19
Noeu Nes dah Nyiyvp
1 Yhensain Moshe yahge Aron lyis tying toh.
2 Israel jens lyis o mha dah lyi dyei aq. Nos ma bos, koeu ma huon ku dah noeu nes dvpon Moshe yahge Aron jyank mas she los geh.
3 Nyamoq hauh yvlyis phudyei Eleaza lyis kyauh das. Hauh yvlyis dvp nghe pheh she thuq loh las nyah xikkhonh mas sat.
4 Hauh thang lhyi phudyei Eleaza gas nyah loqnyhauh yah hau suih dvkhamh yoeus las Zvng shot pheh nyhet lhain tyi tsant das.
5 Hau gaunyhauq dvgungs gonh, yeis, shoh, suih yahge oeu dvnganh phudyei soeu dah nyoqlvtjvng mas ngheq chah.
6 Phudyei soeu eq, arit saiq dvtsiq, shomnhamh dvkyang yahge khying nes dvkhvt yoeus las hau nyi mas doeuh kat chah.
7 Hauh thang lhyi phudyei soeu ka nyah dyimis cheih, nyah gungs mas jeis huot gyon las dvp khau mha wvng loh chah. Nyenhthang jweh shoq nyang ma lhoq mus joq.
8 Hau noeupon Ngheq soeu eq nyah dyimis cheih, nyah gungs mas jeis huot gyon chah. Nghuot laus eq nyang eq nyenhthang jweh shoq ma lhoq mus joq.
9 Lhoqshang soeu dvyuk yuk hau noeupon ngheq dah nyiyvp lyis e shenh yoeus las dvp nghe lhoqshang joqyos mas toh chah. Hauh yvlyis Israel jens, diusphung dah ma lhoq zis cheihshang jeis sont yvmas yhung das zis toh chah. Haih zis gas yaunos cheihshang cho kuot.Ref 19.9: Heb 9.13
10 Hau nyiyvp e gaiq soeu eq nyah dyimis cheih chah. Nyenhthang jweh shoq eq ma lhoq mus. Haih lyi gas Israel jens xiklyis eq, nyamoq mas nyeis dah lvbaus xiklyis eq jweh los das shishenh dvnganh mas jus cho nghuot.
Mvng yah Sen
11 Dius mvng zangh tanh bang ka nyhet nyeih ma lhoq.
12 Nyamoq somh vnyeih lyis nyamoq nyang jeis yah cheihshang chah, nyhet vnyeih lyis lhoqshang das. Nghuot laus eq nyamoq somh vnyeih lyis eq nyhet vnyeih lyis eq ma cheihshang lhyi ka nyamoq ma lhoqshang das.
13 Mvng lyis tanh bang nyamoq nyang ma cheihshang lhyi ka nyamoq ma lhoqshang mus joq. Khasoeh ge lyis cheihshang jeis nyamoq lyis ma huot gyon. Nyamoq gas Yhensain dah Zvng lyis vwot v-oeu kuot las nyamoq lyis Mangso dah dius jens ge ma nghamh dyei lo das.
14 Zvng mas dius shei lhyi dah lyi gas, dius shei uhlyis houmha nyeis soeu, nghuot ya zvng mas wvng los soeu ka nyhet nyeih ma lhoqshang mus.
15 Zvng khau mha joq las vnghop ma nghop toh dah yamnote 19.15 Yam nyheih vlhomuh ma nyheih toh zis yahge auh dvnganh eq ma lhoq.
16 Nghe pheh sat las shei, soenghchoenk shei, nghuot ya dius shohyau, lop cha lhyi laus eq zangh tanh lyis hauh soeu ka nyhet nyeih ma lhoqshang.
17 Ma lhoqshang zis yoeus tyamp das xiklyis yaunos cheihshang dah noeu nes pon nyiyvp yoeus, auh mas kat, yaus nyeis jeis lhungh las,
18 cangxeih vcho ka, lhoqshang soeu dvyuk yuk shomnhamh dvkyang yoeus, hau jeis mas jen las, zvng lyis eq, hauh vkhau mha dah vyhang dvnganh lyis eq, zvng khau mha nyeis bang lyis eq tyitsant das. Aiq vcho ka, lhoqshang soeu dvyuk yuk dius shohyau, mvng, lop lyis zangh tanh soeu lhyi hauh jeis tyi tsant das.
19 Hau lhoqshang soeu ka ma lhoqshang bang lyis somh vnyeih lyis eq, nyhet vnyeih lyis eq hauh jeis tyi tsant das. Nyhet vnyeih lyis nyamoq lyis cheihshang dyei, houka nyamoq dyimis cheih, jeis yah gungs cheih goeus ya, nyenhthang jweh lyis lhoqshang das.
20 Ma lhoqshang mus bang nyamoq nyang cheihshang cho ma kuot lyis gas, nyamoq ma lhoqshang dvmus joq: khasoeh ge lyis hau cheihshang jeis nyamoq lyis huot lhyauq zis ma kham. Nyamoq gas Yhensain dah Zvng lyis lhoq lhoeuh las Mangso dah dius oen ma nghamh dyei lo das.
21 Namoq gas jweh los das shishenh dvnganh mas haih lyi chank chah. Cheihshang jeis tyi tsant soeu eq nyah dyimis cheih chah. Hau jeis lyis tanh soeu eq nyenhthang jweh shoq ma lhoqshang.
22 Hau ma lhoqshang soeu zangh tanh zis cha eq ma lhoq. Nyang zangh tanh dah vyhang lhyi zangh tanh soeu eq nyenhthang jweh shoq ma lhoqshang mus, ge.