MALAKHI SAUHBUK
(MALACHI)
1
1 Heika Israel dius jens lyis taiq das xiklyis Yhensain Malakhi lyis dyei dah loeus nghuot.
Israel lyis Yhensain Jyet
2 Yhensain nyah dius jens lyis taiq, Ngos namoq lyis vjangh jyetdap, ge.Ref 1.2-3: Rom 9.13 Ref 1.2-5: Esa 34.5-17, 63.1-6; Yer 49.7-22; Ezk 25.12-14, 35.1-15; Amo 1.11-12; Oba 1-14
Nghuot laus eq nyamoq toeuh zis gas, Nvng ngamoq lyis jyetdap cho khasoeh chixoeuq goeus lah, ge.
Yhensain phuk taiq zis gas, Esau yahge Yakop gas vmang vnoeuh nghuot. Nghuot laus eq ngos Yakop yahge nyah vnyau vshih lyis jyetdap.
3 Ngos Esau yahge nyah vnyau vshih lyis hoeng. Ngos Esau dah boms mau lyis jyamhjyuklhyuk kuot las hauh mau ye khuih jens lyis doeuh tyamp toh dyei, ge.
4 Esau dah vnyau vshih Edom dius jens taiq lyis, Ngamoq dah wus jens dyoqbis goeus, nghuot laus eq ngamoq hauh zis doms soq tsuk das, ge. Hauh thang lhyi Yhensain doms taiq das, Nyamoq doms tsuk goeus jungh, ngos hauh yvlyis doms thyoq das. Dius jens gas nyamoq lyis lhung dah mau, Yhensain yah vcaiq vto nhaiqyo zis xauh dah dius nyau, ge tsain sang das, ge.
5 Israel dius jens gas haih yvlyis nyamoq nyoqjeih yah nyvng das las nyamoq gas, Yhensain ka Israel mau nghe pheh yangh kuhxing joq, tsain ge das.
Yhensain Than than Taiq
6 Maukhung Jesphung Yhensain ka phudyei bang lyis taiq, Lo jens gas nyamoq nyhiphoq jens lyis phauh nyang, jyeidwis jens eq nyamoq svra jens lyis phauh nyang. Ngos namoq dah Uwus nghuot; ngos lyis chamus ma phauh nyang? Ngos namoq dah svra nghuot, chamus ngos lyis ma phauh? Namoq ngos lyis chaxwe ma nhang zis namoq ngos lyis, ngamoq Yhensain lhyi chaxwe ma nhang khasoeh kuot, ge tsain nyei.
7 Heika namoq ngah phon mha choqh phoh zonoms jyungshuk dyei zis yah chaxwe ma nhang khasoeh kuot zis nghuot. Hauh thang lhyi namoq gas, Ngamoq nvng lyis ma phauh khasoeh kuot, ge tsain nyei. Ngos namoq lyis taiq bah, ngah phon lhyi choqh phoh kuot xoeuq zis yah ngos lyis ma phauh kuot zis nghuot.
8 Namoq nyoqjet, nos, khyei gyau gaunyhauq ngos lyis los phudyei lyis houka cha ma chah oen namoq nghamh lhyeh? Housoeh teh gaunyhauq mungh zau lyis dyei yoeuh aq. Nyang namoq lyis nhaiqdoeus das lhyeh? Namoq lyis nyoqnho dyei das lhyeh?Ref 1.8: Lyi 15.21
9 Namoq phudyei bang eh, yang lyis jyehjuh kuot das xiklyis, Gvshih Mangso lhyi dung yoeuh geh. Nyang namoq dung yvlyis ma gyo dyei das. Houka namoq dah yobos nghuot.
10 Maukhung Jesphung Yhensain taiq, Ngah phon mha vkyuh ma bos dah nyi ma tuonh das zis tung das xiklyis namoq dvyuk yuk Yhenmuh khomh lyis nyheih toh nhang mes. Ngos namoq lyis nhaiq ma doeus. Namoq chi los dah jyungshuk lyis ma lhom yoeus das, ge.
11 Mungkvn dvthang mhayah gohtoeu dvthang jweh shoq dah dius jens ngos lyis nyoqnho ngelang dyei. Dvkhauyah nyamoq ngos lyis xangh ngheq dyei, lhom yoeus phoh dah lomhxangh phudyei. Dvnganhmoq ngos lyis nyoqnho ngelang dyei das.
12 Nghuot laus eq namoq gas ngah phon lhyi choqh phoh nghuot ge taiq las, namoq dyei dah zonoms jyungshuk lyis chaxwe ma nhang kuot uhlyis ngos lyis dius ngis tsain khyoq.
13 Namoq gas, Haih muh kuot zis nghoengh goeus ge taiq zis yah nhuot yhont las ngos lyis ma phauh ma nyang kuot. Nvng ngos lyis dyei dah jyungshuk gas khauh dah gaunyhauq, khyei gyau, nos dah vdoeu she los. Ngos namoq jyank masyah hauh zis lhom yoeus das oen nghamh lhyeh?.
14 Nyah gaunyhauq phung mha nyang ngos lyis dyei das ge dangthoengh toh las gis dah gaunyhauq bos laus eq mhuih zis yah, choqh phoh dah gaunyhauq phudyei soeu ka nhoengh zis xauh. Khasoeh ge lyis ngos gas kuhxing dah hwankti nghuot las dius nyau jens dvnganh dah dius jens gas ngos lyis gyukwoms.