13
Israel Hwankti Yehoahaz
1 Yuda hwankti Ahazia lo Yoash guon zis aiqci somh vzvn lyis Yehu lo Yehoahaz gas Samari mas Israel hwankti bweh los las dvci nyhet zvn guon khoq.
2 Nyah xik mas dah Nebat lo hwankti Yeroboam teh nyang gas Yhensain dah nyoqlvtjvng mas yaunos kuot las Israel lyis yaunos pheh shwih loh. Nyang gas nyah ma gis cho khanhamp eq ma doeuh tyamp.
3 Housoeh las Yhensain ka Israel jens lyis nhaiqyo las, Siria hwankti Hazael lyis eq, Hazael lo Ben Hadad lyis eq Israel bang lyis vlhain lhain zan ung nhang.
4 Housoeh las Yehoahaz gas Yhensain lhyi vkyuh dung las Yhensain ka Siria hwankti shoeuhshih las Israel vnyau xauh kham cho nyvng las nyah vkyuh dung dang gyo yoeus dyei.
5 Yhensain ka Israel jens lyis khyuot yoeus das soeu dyei las nyamoq gas Siria jens dah loq masyah yoh luiq los. Housoeh las Israel jens gas xikpheh teh vgus, nyenstap zis yah doms xauh nyeis.
6 Nghuot laus eq Israel lyis yaunos kuot nhang soeu Yeroboam dah yaunos masyah ma gang loh, houmha dvtsain suh nyeis. Gywes nyih Ashera dah gungslho eq Samari mas dvjoq shih.
7 Siria hwankti ka Israel jens lyis gukbat thanjang mas dah phvlhau teh bweh shoq mhont, gvng mas nyang ji bang oengci, jeslhyingh dvci, khyei cho loh dah jeslo dvmons mas lai las Yehoahaz mas jes yom cha eq ma bos lo.
8 Yehoahaz kuot cho nyet shih goeu yahge nyang duot cho dvnganh gas Israel Hwankti jens Sungson mha tsain lhaih toh.
9 Yehoahaz shei lha nyang lyis Samari mas nyhop. Nyah lo Yehoash ka nyah joqyos mas hwankti bweh los.
Israel Hwankti Yehoash
10 Yuda hwankti Yoash guon zis somhci nyhet vzvn lyis Yehoahaz dah lo Yeoash gas Samari mas Israel hwankti bweh los las dvci khyuk zvn guon khoq.
11 Nyang gas Yhensain dah nyoqlvtjvng mas ma gis cho kuot. Nyang gas Israel lyis Yaunos kuot nhang soeu Nebat lo Yeroboam dah yaunos dvnganh chank kuot.
12 Nyang kuot khoq zis dvnganh, Yuda hwankti Amazia lyis zan las nyang duot cho dvnganh gas Israel hwankti jens Sungson mha lhaih toh.
13 Yehoash shei lha Samari wus hwankti lop mas nyop zis xauh. Hauh thang lhyi nyah lo Yeroboam II gas nyah hwankti tank mas tsung.
Elisha Shei
14 Lvpe Elisha shei nos nos goeus. Israel hwankti Yehoash Elisha jyank mas jweh las nyah xikkhonh mas, Ngah uwus eh, ngah uwus eh, Israel dah gos zainsmuh nghuot ku soeu eh, ge ngaus.Ref 13.14: 2Hw 2.12
15 Elisha, Lyei yahge nyo tsain yoeus aq, ge nyang lyis vmingh dyei. Yehoash lyei dvba yahge nyo tsain yoeus.
16 Nyang Israel hwankti lhyi, Nvng lyei baiq das xiklyis cicont kuot aq, ge lyis nyang kuot. Elisha gas nyah loq hwankti loq thoq mas kih.
17 Elisha gas, Siria mau shot xoeu dah khomhbaiq phank aq ge lyis, nyang gas phank. Elisha gas, Baiq aq, ge. Nyang baiq kat yah dvyih lvpe ka, Nvng gas Yhensain khyuot yoeus dah nyo, Siria hwankti loq masyah khyuot yoeus nyo nghuot. Nvng gas Aphek wus mas Siria jens lyis dvnganh yoh mhont shoq zan das, ge kaiq.
18 Hauh thang lhyi Elisha gas, Nyo tsain kui las nyeisjvng mas hauh nyo yah bat aq, ge hwankti lhyi sang. Hwankti ka somh dvm bat las no.
19 Hauh gvng mas Elisha nhaiqyo las hwankti lhyi taiq zis gas, Nvng oeng dvm khyuk dvm bat chah. Housoeh lyis nvng Siria jens lyis monh shoq yoh zan das; nghuot laus eq gvshih nvng Siria lyis somh lhain yoh zan das, ge.
20 Hauh thang lhyi Elisha shei lha nyhop goeus.
Zvn yau zvn Moab jes jens Israel mau lyis los zan.
21 Israel jens dius dvyuk lyis nyhop bah ge kuot nyeis lyis Moab jes jens los yvlyis nyvng las, mvng lyis Elisha dah lop mas doeuh kat toh khoq las phang loh. Hauh mvng gas Elisha dah shohyau yah zangh tanh yah dvyih nyang kang dwis los las toq yap.
Israel, Siria jo Jeszan Pwe
22 Yehoahaz dvzaih gonh Siria hwankti Hazael gas Israel jens lyis shoeuhshih khoq.
23 Nghuot laus eq Yhensain ka nyamoq lyis nhaiqnyen shohgyo, Abraham, Isak, Yakop moq yah toh dah thanghchvp gvng mas nyamoq lyis ma mhont, nyamoq lyis pangh. Yhensain ka nyah dius jens lyis khanhamp eq ma tohnyhik.
24 Siria hwankti Hazael shei thang lhyi nyah joqyos mas nyah lo Benhadad guon.
25 Israel Hwankti Yehoash gas Benhadad lyis somh lhain zan ung lha nyah uwus Yehoahaz guon yoq lyis Benhadad zan yoeus loh dah Israel wus jens doms xauh yoeus.