23
1 Nyang Balak lyis taiq, Nvng ngah xiklyis heimha phon nyhet koeuq ci aq; noeulu nyhet doeu, yvnglus nyhet doeu she los aq, ge.
2 Balak gas nyang lyis taiq vgus kuot las nyang yahge Balam gas phon dvkoeuq mas noeulu dvdoeu, yvnglus dvdoeu doeu phudyei.
3 Hauh thang lhyi Balam yah Balak lyis taiq, Nvng hai ngheq phudyei yvmas yap langh aq; ngos Yhensain yah xauhgoh mvbeh loh khoq bah; nyang ngos lyis chixoeuq zis ngos nvng lyis los taiq das, ge jing thyoh dvkoeuq mas doq loh.
4 Mangso nyang yah xauhgoh lyis, Balam taiq, Ngos phon nyhet koeuq ci las phon dvkoeuq mas noeulu dvdoeu, yvnglus dvdoeu doeu phudyei, ge.
5 Yhensain ka Balam lyis nyang khasoeh taiq das dang dyei lho lha, Balak jyank mas nyah loeus doms kyoh nhang.
6 Housoeh las nyang tauh loh lyis, Balak gas Moab uhshe bang dvnganh yah dvgeh, nyang ngheq phudyei vnvm mas yap joq shih zis nyvng.
7 Balam pe zis heisoeh thuq los:
Moab hwankti Balak ngos lyis buisthuq boms Siria masyah shwih los,
Los aq, ngah nyhenshang taiq dyei aq.
Israel dius jens lyis nhoengh dyei aq, ge.
8 Mangso ma nhoengh yvlyis ngos khasoeh yoh nhoengh das?
Yhensain ma gis zis ma taiq yvlyis ngos khasoeh taiq das?
9 Nyhang dah luk-uk thyoh masyah ngos nyamoq lyis nyvng,
jing jens masyah ngos nyamoq lyis yoh zungh yoeuh.
Nyamoq gas nyamoq nyang kyingh nyeis dah dius nyau nghuot.
Nyamoq gas gohtoeu dius nyau jens thoq lyis shvmanh yoh bang nghuot zis nyamoq seq.
10 Israel dah vnyau vshih gas tsohmop teh,
nyamoq lyis ma thoq suon lo.
Ngah buisnyeis gas Mangso dah dius dvyuk teh thank bas jungh.
Ngos gas dan soeu teh nyenstap yvmas shei bas jungh.
11 Hauh thang lhyi Balak gas Balam lyis taiq, Nvng ngos lyis cha kuot? Ngos nvng lyis ngah jeswus lyis nhoengh dyei aq oen heimha shwih los laus eq, nvng kuot zis dvnganh gas nyamoq lyis shvmanh dyei nyeis, ge.
12 Nyang toeuh zis gas, Yhensain ngos lyis taiq nhang zis kyingh ngos dvyoh taiq, ge.
Balam Aiq Vlhain Pe
13 Hauh thang lhyi Balak gas Balam lyis, Los aq, Israel jens dvyhamh lyis dvyoh nyvng joqyos gohtoeu dvdeh mas ngos yah loh goh. Hou mhayah nvng ngah nyhenshang nyamoq lyis nhoengh dyei aq ge,
14 Pisga boms thyoh, Zophim pa mha shwih loh. Nyang houmha eq phon nyhet koeuq ci lha dvphon mha noeulu dvdoeu, yvnglus dvdoeu doeu tsain phudyei.
15 Balam Balak lyis taiq, Nvng heimha nah ngheq phudyei yvm mas yap joq langh aq. Ngos thyimha Mangso yah loh xauhgoh bah, ge.
16 Yhensain ka Balam yah los xauhgoh las, nyang taiq das dang dyei lho lha Balak jyank mas nyah loeus doms kyoh nhang.
17 Housoeh Balam doms loh lyis, Balak gas nyang ngheq phudyei vyvm mas Moab uhshe bang yah dvgeh yap joq shih yvlyis nyvng. Balak gas nyang lyis, Yhensain khasoeh ge taiq, ge nyei.
18 Balam pe zis heisoeh thuq los.
Zipo lo Balak eh, Ngos taiq chah zis los gyo aq.
19 Mangso ka hwah dah dius teh ma nghuot.
Ehnyet thaiq loh dah cangsoeu ma nghuot.
Nyang dangthoengh toh zis dvnganh kuot.
Nyang taiq lyis houka bweh joq.
20 Ngos gas Shvmanh aq ge taiq shet zis xauh,
Mangso shvmanh zis lyis ngos ma yoh doms lui tauh.
21 Israel mas thang pheh cho ngos nyvng,
Nyamoq mas yaukyenh, nghuot ya yau cho ma she los das.
Yhensain nyamoq dah Mangso nyamoq yah dvgeh nghuot. \q2 Nyamoq gas nyang nyamoq dah hwankti nghuot ge taiq hoeuh.
22 Mangso ka nyamoq lyis Egutu masyah shwih los las,
nyamoq xiklyis noeuphuk teh zan dyei.
23 Israel dius nyau lyis mandan muot, hweq kat cho yhung lha ma yoh tyi.
Gvshih dius jens Israel cho taiq das zis gas,
Yoeuh aq. Mangso cha kuot goeus, ge.
24 Israel dius nyau gas, yombos khangkhyi teh nghuot.
Nyang gas hau shoh langchingh las ma nyhau dvchank ma no,
nyang ngat sat toh dah suih ma shuk dvchank ma no.
25 Hauh thang lhyi Balak Balam lyis, Nvng Israel dius jens lyis nhoengh das zis ngoek goeus, nyamoq lyis vshvmanh dyei, ge.
26 Balam Balak lyis phuk taiq, Yhensain ngos lyis taiq zis dvnganh ngos kuot chah oen, ngos nvng lyis taiq goeus ma nghuot lhyeh, ge.
Balam Somh Vlhain Pe
27 Balak taiq, Los aq, ngos nvng lyis gohtoeu dvjoqyos mas shwih loh bah: hou mhayah nvng ngah nyhenshang nyamoq lyis nhoengh das zis Mangso gyo mvbeh, ge.
28 Housoeh nyang Balam lyis mhanhdyvp pheh xoeu dah Peor boms thyoh mas shwih doq loh.
29 Balam nyang lyis taiq: Nvng ngos lyis heimha phon nyhet koeuq ci lha noeulu nyhet doeu, yvnglus nyhet doeu she lo dyei aq, ge.
30 Balak gas Balam nyang lyis taiq vgus kuot las, dvphon mha noeulu dvdoeu, yvnglus dvdoeu doeu phudyei.