahge Abihu ka Sina mhanhdyvp mas Yhensain lhyi ma gyingshang dah nyi yah phudyei uhlyis sat zis xauh goeus. Nyamoq mas lo ma bos, housoeh las Eleaza yahge Ithama gas Aron zaih gyo lyis phudyei bang khyvlyis phuqsoe.Ref 3.4: Lew 10.1-2; Gyu 26.61
Lewi jens Phuqsoe das
5 Yhensain Moshe lhyi taiq,
6 Lewi vkoq lyis shwih thuq los las, phudyei Aron dah jyeidwis khyvlyis toeuq toh aq.
7 Nyamoq gas ngah xikkhonh zvng mas chah dah muh kuot das, Aron xiklyis eq moqphung dvkoeuq gonh xiklyis eq muh wons wuq das.
8 Nyamoq gas Zvng dah kyahsoe dvnganh yoeuh las, nyet shih Israel jens xiklyis phuqsoe muh wons wuq das.
9 Lewi jens dah yvwons gas Aron yahge nyah loloeu jens lyis kyingh phuqsoe das.
10 Nvng Aron yahge nyah lo jens lyis phudyei muh kuot das nyhenshang muh huon toh das. Gohyuk hank nghuot laus eq hauh zis kuot loh soeu ka sat zis xauh das, ge.
11 Yhensain Moshe lhyi taiq,
12-13 Gvshih Lewi jens gas ngah zis nghuot. Ngos Egutu bang dah loxeih sat uhlyis ngah xiklyis Israel yhenbang khanghmuh mas loxeih yahge gaunyhauq khanghmuh suot xeih lyis cheihshang toh. Gvshih Israel yukgis loxeih gungsthaiq Lewi lyis yoh toh. Nyamoq gas ngos yah sen das. Ngos Yhensain nghuot.
Lewi nyings kuiRef 3.13: Dyu 13.2
14 Sina mhanhdyvp mas Yhensain Moshe lhyi tying toh.
15 Lewi jens lyis nyah vhuh, nyah yhenbang khyvlyis suon geh. Lhamhmuh dvkhyvp masyah thoq pheh dah yukgis lo yuk khanghmuh lyis suon geh, ge.
16 Moshe eq housoeh kuot goeus.
17-20 Lewi mas Gershon, Kohat, Merari ge loloeu jens somh yuk bos: nyamoq gas hauh vhuh dah phauh thyeih nyings wons bang nghuot. Gershon mha Libni yahge Shimei ge loloeu aiq yuk bos. Kohat mas Amram, Izhar, Hebron yahge Uziel ge loloeu nyei yuk bos. Merari mas Mali yahge Mushi ge loloeu aiq yuk bos. Nyamoq gas nyamoq yhenbang dah nyings wons dah phauh thyeih moq nghuot.
21 Libni yhenbang yahge Shimei yhenbang gas Gershon vhuh nghuot.
22 Nyamoq vhuh mas suon bos, lhamhmuh dvkhyvp masyah thoq pheh dah yukgis lo jens dvnganh lyis nyhet khyoengh oengxo nghuot.
23 Gershon vhuh gas buiswvng shot zvng nungs mas thoeng das.
24 Gershon vhuh mas uhjyung ka Lael lo Eliasap nghuot.
25 Gershon vhuh yvwons yoeus das zis gas Zvng, hau vtheh mas vnghop, nghe mha vnghop, khyam khomh gosseh,
26 Zvng yahge phon yvmlhaink mas dah khyam misseh, khyam khomh mas gosseh tsain nghuot. Nyamoq gas haih vyhang dvnganh yah sen dah muh wons wuq chah.
27 Amram, Izha, Hebron, Uziel yhenbang gas Kohat vhuh tsain nghuot.
28 Nyamoq vhuh mas suon bos, lhamhmuh dvkhyvp masyah thoq pheh dah yukgis lo jens dvnganh lyis xet khyoengh khyukxo nghuot. Nyamoq yvwons gas gyingshang joqyos lyis loqzamh zwi chah.
29 Haih vhuh gas Zvng dah mautyi pheh thoeng das.
30 Kohat vhuh dah uhjyung ka Uziel lo Elizaphan nghuot.
31 Nyamoq muh yvwons yoeus das zis gas, Thanghchvp Kwi, kihgus, nyituonh gus, phon jens, gyingshang joqyos mas phudyei bang yhung dah kyahsoe, Gyingshang thank joqyos mas wvng dah khomh gosseh tsain nghuot. Nyamoq gas haih vyhang dvnganh yah sen dah muh wons wuq das.
32 Lewi jens dah uhjyung ka Phudyei Aron lo Eliaza nghuot. Nyang gas Gyingshang Joqyos mas yvwons yoeus muh wons bang lyis yoeuh nyeis.
33 Mali yahge Mushi yhenbang gas Merari vhuh nghuot.
34 Nyamoq vhuh mas suon bos, lhamhmuh dvkhyvp masyah thoq pheh dah yukgislo jens dvnganh lyis khyuk khyoengh aiqxo nghuot.
35 Haih vhuh gas Zvng dah mautsung pheh thoeng das. Nyamoq dah uhjyung ka Abihila lo Zuriel nghuot.
36 Nyamoq lyis kyauh yvwons gas Zvng dah vzwvng, nyah vkyank, zains, phangh yahge houyah sen zis dvnganh nghuot. Nyamoq gas haih vyhang dvnganh yah sen dah muh wons wuq das.
37 Nyamoq gas Khyam zains, phangh, jywangh yahge twih xiklyis yvwons yoeus.
38 Moshe, Aron yahge nyah lo jens gas buisthuq shot Zvng xik mas thoeng. Nyamoq gas Israel jens xiklyis hau Gyingshang Joqyos mas kuot chah dah phuqsoe muh lyis kuot das zis yvwons bos. Gohyuk hank laus eq houmha loh soeu ka sat zis xauh das.
39 Yhensain tying toh las, Moshe suon lhyi, Lewi yukgis jens nyah vhuh mas suon bos, lhamhmuh dvkhyvp masyah thoq pheh bang dvnganh lyis 22,000 nghuot.
Lewi jens Loxeih Joqyos Yoeus
40-41 Yhensain Moshe lhyi taiq, Israel jens dah yukgis loxeih dvnganh ngos yah sen. Housoeh las Israel yukgis loxeih lhamhmuh dvkhyvp masyah thoq pheh bang yuk khanghmuh dah nyings lhaih toh aq. Nghuot laus eq hauh bang joqyos mas ngos Lewi dvnganh lyis ngah zis khyvlyis toh. Ngos Yhensain nghuot. Israel gaunyhauq suot xeih joqyos mas eq Lewi jens dah gaunyhauq toh.
42 Moshe eq domsyos gyo las Israel yukgis loxeih dvnganh lyis suon.
43 Housoeh lhamhmuh dvkhyvp masyah thoq pheh bang dvnganh lyis 22,273 yuk nghuot.
44 Yhensain Moshe lhyi taiq,
45 Gvshih Lewi jens lyis ngah zis khyvlyis Israel yukgis loxeih dvnganh dah joqyos mas kyauh toh aq. Israel jens dah cangxeih suot gaunyhauq joqyos mas Lewi jens dah gaunyhauq lyis kyauh toh aq. Ngos Yhensain nghuot.
46 Israel jens dah loxeih jens gas Lewi jens dah loxeih thoq lyis 273 yuk nyo joq las hau nyet dah lo jens lyis doms khyuot chah.
47 Gyingshang joqyos mas thyet dah phauh khyvlyis, dvyuk mas ngwis kyvp oeng koeuq dyei chah.
48 Hau khyuot ngwis gas Aron yahge nyah loloeu jens lyis dyei chah, ge.
49 Moshe eq domsyos gyo zis yah
50 ngwis kyvp 1,365 yoeus las
51 Aron yahge nyah lo jens lyis dyei.