15
Abiya Yuda mas Guon
(2Ss 13:1-14:1)
1 Abiya gas Israel mas Nebat lo hwankti Yeroboam guon zis dvci xet vzvn lyis Yuda hwankti bweh los.
2 Nyang gas Yerusalem mas somh zvn guon. Nyah ungwes nyings gas Abishalom dah lo Makha nghuot.
3 Abiya gas nyah uwus kuot dah yaunos dvnganh lyis chank kuot. Nyah vthyeih Dawi dah ehnyet teh ma nghuot, nyang gas Yhensain nyah Mangso dah xikkhonh mas lomluk cho ma bos.
4 Nghuot laus eq Yhensain nyah Mangso ka Dawi gvng mas nyah thang mha nyah lo lyis Yerusalem mas hwankti toh las hauh wus mas Dawi dah hwankti vkoq lyis doengs joq nhang.Ref 15.4: 1Hw 11.36
5 Khasoeh ge lyis Dawi gas Hiti dius Uria dah soe mhayah lai las dvcaiq yah Yhensain tyingtoh dang lyis domsyos gyo las Yhensain nhaiqdoeus khyvlyis kyingh kuot.Ref 15.5: 2Sa 11.1-27
6 Rehoboam yahge Yeroboam jo mas jes zan-goh cho ka tsoq las Abiya dvcaiq gonh zan-goh.
7 Abiya zwi loh cho nyet shih goeu yahge nyang kuot cho dvnganh Yuda hwankti jens mvnyei buk mas lhaih toh. Abiya yahge Yeroboam jo mas eq vjangh jes bos.
8 Abiya gas shei lha nyang lyis Dawi dah wus mas nyhop. Nyah joqyos mas nyah lo Asa guon.
Yuda mas Asa Guon
(2Ss 15:16-16:6)
9 Asa ka Yeroboam Israel hwankti kuot zis aiqci vzvn lyis Yuda hwankti bweh los.
10 Nyang gas Yerusalem mas nyeici dvzvn guon. Nyah vyos gas Abishalom dah lo Makha nghuot.
11 Asa ka nyah phauh thyeih Dawi kuot teh Yhensain dah xikkhonh mas jus khyvlyis kuot.
12 Nyang gas phvra paiq dah joqyos mas nghe phoq nghe nyhiq kuot nyeis bang lyis hauh mau masyah khat tyamp. Nyah phauh thyeih moq kuot toh dah phvra jens lyis shang tyamp.
13 Nyah vyos Makha ka vchoqh vjyot Ashera gungslho kuot yvmvyah, nyang lyis eq hwankti ungwes joqyos masyah khyoq tyamp. Asa ka hau gungslho lhyi khyauh las Kidron langhkhau mha ngheq.
14 Phvra yhen jens lyis shank shoq ma yoeus tyamp laus eq, Asa ka nyah caiq thank shoq Yhensain lhyi lomluk.
15 Nyah uwus dyei toh zisyos, nyang dyei zisyos ngwis xing kyahsoe jens lyis eq Yhensain dah Yhenmuh khau mas chi los.
16 Yuda hwankti Asa yahge Israel hwankti Basha jo mas nyah aiq yuk dah caiq gonh vjangh jes zan-goh.
17 Yuda hwankti Asa jyank thuq wvng hank ma yoh kuot bas jungh ge, Israel hwankti Basha ka Yuda mau mas loh zan las Rama wus lyis jes thoenk zan das wus kuot.
18 Hauh uhlyis Asa ka Yhensain Yhenmuh ziskwi yahge Hwankti yhen ziskwi mha nyet joq dah ngwis, xing dvnganh yoeus las, Damasku mas guon nyeis, Siria hwankti, Hezion nyeilo, Tabrimon lo Benhadad lyis loh dyei das xiklyis nyah zau jens loq mas kyauh kat las haih loeusdang tying kat.
19 Ngah uwus yahge nah uwus jo mas buisnoms joq khoq teh, ngos yahge nah jo mas buisnoms toh goh. Yoeuh aq, ngos nvng lyis ngwis yahge xing jyungshuk huon kat. Israel hwankti Basha ngah jyank masyah thuq bas jungh, nvng nyang yah toh dah buisnoms kuot cho loh thyet aq, ge.
20 Housoeh Benhadad gas hwankti Asa dah dang gyo las, nyah jeszau jens lyis Israel wus pheh nhang kat. Nyamoq gas Ijon, Dan, Abel Bet Makha joqyos, Khinaret yahge Napthali joqyos dvnganh lyis zan yoeus.
21 Basha hauh loeus xauhgyo lyis, nyang Rama wus lyis jes thoenk zan das wus kuot dah muh lyis toh khoq las Tirza pheh loh.
22 Hauh thang lhyi hwankti Asa ka Yuda mau gonh dang kyoh kat. Hank eq ma luiq, yuk khanghmuh lyis Rama mas Basha tsain toh dah luk yahge saiq lyis yoeus nhang. Hauh saiq luk yah, hwankti Asa ka Benyamin mau mas bos Geba wus yahge Mizpa wus lyis jes thoenk zan das wus kuot.
23 Asa dah muhzoh nyet shih zis, nyah yomsoq, nyang kuot cho dvnganh, nyang kuot toh wus jens cho dvnganh Yuda hwankti Sungson mha lhaih toh. Nghuot laus eq nyang mang loh lyis nyah khyei mha nos dap.
24 Hauh thang lhyi Asa ka shei lhyi Dawi dah wus hwankti lop mas nyhop zis xauh. Nyah lo Yehoshaphat gas nyah gungsthaiq hwankti xauh kuot.
Israel mas Nadab Guon
25 Yuda hwankti Asa guon dah aiq vzvn lyis Yeroboam lo Nadab gas Israel dah hwankti bweh los las aiq zvn guon.
26 Nyang gas Yhensain dah nyoqlvtjvng mas ma gis zis kuot, nyah uwus chank dah cho, Israel jens lyis yaunos kuot nhang dah silho paiq cho mha chank suh.
27 Isakha vnyau mas Ahiya dah lo Basha ka nyang lyis tyixo. Nadab yahge Israel jens dvnganh Philisti mau Gibethon wus lyis lhaink toh uhlyis Basha ka Nadab lyis sat.
28 Hauh cho ka Yuda hwankti Asa guon zis somh vzvn lyis bweh. Housoeh las Basha ka Nadab dah gungsthaiq Israel hwankti bweh los.
29 Hauh uhlyis nyang, Basha ka Yeroboam yhenbang dvnganh lyis sat. Housoeh lyis Yhensain ka Shilo wus mas dah lvpe Ahiya lyis yah Yeroboam yah sen dah dangthoengh toh zis yah dvyhangteh hwankti yhenbang dvyuk eq ma nyet lo.Ref 15.29: 1Hw 14.10
30 Khasoeh ge lyis Yeroboam gas nyang kuot dah yaunos yahge Israel jens lyis shuot nhang dah yaunos gas Yhensain, Israel dah Mangso lhyi nhaiqyo nhang.
31 Nadab dah muh nyet shih goeu dvnganh Israel hwankti Sungson mha lhaih toh ma nghuot lhyeh?
32 Asa yahge Israel hwankti Basha jo mas nyah aiq yuk caiq thank shoq jes bos.
Israel mas Basha Guon
33 Yuda hwankti Asa hwankti guon dah somh vzvn lyis Ahiya dah lo Basha gas Tirza mas Israel hwankti doq las aiqci nyei zvn guon.
34 Nghuot laus eq nyang gas Yhensain dah nyoqlvtjvng mas ma gis zis kuot las Yeroboam suh dah cho, Israel jens lyis shwih cu dah silho paiq cho lhyi tsoq las kuot loh nyeis.