34
Zedekia Xiklyis Loeus
1 Babilon hwankti Nebukhaneza yahge nyah jesphung ka, nyah loq khau mha wvng bang, dius nyau dius huh dvnganh bos pangh zis yah, Yerusalem yahge hauh vnvm mas dah wus jens lyis zan nyeis uhlyis, Yhensain ngos lyis taiq.Ref 34.1: 2Hw 25.1-11; 2Ss 36.17-21
2 Yhensain, Israel Mangso ka ngos lyis Yuda hwankti Zedekia lyis loh taiq aq, ge. Ngos Yhensain haih wus Babilon hwankti loq mas kyauh das las, nyang hauh yvlyis nyi ngheq tyamp das.
3 Nvng phang ma luiq das; nvng lyis nyhik las nyah loq mas kyauh das. Nah nyoqjeih yah hwankti lhyi nyvng zis yah nvng nyang yah xauh jisgoh das. Hauh thang nvng Babilon pheh xauh loh das.
4 Zedekia eh, Ngos nah cho cha taiq zis gyo aq, Nvng jes mas ma shei das.
5 Nvng nyenstap zis yah shei das las, nah xikpheh hwankti nghuot dah phauh thyeih moq nyhop lyis dius jens xangh ngheq zis yah dvyhangteh, nah nyhenshang eq xangh ngheq dyei das. Nyamoq gas nvng lyis, Ngamoq dah hwankti shei goeus ge tsain ngaus das. Ngos, Yhensain taiq goeus.
6 Hauh thang lhyi ngos Yerusalem mas Yuda hwankti Zedekia lyis haih loeus dyei.
7 Hauh shishenh lyis Babilon hwankti dah jesphung ka hauh wus lyis zan nyeis. Hau jesphung ka Lakhish, Azeka, Yuda mau mas gohtoeu nyet shih dah ciankci wus lyis eq tsain zan nyeis.
Jons jens lyis Mhuih
8 Hwankti Zedekia yahge Yerusalem mas bang luiq cho thanghchvp toh.
9 Houka nyamoq dah Hebre jons phoq jons nyhiq lyis lhuiq kat chah, housoeh hank eq Israel lyis jons khyvlyis ma gis toh.
10 Dius jens yahge nyamoq dah uhshe bang dvnganh gas nyamoq dah jons lyis lhuiq kat las khanhamp eq jons ma doms kuot lo das cho xam tsain xonh. Nyamoq eq jons tsain luiq kat goeus.
11 Nghuot laus eq thang lhyi nyamoq ehnyet doms phanh las, nyamoq lhuiq goeus bang lyis jons doms tsoengh shwih kuot.
12 Hauh thang lhyi Yhensain,
13 Israel Mangso ka ngos lyis dius jens lyis taiq nhang. Ngos namoq dah phauh thyeih moq lyis, Egutu masyah khyuot las jons duot nyeis masyah lhuiq kat uhlyis ngos nyamoq yah thanghchvp toh. Ngos nyamoq lyis taiq zis gas,
14 Nyhet zvn bos khanghmuh, khyuk zvn phuqsoe goeus dah Hebre jons hank lyis laus eq kat kat chah, oen. Nghuot laus eq namoq dah phauh thyeih moq gas ma gyo, ngos cha taiq zis ma gyo.Ref 34.14: Dyu 21.2; Lyi 15.12
15 Lai loh goeus shishenh dvtsiq gyo lyis namoq ehnyet thaiq las, ngos nhaiqdoeus khyvlyis kuot goeus. Namoq dvnganhmoq Israel dvnganh lyis lhuiq das cho xamxonh las ngos lyis paiq das joqyos Yhenmuh, ngah nyoqlvtjvng mas namoq thanghchvp tsain toh.
16 Nghuot laus eq hauh thang lhyi namoq ehnyet doms phanh zis yah ngos lyis nyoqnho ngelang khyoq. Namoq dvnganhmoq kat kat goeus dah jons jens lyis namoq o khyvlyis doms shwih las nyamoq lyis jons doms tsoengh kuot.
17 Housoeh las gvshih ngos, Yhensain taiq: Namoq ngah domsyos ma gyo, Israel jens lyis luiq cho dvnganh ma dyei. Svsoh gis goeus, ngos namoq lyis luiq cho dyei das. Houka namoq jes mas, phanghkhauq yah, yomh yah shei das. Ngos namoq lyis kuot yvlyis mungkvn mas dius nyau khanghmuh lyis gyuk dvn nhang das.
18-19 Yuda mau yahge Yerusalem wus mas dah zau jens yah dvgeh hwankti yhen mha zau jens, phudyei bang yahge uhshe bang dvnganh noeulu dvdoeu lyis aiq khyamh khyoq las hauh vjo chank yah suh lai zis yah ngos yah thanghchvp toh. Nghuot laus eq nyamoq hau thanghchvp thyoq las taiq toh zis ma chank. Housoeh las ngos nyamoq lyis nyamoq noeulu lyis kuot teh kuot das.
20 Ngos nyamoq lyis, nyamoq lyis sat mes dah jeswus loq mas kyauh las, nyamoq dah mvng lyis nghoq yahge yewus jens zo das.
21 Ngos Yuda hwankti Zedekia yahge nyah zau jens lyis eq, nyamoq lyis sat mes bang dah loq mas kyauh das. Ngos nyamoq lyis nvng lyis tyi lha zan masyah no toh dah Babilon jesphung loq mas kyauh das.
22 Ngos vmingh dyei das las, nyamoq gas hauh wus mas tauh los das. Nyamoq zan das, yoeus das, ngheq tyamp das. Ngos Yuda wus jens lyis, dius ma nyeis sihyos bweh nhang das. Ngos, Yhensain taiq goeus.