8
1 Hauh shishenh lyis Yuda hwankti jens yahge xamchangh jens dah shohyau, lvpe jens dah shohyau eq, phudyei bang dah shohyau eq, gohtoeu Yerusalem mas nyeis bang dah shohyau lyis nyamoq lop masyah yoeus thuq das.
2 Hau nyamoq dah shohyau tsainh las nyhop das gungsthaiq nyeisjvng mas jenh teh joq das. Haih dius jens jyet las phuqsoe nyeis, xamgoh zis yah paiq nyeis buislom lhamhmuh, kyi jens xik mas lhap toh das.
3 Hai lhung dah dius nyau mas doeng nyeis shih bang, Ngos nyamoq lyis sanh tyamp dah joqyos mas nyeis bang gas, kang tsoq dwis nyeis das thoq lyis shei cho lhyi zes tsain ngwis das. Ngos, Maukhung Jesphung Yhensain taiq goeus, ge.
Yaunos yahge Joeng Cho
4 Yhensain ka nyah dius jens lyis taiq aq, ge ngos lyis sang. Dvyuk yuk lains lyis nyang ma toq los lo das lhyeh? Dvyuk yuk cho whang lhyi nyang ma tauh los lo das lhyeh?
5 Housoeh lyis ngah dius jens eh, namoq chamus ngah jyank masyah nungs phuk loh las khanhamp eq ma tauh los lo? Namoq gas namoq dah phvra lyis lang toh las ngah jyank mas tauh los das zis ngoek.
6 Ngos vlhomuh gyo laus eq, namoq dang jyoeng ma taiq. Namoq dvyuk eq namoq lhung cho lhyi cu goeus ge ma nghamh. Namoq hank eq, Ngos cha kuot cu goeus au? ge ma nyei. Hank eq hank nyang cho pheh, nyang gas jeszan yvmas duon wvng loh teh, dvtsoq loh nyeis.
7 Nghoq kywank yangh nyamoq tauh los das shishenh tsain seq. Khotjyauh, pilan yahge changhtvt gas nyamoq zukdyung das yoq lyis tsain seq. Nghuot laus eq ngah dius jens eh, namoq gas ngos namoq lyis guon nyeis dah lyi lyis ma seq.
8 Namoq gas ngah lyi seq las joeui bos oen khasoeh yoh sang? Yoeuh aq lom ma luk dah maussauh lhaih bang yah ngah lyi lyis thaiq tyamp.
9 Namoq dah joeui bos bang gas xoqphuh. Nyamoq gas nhunk las lhyik mas nyih. Nyamoq ngah dang lyis peq. Gvshih nyamoq chah joeui yoh?
10 Housoeh las ngos nyamoq dah mau sain das bang vsaiq lyis dyei das, nyamoq dah yhensain nyhiq jens eq gohyuk lyis dyei das. Kuh bang, ngis bang yuk khanghmuh lom ma luk khyvlyis ngwis tsain xo. Lvpe jens yahge phudyei bang yangh dius jens lyis mhuih.Ref 8.10-12: Yer 6.12-15
11 Nyamoq gas ngah dius jens dah dvm lyis dvtsiq khyet zis dvnghuot teh tsain kuot. Dvnganh ma gis mus nyeis uhlyis nyamoq gas, Dvnganh gis joq ge taiq.Ref 8.11: Ezk 13.10
12 Namoq ngah dius jens gas xoqphuh chah: khasoeh ge lyis namoq hai choqh phoh cho kuot goeus laus eq namoq ma xoq. Nyoqnho khasoeh nes das zis yangh ma seq. Housoeh las namoq gas gohyuk lains teh lains das. Ngos nyamoq lyis joeng uhlyis houka namoq dah vthang nghuot das. Ngos, Yhensain taiq goeus.
13 Ngos ngah dius jens lyis yoszwi soeu ka nyah jyo tsainh teh tsainh toh mes. Nghuot laus eq nyamoq gas, zvbiq nwis mas zvbiq shih ma dap, maiphang zains mas shih ma dap, vhuq yangh nyhauh teh dvnghuot. Housoeh las ngos nghe pheh bang lyis hauh mau los yoeus das toeuh dyei.
14 Yang chamus tsung toh, ge Mangso dah dius nyei. Los geh, yang thoenkgus jesdvp joq dah wus mas tsain phang wvng las houmha shei goh. Yhensain, yah Mangso ka yang lyis shei das xiklyis dang thang thyet goeus; yang nyang yah tyi lha yaunos kuot goeus yvmvyah nyang yang shuk das xiklyis nyonoq jeis dyei goeus.
15 Yang nyenstap cho yahge yhoh das shishenh lyis nghamhloms laus eq, hauh zis vkyuh ma bos; hauh gungsthaiq gyukphoh cho dvlos.
16 Yah jeswus gas Dan mau mas jweh nyeis goeus. Nyamoq dah nyang jens soqshe thwe xauhgyo. Nyamoq dah nyang jens nyings lyis mau gonh nvn loh. Yah jeswus gas yah mau lyis los mhont las houmha zis dvnganh, yah wus yahge houmha dius dvnganh lyis mhont das.
17 Yhensain taiq, Zungh yoeuh nyeis geh, ngos namoq mas ywimuhtsanh nhang kat. Hauh yvlyis namoq ma yoh mhauq las namoq lyis chweh das, ge.
Yeremia Dius jens lyis Kuk
18 Ngos kuk zis ma yoh huiq;
ngah nhaiqlom mas nos nyeis.
19 Gyo aq! Ngah dius jens gas dvmau gonh ngaus zis xauhgyo.
Yhensain ka Zion mha ma nyeis lo lhyeh!
Zion hwankti houmha ma nyeis lo lhyeh, ge
Yhensain nyamoq dah hwankti phuk taiq.
Namoq dah phvra lyis paiq zis yah eq,
namoq dah yhung pvjus lvbaus mangso jens lyis gop gyoh zis yah eq ngos lyis chamus nhaiqyo nhang?
20 Dius jens kaiq ngaus zis gas,
Buis gywes nyos thank goeus jyo yhomh nyos lai goeus laus eq
ngamoq khyuot yoeus zis ma xauh.
21 Ngah dius jens thungh thyi zis xauh yvmvyah
ngah nhaiqlom thungh thyi zis xauh.
Ngos kuk nyeis, ngos svsoh nghamh gyuk nyeis.
22 Gilead mau mas mvcheih ma joq lhyeh? note 8.22 Gilead: Yodan lvng buisthuq pheh joq dah janggyon nghuot las mvcheih kuot das vzains gvng mas nyings hoeuh.
Houmha mvcheih lastsiang ma nyeis lhyeh?
Houlhyi chamus ngah dius nos ma gis los?