3
Joeng, Nhaiqlom thaiq, Nghamhloms
1 Ngos gas Mangso yah joeng chah zis cha nghuot yvlyis seq soeu nghuot.
2 Nyang ngos lyis zes zes noq yvmas khat kat.
3 Ngos lyis nhaiq ma nyen lo chwiq zis yah doms bat doms bat kuot.
4 Nyang ngah shoh yahge shohyeis lyis cwe lha shohyau lyis khyauh dyei.
5 Nyang ngos lyis nhaiq ngis zis yahge shanghsenh dah thung mha lhunk toh.
6 Nyang ngos lyis gohlhain yah shei goeus bang nyeis dah soeng soeng noq yvmas tsoengh nyeis nhang.
7 Nyang ngos lyis shamjvng yah twih toh.
Ngos gas phang luiq das zis nghamhloms cho ma bos dah thung dius nghuot.
8 Ngos lyis pangh das zis kaiq ngaus laus eq
Mangso ka ma gyo dyei.
9 Ngos khalhye lhain loh khalhye lukciank ci toh las vtyi vkamh suh.
10 Nyang ngos lyis woms teh lhom nyeis; Nyang ngos lyis khangkhyi teh dyvmdap los.
11 Nyang ngos lyis cho mha nyhik las langchingh toh khoq.
12 Nyang nyah lyei thung lha
ngos lyis nyo baiq toeuqkhom kuot.
13 Nyang nyah nyo yah ngah gungs mas baiq tsuk kat.
14 Dius jens dvnyeih gonh ngos lyis yis.
Nyamoq ngos lyis jwangh dah lvkhyank tsain kat.
15 Zonoms shukphoh xiklyis nyang ngos lyis khoh dah khamzo cho kyingh dyei.
16 Nyang ngah nyoqnho lhyi nyeisjvng mas buot las luk mas ngah zwis gyweh.
17 Ngos gas yanghzan cho, nyenstap cho yahge pyo cho cha nghuot yvlyis tohnyhik tyamp.
18 Yhensain mha ngos nghamhloms cho thank goeus. Ngos nyangh shoq ma xauh nyeis lo.
19 Ngos nos cho, yhen ma bos cho nghamh zis gas khoh dah nyonoq nghuot.
20 Ngos hauh yvlyis vlhomuh soh nyeis. Ngah dyos nhaiqngis nyeis.
21 Nghuot laus eq ngos haih zis nghamh lyis nghamhloms cho yoh.
22 Yhensain dah mathank magons jyetdap cho yahge nhaiqnyen cho tsoq las,
23 nvp khanghmuh nhaiqnyen cho vsaiq xauh kham yoeus. Nah wontang cho ka kuhxing.
24 Yhensain ka ngos yoh zis dvnganh nghuot las ngos nyang lyis nghamhloms toh.
25 Yhensain ka nyang lyis loms soeu khanghmuh xiklyis gis.
26 Housoeh las Yhensain yang lyis khyuot yoeus das cho lhyi ehnyet xing xing langh nyeis zis gas yah xiklyis gis thank nghuot.
27 Yang loyvm yoq lyis yah hai ehnyet xing cho xuq das zis gis thank nghuot.
28 Yang khamzo lyis dvyuk kyingh tsoek yah ehnyet xing xing tsung langh chah.
29 Nghamhloms joqyos bos shih mvbeh yang o mha gyoh las gop chah.
30 Bat zis yah ma phauh gis kuot laus eq yang dvnganh lhom yoeus chah.
31 Yhensain ka nhaiqnyen soeu nghuot las yang lyis vcaiq vto ma peq tyamp das.
32 Nyang yang lyis nhaiqkuk cho she kat dyei mvbeh, nghuot laus eq nyang yang lyis jyetdap sainhnos cho ka jyoengh kuhxing.
33 Yhensain ka dius lyis nos nhang mes, nghuot ya kuk nhang mes zis ma nghuot.
34 Yhensain ka thung khau mha, yah dyos lyis gyik thyi lhyi seq.
35 Nyhang Thank Mangso xikkhonh mas yang lyis ma jus khyvlyis kuot zis xauh lyis nyang seq.
36 Soetuon jang mas lyi jus cho nungsdoms loh lyis nyang seq.
37 Yhensain ma taiq toh lyis, hank eq taiq las hauh zis ma yoh bweh los nhang.
38 Nyhang thank Mangso taiq toh las, gis cho yahge yaukyenh cho bweh los.
39 Yang yah yaunos gvng mas joeng zis xauh lyis kang dwis dius chamus lop nyeis chah lah?
40 Yang gas yah cho lhyi kyink las Yhensain jyank pheh tauh loh goh.
41 Maukhung mha Mangso lhyi yah nhaiqlom khomh phank las shvmanh dung goh.
42 Yhensain eh, ngamoq yaunos kuot zis yah
gomloeus toq goeus las nvng ngamoq lyis ma khyuot dyei.
43 Nah nhaiqnyen cho lhyi nah nhaiqyo cho yah nghop shung tyamp las nvng ngamoq lyis chank khat las sat.
44 Nhaiqlom dyis dah jyommauh nyo thoeu lha ngamoq shvmanh dung zis nah jyank mas ma bangh loh.
45 Nvng ngamoq lyis gohtoeu dius nyau jens mas mhotkhyot teh kuot tyamp.
46 Ngamoq gas ngamoq dah jeswus dvnganh yah ma phauhgis jwangh zis xauh.
47 Ngamoq gas dyoqbis zainsmuh yahge dyoqgyoh cho xauh los. Ngamoq gas gyukphoh dvnphoh yvmas nyeis.
48 Ngah dius jens dyoqbis yvmas ngah nyoqjeih mas nyoqdyeis lvng yaus nyeis.
49 Ngah nyoqdyeis gas malyenlo shuon nyeis.
50 Yhensain ka ngamoq lyis maukhung mhayah yoeuh las nyvng shoq,
51 Wus mas dah vmesbih jens cha mus loh zis nyvng lyis ngah nhaiqlom mas kuk nyeis.
52 Shohyos gungs mas ngos gas ngah jeswus lhyik mas nghoq nyih teh nyih.
53 Nyamoq ngos lyis dwang mas vdwis doeuh khyoq las lukzains yah cheiq toh.
54 Jeis gas ngah thoq mas nghop los las ngos gas shei lo das, oen nghamh.
55 Yhensain eh, dwang theh masyah ngos nvng lyis lui.
56 Ngah thwe gyo dyei das zis dung lyis, nvng xauhgyo.
57 Nvng ngos lyis toeuh las
ngos ma gyuk das xiklyis taiq.
58 Nvng ngos lyis taiq gos dyei das zis los las ngah kang lhyi khyuot yoeus.
59 Nyamoq ngos lyis tyi lha cu cho lhyi nvng seq; ngos lyis ngah soe tuon dyei aq.
60 Ngah jeswus jens ngos lyis khasoeh hoeng lha, ngos lyis tyi lha khasoeh lhaink zis nvng seq.
61 Yhensain eh, nyamoq ngos lyis ma phauhgis kuot zis nvng xauhgyo goeus; nyamoq dah lhaink cho dvnganh nvng seq.
62 Nyamoq dvnyeih gonh ngah cho taiq las cvvq cho kuot.
63 Nvpsangh masyah nyenhthang jweh shoq ngos lyis jwangh dah lvkhyank kat.
64 Yhensain eh, nyamoq kuot goeus zis lyis nyamoq lyis joeng aq.
65 Nyamoq lyis nhoengh las nhaiqlom thank nhang aq.
66 Nyamoq lyis shoh soeh khat khyoq las nyeisjvng thoq masyah buot tyamp aq.