9
Yehu Coeu Juot Kham
1 Lvpe Elisha gas lvpe lo jens mas zis dvyuk lyis khi lha nyang lyis taiq zis gas, Nvng cicont kuot aq, haih tsanlun coeu thuk yoeus chi lha Ramot Gilead mas loh aq.
2 Nvng hauh joqyos mas jweh lyis Nimshi dah nyeilo, Yehoshaphat lo Yehu lhyi loh xo aq. Nyang lyis nyah dyenschangh jens yah we dah yvplhunk mas shwih loh aq.
3 Nyah uhloms mas haih tsanlun coeu huot las Yhensain heisoeh ge: Ngos nvng lyis Israel thoq mas hwankti duot das xiklyis coeu juot dyei, oen aq. Hauh thang lhyi nvng hou mhayah thuq loh aq, vsheq nyeis lo, ge.
4 Housoeh las hau lvpe loyvm phoq gas Ramot Gilead pheh loh.
5 Nyang jweh lyis houmha jeszau jens zophuom nyeis. Housoeh nyang taiq zis gas, Zaumuh eh, ngos nah xiklyis loeus wons los, ge.
Yehu taiq zis gas, Ngamoq kha yuk xiklyis nghuot lah, ge.
Nyang gas, Nvng zaumuh xiklyis nghuot, ge.
6 Housoeh nyah aiq yuk yvpkhau mha wvng loh las lvpe lo ka Yehu dah uhloms mas tsanlun coeu huot kat las taiq zis gas, Yhensain, Israel dah Mangso heisoeh ge: Ngos nvng lyis ngah dius nyau Israel thoq mas hwankti duot das zis coeu juot dyei.Ref 9.6: 1Hw 19.16
7 Ngah lvpe jens yahge gohtoeu ngah jyeidwis jens lyis sat gvng mas, ngos Yezebel lyis joeng das xiklyis nvng Ahab yhenbang dvnganh yahge nyah vnyau dvnganh lyis zan chah.
8 Ahab yhenbang dvnganh yahge nyah vnyau dvnganh shei chah; nyah yhenbang mas yukgis lo, loyvm, manglo dvnganh lyis ngos Israel masyah thyet tyamp das.
9 Ngos nyah yhenbang lyis Nebat lo Israel hwankti Yeroboam yhenbang yahge Ahiya lo Israel hwankti Basha yhenbang lyis teh kuot das.
10 Yezebel lyis nyhop soeu ma bos; Yezrel mau mas nyah mvng lyis lvkhuih yah zo das, ge. Hauh dang dye taiq thang lhyi lvpe lo gas khomh phank las phang khoq.Ref 9.10: 1Hw 21.23
11 Yehu ka nyah zau changh jens jyank thuq los lyis, nyamoq nyang lyis nyei zis gas, Dvnganh gis lhyeh? Haih huonh soeu cha o mes las nah jyank los lah, ge.
Yehu gas, Hauh dius yuk cha o mes zis namoq seq, ge.
12 Nyamoq gas, Ngamoq ma seq, nyang cha taiq khoq zis ngamoq lyis taiq kyoh aq, ge.
Nyang ngos lyis taiq zis gas, Yhensain taiq: Ngos nvng lyis Israel hwankti khyvlyis coeu juot dyei, ge.
13 Hauh uhlyis nyang, Yehu dah zau changh jens gas hank eq hank dah misnotecloak ge, lainzain mas twih las kvtoq masyah lhangh toh dah dyiloq ma dap dah thoq dyi dvja yoeus las Yehu yap joq dah cho mas nyhoeuh dyei lholha lvbuh muot las Yehu ka hwankti nghuot, ge kaiq.
Hwankti Yoram lyis Sat
14-15 Hauh thang lhyi Yehu ka Ramot Gilead jeszan khyomp mas Siria hwankti Hazael yah zan-goh yvmas dvmdap las Yezrel wus mas dvm yhoh nyeis dah hwankti Yoram lyis sat das xiklyis khaujeini. Housoeh las Nimshi lo Yehu nyah zau changh jens lyis taiq zis gas, Namoq ngos yah dvgeh nghuot lyis gas, Yezrel mas nyeis bang zaih das xiklyis loeus loh kyoh das dius dvyuk eq Ramot wus masyah vthuq loh nhang goh, ge.
16 Nyang lhyingh ji las Yezrel pheh loh. Yoram nos nyeis shih las Yuda hwankti Ahazia eq Yoram lyis yoeuh das ge houmha los jweh nyeis.
17 Yezrel wus tyoeuqzvm zungh soeu ka yap las Yehu yahge nyang yah chank los bang nyoshoq lyis nyvng lyis, nyang taiq zis gas, Ngos dius dvjens lyis nyvng, ge kaiq taiq.
Yoram gas, Nyamoq buisnoms, nghuot ya jeswus nghuot cho seq das xiklyis, nyang ji soeu dvyuk lyis loh yoeuh nhang aq, ge.
18 Hauh loeuskyoh soeu eq Yehu yah loh xauhgoh las taiq zis gas, Nyenstap cho nghuot lah, ge hwankti nyei, ge.
Yehu ka, Nvng nyenstap cho yah cha sen? Nvng tauh las ngah thang mha chank los aq, ge.
Tyoeuqzvm mas zungh soeu ka, Loeus kyoh soeu ka dius phung mha jweh las ma tauh los lo, ge loeus kyoh.
19 Gohtoeu loeuskyoh soeu dvyuk doms nhang lha, Yehu lhyi dvyhangteh dah nyeidang nyei. Yehu doms toeuh zis gas, Nyenstap cho ka nvng yah sen lah? Nvng tauh las ngah thang mha chank los aq, ge.
20 Loeuskyoh soeu dius phung mha jweh las ma tauh los lo, ge zungh soeu loeus dvlhain doms kyoh los. Nyang taiq shih zis gas, Hauh dius phung dah uhshe soeu ka Nimshi lo Yehu nghuot, khasoeh ge lyis nyah lhyingh lyis mvgon komp wuih los, ge.
21 Ngah lhyingh cicont kuot geh, ge Hwankti Yoram taiq. Lhyingh cicont dye kuot yah dvyih nyang yahge Yuda hwankti Ahazia gas Yehu yah xauhgoh das xiklyis nyang yuk nyang toeu dah lhyingh ya tsain thuqh loh. Nyah aiq yuk gas Yehu yah Yezrel dius Nabot dah maunyeis mas xauhgoh.
22 Nvng nyenstap zis yah los lhyeh, ge Yoram Yehu lyis nyei.
Yehu ka, Nah ungwes Yezebel kuot xi dah silho paiq cho, hweq kat cho hounyhoq bos nyeis yvmas nyenstap cho khasoeh yoh bos das lah, ge toeuh.
23 Yoram nyang lhyingh lyis tauh zis yah, Ahazia eh, Mhuih jyomh zis dvnghuot, ge kaiq las phang loh.
24 Yehu ka nyah lyei yah yomkat dvdvm baiq kat lyis Yoram dah kvtoq jo mas zangh las nyo gas nhaiqlom lyis zuk wvng loh zis yah Yoram gas nyah lhyingh khau mha lains shei.
25 Yehu ka nyah jeszau Bidka lyis taiq zis gas, Nyah mvng lyis yoeus las Yezrel dius Nabot dah yos mas doeuh khyoq aq. Nvng yahge ngos hwankti Yoram dah uwus Ahab thang mha nyang ji las chank los uhlyis haih dang Ahab lyis tyi lha Yhensain taiq yvlyis soh aq:
26 Nabot dah suih, nyah lo jens dah suih lyis nyinaq ngos nyvng. Haih maunyeis mas nyang, ngos nvng lyis joeng das oen, ngos dangthoengh toh, ge Yhensain taiq toh. Housoeh las Yhensain dah dangthoengh tyink das xiklyis Yoram dah mvng lyis yoeus las Nabot dah yos mas doeuh khyoq aq, ge Yehu nyah jeszau lyis taiq.Ref 9.26: 1Hw 21.19
Yuda Hwankti Sat Xauh
27 Hwankti Ahazia hau bweh cho nyvng lyis nyah lhyingh yah Bet Hagan cho chank yah phang loh. Yehu eq nyang lyis chank kat. Yehu ka, Nyang lyis eq sat geh, ge nyah dius jens lyis vmingh dyei. Housoeh las nyang nyah lhyingh yah Gur wus pheh loh nyeis lyis Ibleam wus nvm mas nyamoq gas nyang lyis dvmtap. Nghuot laus eq nyang tsoq las loh nyeis yvmas Megido jweh lyis shei.
28 Nyah zau jens nyah mvng lyis lhyingh yah Yerusalem pheh thuq loh las Dawi dah wus hwankti lop mas nyhop.
29 Ahab lo Yoram Israel Hwankti duot zis dvci das vzvn lyis Ahazia gas Yuda hwankti bweh los.
Yezebel Sat Xauh
30 Yehu Yezrel mas jweh los. Bweh cho Yezebel xauhgyo lyis nyang nyah nyoq mas mvcheih juot, cam saiq las hwankti yhen khomhbaiq mas yap las cho pheh yoeuh nyeis.
31 Yehu wus khomh mas wvng los lyis Yezebel kaiq zis gas, Dius sat soeu, nvng nyenstap zis yah los lhyeh? Nvng gas vsainnyang dah yhensain lhyi sat dah Zimri yah doeusgoh, ge.
32 Yehu ka khomhbaiq mas yoeuh las, Ngah shot pheh hank bos, ge kaiq. Houmha hwankti yhen ba dah zau aiq somh yuk nyang lyis yoeuh kat.
33 Housoeh Yehu nyamoq lyis taiq zis gas, Nyang lyis duon thyet khyoq aq, ge. Nyamoq nyang lyis tsain duon thyet khyoq las nyah suih gas tyoyvm mas eq, nyang thoq mas eq dap loh. Yehu ka nyah mvng thoq mas nyah nyang yahge lhyingh lyis komp lai loh,
34 hwankti yhen khau mha loh wvng zo shuk. Hauh thang lhyi nyang taiq zis gas, Hau nhoengh xauh dah vmesbih gas hwankti lonyi nghuot las nyah mvng lyis loh yoeus nyhop geh, ge.
35 Nghuot laus eq nyamoq gas nyang lyis nyhop das ge loh lyis nyah uhkhangh, khyei yau, loq yau dvtsain nyvng lo.
36 Housoeh yvmvyah nyamoq tauh los las Yehu lyis los taiq kyoh lyis nyang gas, Yezrel maunyeis mas lvkhuih jens Yezebel dah shoh lyis zo das ge Yhensain ka nyah jyeidwis, Tishbe dius Eliya lyis yah taiq toh dang nyuk los.Ref 9.36: 1Hw 21.23
37 Yezebel dah mvng lyis Yezrel maunyeis, yos mas jenh teh dyos joq das, housoeh las hank eq nyang lyis ma yoh comh lo das, ge.