23
Jyoeng Paiq Cho Doms Kuot
(2Ss 34:3-7, 29-33)
1 Hauh thang lhyi hwankti ka, Yuda yahge Yerusalem mas dah logis jens lyis khi tsainh.
2 Hwankti ka Yuda jens, Yerusalem mas bang, phudyei bang, lvpe jens, dius jens shohjyen bang dis bang dvnganh yah dvgeh Yhenmuh mas doq loh. Hwankti ka Yhenmuh mas nyvng dah Thanghchvp buk gonh lyis nyamoq dah xikkhonh mas nghap kyoh.
3 Hwankti ka zains nvm mas yap las, Haih sauhbuk mas lhaih toh dang lyis chank das, Yhensain lhyi domsyos gyo das, nyah tyingdang, nyah lyi lyis ngah ehnyet yahge nhaiqlom dvnganh yah chank kuot das ge, Yhensain xikkhonh mas thanghchvp toh. Dius jens dvnganh eq hauh thanghchvp mas bos zis yah dvyhangteh chank kuot das, ge dangthoengh toh.
4 Hwankti ka, phudyei zainsmuh Hilkia, nyang lyis pangh dah phudyei bang, Yhenmuh khomh zungh bang lyis Bala, Ashera, kyi paiq das xiklyis kuot toh dah vyhang dvnganh Yhenmuh masyah yoeus tyamp geh ge, vmingh dyei. Housoeh hwankti ka hauh yvlyis Yerusalem nghe pheh Kidron langhkhau nvm mas ngheq tyamp las nyiyvp lyis Bethel pheh yoeus loh.Ref 23.4-6: 2Hw 21.3; 2Ss 33.3
5 Yerusalem yvmlhaink, Yuda jens dah wus mas, ma jus dah mangso jens dah phon thoq mas ngheq das xiklyis Yuda hwankti jens tsain toeuq kat dah phudyei bang, - Bala, buislom, lhamhmuh, kyi yahge maukhung vyhang lhyi xangh ngheq dyei dah phudyei bang dvnganh lyis - khat tyamp.
6 Yhenmuh masyah gywes nyih Ashera dah gungslho lhyi yoeus las Yerusalem nghe pheh Kidron langhkhau mas e ngheq las tsoh mons bweh shoq thungh thyi lha dius jens dah lop khyam mha sanh tyamp.
7 Tsai nyang gas Yhenmuh mas nghe nyhiq nghe phoq nyeis yhen (Ashera gungslho lhyi huot dah dyixing yoq joqyos), lhyi thyoq tyamp.
8 Nyang gas Yuda wus jens mas tsain nyeis Yhensain dah phudyei bang dvnganh lyis Yerusalem pheh shwih los las nyamoq xangh ngheq khoq dah ma jus mangso paiq bang dah nyhang joqyos lyis vwot v-oeu kuot. Yerusalem wus zau Yoshua dah khomh loqwi nvm mas joq nyhang joqyos lyis tsain thyoq tyamp. Haih khomh gas wus pheh wvng loh lyis wus khomh dah loqwi pheh joq.
9 Hauh phudyei bang gas Yhenmuh mas phuqsoe das toeuh ma yoh, nghuot laus eq nyamoq gas nyamoq dah phudyei changh yah bicheih ma kat ohlhyoq tsain gis zo.
10 Hank eq Molek mangso xiklyis vsainnyang loloeu lonyi lyis ngheq phudyei cho ma yoh kuot shoq, Hwankti Yosia ka Hinom langhkhau mha joq ma jus mangso paiq bang dah paiq joqyos, Tophet lyis eq vwot v-oeu kuot.Ref 23.10: Lew 18.21; Yer 7.31, 19.1-6, 32.35
11 Nyang gas Yuda hwankti jens buis lyis paiq das xiklyis kyauh toh dah nyang lho lyis yoeus tyamp las hauh paiq cho mha yhung dah nyilhyingh lyis eq ngheq. (Hauh zis gas zauzains Nathan Melek nyeis joqyos yah ma we, khyam khomh nvm Yhenmuh ganjangh aiq joq mha joq.)
12 Hwankti yhen khung dvm thoq, Ahaz dah nyhang tsank yvp dah vthoq mas Yuda hwankti jens kuot toh dah phon jens, yahge Yhenmuh ganjangh aiq joq mas Manase ci toh dah phon jens lyis eq, hwankti Yosia ka thyoq, bat thyi lha Kidron langhkhau mas sanh tyamp.Ref 23.12: 2Hw 21.5; 2Ss 33.5
13 Yosia gas Yerusalem wus buisthuq shot pheh, Tsanlun Bomsnote 23.13 Tsanlun Boms: Hebre mas "Dyoqbis Boms" nghuot ya "Yaunos Boms" yah byi toh. dah mautyi pheh, hwankti Solomon ci toh, vxoq vcaiq paiq vlho jens nghuot dah - Sidon phvra lonyi Astarte, Moab mangso Khemosh, Amon mangso Molek dah phon jens lhyi vwot v-oeu kuot tyamp.Ref 23.13: 1Hw 11.7
14 Hwankti Yosia gas lukzains jens lyis bat thyi tyamp, gywes nyih Ashera gungslho jens lyis khyauh las hauh vlho jens joq khoq yvmas dius jens dah shohyau dyingh nhang.
15 Yosia gas Bethel mha dah paiq joqyos lyis eq bat khyop. Hauh zis lyis Israel jens lyis yaunos kuot nhang Nebat lo Hwankti Yeroboam ci toh zis nghuot. Yosia gas hauh phon lhyi thyoq khyoq, houmha dah luk lyis bat thyi lha vmons mhont; nyang Ashera gungslho lhyi eq ngheq.Ref 23.15: 1Hw 12.33
16 Yosia lhain yoeuh lyis jing mas joq dah lop lyis nyvng. Nyang gas dius jens lyis hauh lop mas dah shohyau tsain yoeus nhang lha phon thoq mas ngheq. Nyang heisoeh kuot zis gas phon lhyi vwot v-oeu bweh nhang: Haih zis gas gohlhain pwe yoq lyis hwankti Yeroboam phon nvm mas yap joq uhlyis lvpe taiq toh cho nghuot. Yosia lhain yoeuh lyis hauh lvpe dah lop joq zis nyvng.Ref 23.16: 1Hw 13.2
17 Hank dah lop nghuot lah, ge nyang nyei.Ref 23.17: 1Hw 13.30-32
Bethel wus mas bang nyang lyis taiq zis gas, Nvng haih phon mha kuot das cho lhyi pe toh dah Yuda mau masyah los lvpe dah lop nghuot, ge.
18 Hwankti ka, Joq goeus jungh, haih shohyau lyis hank eq vxwih goh, ge.
Housoeh las hauh zis gas Samari masyah los, lvpe dah shohyau yah dvgeh joq.
19 Israel hwankti jens Yhensain lhyi nhaiqyo nhang dah Samari wus jens mas ma jus mangso paiq bang dah paiq joqyos dvnganh lyis Hwankti Yosia thyoq tyamp. Nyang gas Bethel mha dah phon lyis kuot teh hauh phon dvnganh lyis kuot.
20 Hau ma jus mangso lhyi paiq phudyei bang dvnganh lyis eq nyamoq phuqsoe dah phon thoq mas sat las shohyau lyis hauh thoq mas ngheq. Hauh thang lhyi, nyang Yerusalem pheh tauh loh.
Yosia Lhuiq Kat Pwe Kuot
(2Ss 35.1-19)
21 Hwankti Yosia gas thanghchvp buk mas lhaih toh zis yah dvyhangteh Yhensain, nyamoq dah Mangso lhyi phauh nyang das xiklyis Lhuiq Kat Pwe kuot das xiklyis dius jens lyis vmingh dyei.
22 Jyoengh hau Lhuiq Kat Pwe ma kuot lo zis Israel jens lyis soetuon dah soetuon bang dah zaih, Israel hwankti jens yahge Yuda hwankti jens dah zaih masyah nghuot goeus.
23 Gvshih Hwankti Yosia guon zis dvci xet vzvn lyis kyingh Yerusalem mas Lhuiq Kat Pwe tsain kuot.
Yosia Gohtoeu Thaiq cho Kuot
24 Hauh thoq lyis Yhenmuh mas phudyei Hilkia nyvng dah sauhbuk mas lhaih toh lyi mas dah dang lyis yoh tsain kuot das xiklyis Hwankti Yosia gas Yuda mau yahge Yerusalem mas dah gyuiswvng bang, loq yoeuh bang, yhen zungh mangso jens, gungslho jens, ma jus dah mangso lhyi paiq zisyos dvnganh lyis yoeus tyamp.
25 Moshe dah lyi dvnganh yah dvyhangteh Yhensain jyank pheh nyah ehnyet dvnganh, nyah dyos dvnganh, nyang duot cho dvnganh yah lhain los dah hwankti, nyah xikpheh hank ma bos, nyah thang pheh eq hank ma thuq los lo.
26 Nghuot laus eq Yhensain lhyi nhaiqyo nhang Manase dah cu cho gvng mas, Yhensain ka Yuda vnyau lyis gvgis nhaiqyo zis ma bi.
27 Yhensain taiq zis gas, Ngos Israel lyis khat tyamp teh Yuda lyis eq ngah nyoqlvtjvng masyah khat tyamp das. Hai ngos khyen toh, Yerusalem yahge ngos lyis paiq nhang das oen ngos taiq dah joqyos, Yhenmuh lyis ngos tyamp toh das, ge.
Yosia guon cho Vthang
(2Ss 35:20-36:1)
28 Yosia dah muh nyet shih goeu yahge nyang duot cho dvnganh gas Yuda hwankti jens Sungson mha lhaih toh.
29 Yosia dah zaih lyis Egutu hwankti Pharao Neko ka Asiria hwankti lhyi zan das ge Uphrat lvng jweh shoq doq loh lyis hwankti Yosia gas nyang lyis loh zan. Egutu hwankti ka Yosia lyis Megido mas thungh xauhgoh las sat.
30 Nyah zau jens gas nyah mvng lyis Megido masyah Yerusalem pheh jeslhyingh masyah thuq loh las nyah lop mas nyhop.
Yuda jens gas Yosia lo Yehoahaz lyis shwih las coeu juot zis yah nyah uwus joqyos mas hwankti toh.
Yuda Hwankti Yoahaz
(2Ss 36:2-4)
31 Yehoahaz ka aiqci somh zvn bos lyis hwankti bweh los las Yerusalem mas Lhamhmuh somh khyvp guon khoq. Nyah ungwes gas Libna wus mas Yeremia lonyi Hamutal nghuot.
32 Nyang gas nyah phauh thyeih moq kuot khoq vgus Yhensain nyoqlvtjvng mas ma gis zis kuot.
33 Pharao Neko ka nyang lyis Yerusalem mas hwankti ma kuot bas jungh ge Hamat mau Ribla mas thung lhunk toh. Pharao Neko ka Yuda mau lyis ngwis 6,800 paung, xing 68 paung khoengh kat nhang.
34 Pharao Neko gas Yosia lo Eliakim lhyi Yehoiakim ge nyings thaiq nyhink las nyah uwus Yosia joqyos mas hwankti toh. Pharao gas Yoahaz lyis Egutu pheh shwih gyoh e lha Yoahaz houmha shei.Ref 23.34: Yer 22.11-12
Yuda Hwankti Yehoiakim
(2Ss 36:5-8)
35 Yehoiakim ka Pharao Neko sang dah khoengh yoh kat das nyhoq dius jens jyank masyah yoh bang lyis yoh khyvlyis gvm boms khyoq las khoengh khywi tsainh.
36 Yehoiakim ka nyang hwankti bweh los uhlyis aiqci oeng zvn nghuot. Nyang Yerusalem mas dvci dvzvn guon khoq. Nyah ungwes gas Ruma wus mas Pedaia lonyi Zebida nghuot.Ref 23.36: Yer 22.18-19, 26.1-6, 35.1-19
37 Nyang gas nyah phauh thyeih moq kuot khoq vgus Yhensain dah nyoqlvtjvng mas ma gis zis kuot.