20
Hwankti Hezekia Nos Gis
(Esa 38:1-8, 21-22; 2Ss 32:24-26)
1 Hauh yoq lyis Hezekia gas shei bah ge shoq nos. Amoz lo lvpe Esaia nyah jyank mas loh taiq zis gas, Yhensain ka: Nvng dvnganh lyis gvn toh aq, khasoeh ge lyis nvng nos gis lo das zis ma nghuot, nvng shei das zis cicont kuot aq, ge.
2 Hezekia gas tyoyvm pheh nyoqnho xoeu lha Yhensain lhyi dung zis gas,
3 Yhensain eh, ngos gas lomluk luk, jyoeng zis yah kank bos bos nah nyoqlvtjvng mas gis gis kuot cho yahge nvng ngos lyis kuot nhang mes khyvlyis vjangh yah ngos yomkat chank kuot cho lhyi soh dyei aq, ge. Lholha nyang svsoh ngaus.
4 Esaia hwankti jyank mhayah thuq loh las hwankti yhen vgungs vjens mas ma jweh shih lyis Yhensain dah dang nyah jyank mas jweh taiq zis gas,
5 Ngah dius jens dah uhshe soeu Hezekia lyis loh doms taiq aq: Ngos Yhensain, nah phauh thyeih Dawi dah Mangso ka nvng dung dang xauhgyo goeus, nah nyoqdyeis lyis nyvng goeus. Ngos nvng lyis jyoengh gis los nhang das las somh vnyeih lyis nvng Yhenmuh mas doq loh das.
6 Ngos nvng lyis dvci oeng zvn nyeis nhang shih das. Nvng yahge haih Yerusalem wus lyis Asiria hwankti zainsmuh loq masyah khyuot yoeus das. Ngvnyang dah nyoqnho ngelang gvng mas eq, ngah jyeidwis Dawi lyis ngos toh dah dangthoengh gvng mas eq ngos haih wus lyis gos dyei das, ge.
7 Tsai Esaia gas, Maiphang shih dvdyoms yoeus thungh pah las nyah dyings mas tap dyei aq. Nyang gis los das, ge hwankti dah thang chank bang lyis taiq.
8 Hwankti Hezekia nyei zis gas, Yhensain ka ngah nos gis los nhang lha somh vnyeih lyis ngos Yhenmuh mas yoh doq loh das ge dah vlho cha nghuot lah, ge.
9 Esaia taiq zis gas, Haih zis gas nah xiklyis Yhensain jyank mas dah vlho nghuot. Houka Yhensain taiq goeus dang lyis nyang kuot das: Siyet gas xik pheh dvci keq loh lah? Nungs pheh dvci keq jik loh, ge.
10 Hezekia phuk taiq zis gas, Xik pheh dvci keq loh das zis lwis. Nungs pheh dvci keq jik bas jungh, ge.
11 Lvpe Esaia Yhensain lhyi kaiq sang lha nyang Hwankti Ahaz dah buis keq nayi mas dvci keq ywi goeus dah siyet lyis dvci keq nungs doms xwih jik toh.
Babilon Loeus Kyoh Bang
(Esa 39.1-8)
12 Hauh yoq lyis Baladan lo Babilon hwankti Merodak Baladan gas Hezekia nos ge xauhgyo las maussauh yahge jyungshuk huon kat.
13 Hezekia gas nyamoq lyis lhom yoeus las nyah yhen mha dah zisyos ngwis, xing, xangh ja, phauhdap coeu, jeszis dvnganh yah nyamoq lyis chixoeuq. Hezekia gas nyah yhen, nyah munghdan mas zis nyamoq lyis ma chixoeuq zis dvkoeuq eq ma bos lo.
14 Hauh thang lhyi lvpe Esaia hwankti Hezekia jyank mas loh taiq zis gas, Haih dius jens cha ge? Nah jyank mas khalhye yah tsain los, ge.
Hezekia gas, Nyamoq gas Babilon mau we masyah los, ge.
15 Esaia gas, Hwankti yhen mha cha tsain nyvng loh goeus lah, ge.
Hezekia phuk taiq zis gas, Ngah yhen mha joq ya joq yvlyis nyvng goeus. Ngah zisyos mas ngos nyamoq lyis ma chixoeuq zis cha ma bos lo, ge.
16 Esaia Hezekia lyis taiq zis gas, Yhensain dah dang gyo yoeuh aq:
17 Yoeuh aq, Yhensain taiq zis gas, Nah yhen mha joq zis dvnganh, khvnyhik jweh shoq nah phauh thyeih moq xo tsainh toh zis dvnganh lyis Babilon pheh yoeus loh buisnyeis jweh los das, cha eq ma nyet lo das.Ref 20.17: 2Hw 24.13; 2Ss 36.10
18 Nvng mas yaus, nah lo jens nyei jens lyis shwih loh las, Babilon hwankti yhen mha muh zwi bang bweh das, ge. Ref 20.18: 2Hw 24.14-15; Dan 1.1-7
19 Hwankti Hezekia gas nyah zaih lyis nyenstap cho, jes ma bos das ge daq gyo las, Nvng taiq dah Yhensain dang gas gis, ge toeuh.
Hezekia Guon Cho Vthang
(2Ss 32:32-33)
20 Hezekia kuot cho nyet shih goeu yahge nyang duot cho, jeis thomh yahge wus mas jeis she los dah tvp khasoeh kuot cho dvnganh gas Yuda hwankti jens Sungson mha lhaih toh.
21 Hezekia shei thang lhyi nyah joqyos mas, nyah lo Manase guon khoq.