5
Nhaiqnyen das zis Dung
1 Yhensain eh, ngamoq cha mus yvlyis soh dyei aq.
Ngamoq lyis yoeuh las ngamoq nyoqnho ngelang gyoh cho lhyi nyvng dyei aq.
2 Ngamoq dah yhenzis gas gohnyau bang loq mas nghuot;
lvbaus gas ngamoq dah yhen mha tsain nyeis.
3 Ngamoq dah uwus moq lyis jeswus yah sat goeus las
gvshih ngamoq ungwes moq gas chauhmuh tsain nghuot.
4 Ngamoq jeis wis shuk chah,
5 Ngamoq lyis mauhlyihzoe, nghuot ya gola-u lyis teh khat tauq las
ngamoq nyung laus eq ma xauh no.
6 Kang dwis das zis zonoms luk luk yoh das nyhenshang,
ngamoq Egutu bang yahge Asiria jens jyank mas loh sang.
7 Ngamoq dah phauh thyeih moq gas yaunos kuot goeus, nghuot laus eq gvshih nyamoq ma nyeis lo.
Ngamoq gas nyamoq dah yaunos xiklyis kham zo nyeis.
8 Ngamoq dah guon bang gas ung bang dah jons duot las
ngamoq lyis nyamoq yomsoq masyah hank ma yoh khyuot yoeus.
9 Dius sat bang gas sihyos dvmau yah chwang yenh.
Ngamoq zonoms xo lhyi shei lhyi yangh lyis khank chah.
10 Yuot shet zis gas ngamoq dah shohyeis lyis
nyikhyomp teh gywes shoq ngeh nhang.
11 Yerusalem mas ngamoq dah yhensain nyhiq jens yah tsain yhet goh.
Yuda wukhau khanghmuh mas ngamoq dah lonyi jens lyis yauxi cho tsoengh kuot.
12 Ngamoq dah uhshe bang lyis shwih loh las lhangh tyamp.
Ngamoq dah logis jens lyis phauh nyang cho ma chixoeuq.
13 Ngamoq dah loyvm jens lyis jons lyis teh wom tsoengh mhoq nhang.
Yukgis lo jens gas lyei dah thangh wons yah nhiq las vtyi vkamh loh.
14 Logis jens wus khomh mas joeui dyei bang ma bos lo,
loyvm jens gas toenk khvlhank yah lvkhyank ma kat lo.
15 Ngamoq dah kang dwis yvmas pyo cho dom goeus.
Ngamoq goh das yvmas kuk cho joqyos yoeus tyamp goeus.
16 Ngamoq khwank khoq zis cha ma nyet lo.
Ngamoq yaunos kuot goeus las gvshih ngamoq thank goeus.
17 Ngamoq dah ehnyet mas nosthyoh nyeis.
Ngamoq dah nyoqdyeis gvng mas nyoq ma yoh nyvng mus.
18 Zion boms gas jyamhjyuklhyuk joq goeus,
hau dyoq gyoh joq yvmas ye khuih jens suh nyeis.
19 Nghuot laus eq Yhensain eh, nvng gas vcaiq vto hwankti nghuot las
shishenh thank shoq guon das.
20 Nvng ngamoq lyis chamus heinyhank doeuh tyamp toh?
Nvng ngamoq lyis khanhamp eq ma doms soh lo das lhyeh?
21 Yhensain eh, ngamoq lyis nah jyank mas shwih tauh los aq, jenh shwih tauh los aq.
Ngamoq lyis gohlhain dah phunk doms toeu dyei aq.
22 Nvng ngamoq lyis vjangh peq tyamp goeus lhyeh?
Nvng ngamoq lyis nhaiqyo cho ma thank lo das lhyeh?