18
Nye Yukgis Yhet goh cho Tung
1 Yhensain Moshe lhyi taiq zis gas,
2 Israel jens lyis taiq aq: Ngos gas Yhensain, namoq dah Mangso nghuot.
3 Namoq nyeis ku, Egutu mau bang, nghuot ya Ngos gvshih namoq lyis shwih toh das Khanan mau bang kuot teh vchank kuot goh.
4 Ngah lyi lyis domsyos gyo las ngos tyingtoh dang lyis kuot geh. Ngos gas Yhensain, namoq dah Mangso nghuot.
5 Ngos namoq lyis dyei dah lyi yahge tyingtoh dang chank kuot geh. Housoeh kuot zis yah namoq dah kang lhyi khyuot yoeus das. Ngos Yhensain nghuot.Ref 18.5: Neh 9.29; Ezk 18.9, 20.11-13; Luk 10.28; Rom 10.5; Gal 3.12
6 Yhensain o mha dah lyi dyei. Namoq hank eq namoq nyang sainhchangh yah vyhetgoh.
7 Nah ungwes yah yhetgoh zis yah nah uwus lyis xoq vphuh nhang. Nvng nvnyang ungwes lyis xoq ma gis phuh nhang.
8 Gohtoeu nah uwus dah yhensain nyhiq jens hank yah eq yhetgoh zis yah nah uwus lyis xoq vphuh nhang.Ref 18.8: Lew 20.11; Lyi 22.30, 27.20
9 Nah nhamhmuh sain laus eq, uwus dah lonyi, ungwes dah lonyi, dvyhen khau mha ma kuh los dah nah nhamhmuh doeus soeu yah vyhetgoh.Ref 18.9: Lew 20.17; Lyi 27.22
10 Nah nyeilo yah vyhetgoh; houka nvng lyis xoqphuh nhang zis nghuot.
11 Ungwes gohtoeu toeu laus eq uwus xonh dah nhamhmuh yah vyhetgoh. Nyang eq nah nhamhmuh nghuot.
12-13 Nah vyi, nghuot ya vmes doeus soeu yah vyhetgoh: Nyang gas nah uwus dah nhamhmuh nghuot ya ungwes dah vbi vnoeuh nghuot.Ref 18.12-14: Lew 20.19-20
14 Nah uwus dah vmang vnoeuh dah yhensain nyhiq yah vyhetgoh. Nyang gas nah vmes nghuot.
15 Nah doeusmuh, nghuot ya,Ref 18.12-14: Lew 20.19-20
16 nah vmang vnoeuh dah yhensain nyhiq yah vyhetgoh.Ref 18.16: Lew 20.21
17 Nvng yah yhetgoh goeus dah vmesbih dah lonyi, nghuot ya nyeilo yah vyhetgoh. Hauh bang gas nvng yah dvsuih dvshoh dvnghuot. Houka lhung cho nghuot.Ref 18.17: Lew 20.14; Lyi 27.23
18 Nah yhensain nyhiq kang dwis nyeis shih lyis nah yhensain nyhiq dah vbi vnoeuh lyis nah yhensain nyhiq jens dvyuk khyvlyis vyoeus.
19 Vmesbih mesmus nyeis gyo lyis nyang yah vyhetgoh: khasoeh ge lyis nyang ma lhoq..Ref 18.19: Lew 20.18
20 Gohyuk dah yhensain nyhiq yah vyhetgoh. Houka nvng lyis ma lhoq ma shang kuot dyei.Ref 18.20: Lew 20.10
21 Molek mangso lhyi paiq cho mha yhung das zis nvng nah lo jens hank lyis eq vdyei. Khasoeh ge lyis houka Yhensain Mangso dah nyings lyis xoqphuh cho she los. Ref 18.21: Lew 20.1-5
22 Vbusbih dvyuk gohtoeu vbusbih yah hank eq ma gis yhetgoh. Hauh yvlyis Mangso hoeng.Ref 18.22: Lew 20.13
23 Vbusbih vmesbih hank eq gaunyhauq yah ma gis yhetgoh. Hau phanh loh cho ka nvng lyis vwot v-oeu bweh nhang.Ref 18.23: Dyu 22.19; Lew 20.15-16; Lyi 27.21
24 Hai shuot cho cha yah eq namoq gungs lyis vlhoq lhoeuh goh. Nyamoq gas haih yaunos tsain kuot yvmvyah Yhensain ka hau dius nyau lyis hauh mau masyah khat tyamp las hauh mau namoq lyis dyei.
25 Nyamoq kuot gvng mas hauh maunyeis eq vwot v-oeu nghuot. Housoeh Yhensain hauh mau lyis yau dyei las hauh nyeisjvng gas houmha nyeis bang lyis peq tyamp nhang.
26-27 Nyamoq gas hau choqh phoh zis dvnganh kuot las hauh mau vwot v-oeu bweh nhang. Nghuot laus eq namoq gas housoeh ma gis kuot. Israel laus eq namoq mas nyeis dah lvbaus laus eq dvnganh gas Yhensain dah lyi yahge tyingtoh dang chank nyeis chah.
28 Housoeh lyis hauh mau mas namoq xik mas nyeis las Mangso lhyi ma seq bang lyis peq tyamp teh ma peq tyamp das.
29 Hai vchoqh vlhauq cho chank soeu hank laus eq Mangso dah dius ge ma nghamh dyei lo das yvlyis namoq seq.
30 Yhensain taiq zis gas, Ngos dyei dah tyingtoh dang lyis domsyos gyo geh. Hauh mau mas namoq dah xik pheh nyeis khoq bang kuot teh vchank kuot goh. Haih cho cha yah eq namoq nyang gungs lyis vlhoq lhoeuh goh. Ngos Yhensain, namoq dah Mangso nghuot, ge.