11
Yuda mas Athalia
(2Ss 22:10-23:15)
1 Hwankti Ahazia dah ungwes Athalia gas nyah lo sat xauh zis nyvng seq yah dvyih, hwankti yhenbang dvnganh lyis sat das xiklyis vmingh dyei.
2 Nghuot laus eq Ahazia dah nhamhmuh (ungwes gohyuk), hwankti Yoram dah lonyi, Yehosheba gas Ahazia dah lo Yoash lyis sat das dah hwankti lo jens masyah khauh loh. Housoeh Athalia masyah luiq das xiklyis nyamoq gas nyang lyis lo yoeus soeu yah Yhenmuh yhet yvp mas shung toh, housoeh las nyang gas sat zis ma xauh.
3 Housoeh Athalia hwankti nyih hauh mau lyis guon yoq lyis hauh lo lyis Yehosheba yoeuh dyangh las Yhenmuh khau mha khyuk zan shung toh.
4 Nghuot laus eq nyhet vzvn lyis phudyei soeu Yehoiada gas hwankti gungszungh zau jens, hwankti yhen zungs bang lyis Yhensain dah Yhenmuh mas zain das zis khi nhang lha nyang kuot das ge sont toh cho nyamoq jyank masyah xihhonh cho yoeus, mau eq khi nhang. Nyang nyamoq lyis Hwankti Ahazia dah lo Yoash chixoeuq,
5 las vmingh dyei zis gas, Namoq no nyeih lyis muh wvng uhlyis namoq mas somh boms dvboms gas hwankti yhen lhyi zungh yoeuh nyeis chah,
6 dvboms gas Sur khomh mas zungh chah, dvboms gas hwankti yhen zungh bang dah nungs pheh zungh chah. Haih somh phung ka hwankti yhen lhyi zungh chah.noteHebre mas dede ma nghuot.
7 No nyeih lyis vvng bang somh boms mas aiq boms gas Yhensain dah Yhenmuh mas hwankti lyis zungh chah.
8 Kyonhkhyi loq mas chi lha hwankti Yoash lyis zungh aq. Nyang loh yvmas dvgeh loh chah. Namoq vnvm mas los bang dvnganh lyis sat chah, ge.noteHwankti nvm mas vjangh nyeis aq.
9 Housoeh las zau jens gas hau phudyei soeu Yehoiada tying toh zis dvnganh kuot. Nyamoq gas namoq dah dius no nyeih lyis yvwons yoeus vvng bang yahge no vvng bang dvnganh lyis phudyei soeu Yehoiada jyank shwih los.
10 Phudyei soeu ka hauh zau jens lyis Yhenmuh mas joq, hwankti Dawi dah lham jensnoteGohlhain thaiq lhaih zis dvkhamh mas (2Ss 23.9) lham jens; Hebre lham yahge gos jens tsain dyei,
11 las zungh bang lyis yuk khanghmuh vsainnyang loq mas kyonhkhyi chi lha hwankti yvmlhaink yah phon nvm, Yhenmuh nvm loqyos vthunk mas zis loqwi vthunk mas jweh shoq khyam nyang tsain yap nhang.
12 Nyang gas Yoash lyis shwih thuq los las nyah uhloms mas hwankti buismuk tsungh dyei las hwankti guon cho lyi maussauh dyei. Hauh thang lhyi Yoash gas coeu juot kham lha hwankti nghuot cho taiq tyo zis kham yoeus. Dius jens loq tsain tyuk las, Hwankti kang xing bas jungh, ge tsain kaiq.
13 Athalia hau zungh bang yahge dius jens dah thwe xauhgyo. Housoeh las nyang gas hauh dius jens phung nyeis dah Yhenmuh mas lvnyap los.
14 Nyang yoeuh lyis, hwankti saiq gas lyi yah dvyhangteh Yhenmuh khomh, zains yvm mas yap joq. Zau jens yahge lvbuh muot bang gas hwankti nvm mas yap joq las hauh mau mas dah dius jens gas gausyis zis yah lvbuh muot nyeis. Athalia gas chiqjyen zainsmuh xauh las nyah dyimis langchuiq las kaiq zis gas, Gomloeus toq zis dvnghuot, gomloeus toq zis dvnghuot, ge.Ref 11.14: 2Hw 23.3
15 Yehoiada jeszau jens lyis taiq zis gas, Nyang lyis yhenmuh mas ma sat nhang mes yvmvyah, nyang lyis zungh bang dah jo chank yah shwih loh geh. Nyah kang lhyi kyoeu mes soeu, hank lyis laus eq sat geh. ge.
16 Housoeh las nyamoq gas nyang lyis nyhik las hwankti yhen pheh shwih loh zis, Nyang Khomh mas sat.
Yehoiada dah Doms Soq Cho
(2Ss 23:16-21)
17 Yehoiada gas hwankti yahge dius jens gas Yhensain dah dius bweh das xiklyis Yhensain yah thanghchvp toh. Hwankti yahge dius jens jo mas eq thanghchvp toh dyei.
18 Hauh thang lhyi dius jens gas Bala yhenmuh loh tsain thyoq khyoq. Nyamoq gas gungslho eq phon eq dvnganh khyop tyamp. Bala phudyei Matan lyis eq phon jens dah xikkhonh mas sat.
Yehoiada ka Yhenmuh mas muh wons bang toeuq toh.
19 Hauh thang lhyi Yehoiada, jeszau jens, hwankti kang zungh soeu yahge hwankti yhen zungh bang khomp zis yah hwankti ka Yhenmuh masyah hwankti yhen pheh loh. Hauh thang mha mungs dius jens dvnganh chank loh. Yoash gas hwankti yhen mas Zungh Khomh chank wvng loh las hwankti tank mas tsung toh.
20 Hauh mau mas dah dius jens gauslaus. Wus eq sam joq goeus khasoeh ge lyis hwankti yhen mha Athalia lyis sat goeus.
21 Yoash gas nyang Yuda hwankti bweh los uhlyis nyhet zvn bos goeus.