24
Maiphang shih Aiq Dang
1 Yhensain ka ngos lyis yhenmuh ganthoq mas toh dah maiphang shih aiq dang chixoeuq. Heika Babilon hwankti Nebukhaneza gas Yehoiakim lo Yuda hwankti Yehoiakhin, Yuda uhshe bang yah dvgeh ngwis shonh bang, loqmuh dap bang lyis Yerusalem masyah Babilon pheh shwih jons loh thang lhyi nghuot.Ref 24.1: 2Hw 24.12-16; 2Ss 36.10
2 Cangxeih vdang mas noq yah nyhik las gis dah maiphang shih bos. Gohtoeu dvdang mas gas, ma yoh zo lo ma gis dah maiphang shih bos.
3 Yhensain ka ngos lyis, Yeremia eh, nvng cha nyvng, ge.
Ngos toeuh zis gas, Maiphang shih nyvng, gis zis gas svsoh gis las, ma gis zis gas svsoh ma gis, ma yoh zo lo, oen.
4 Housoeh las Yhensain ngos lyis taiq.
5 Ngos Yhensain, Israel dah Mangso nghamh zis gas, Babilon pheh shwih loh zis xauh bang gas hai gis dah maiphang shih teh nghuot, ngos nyamoq lyis nhaiqbos bos kuot das.
6 Ngos nyamoq lyis zungh yoeuh las haih mau mas shwih tauh los das. Ngos nyamoq lyis ma doms thyoq khyoq lo, toeutsung das. Ngos nyamoq lyis tsungh las ma doms nuot tyamp lo.
7 Ngos nyamoq lyis, ngos Yhensain nghuot yvlyis seq mes cho dyei das. Housoeh nyamoq gas nhaiqlom dvnganh yah ngah jyank mas tauh los das yvmvyah, nyamoq gas ngah dius duot las ngos gas nyamoq Mangso duot das.
8 Yuda hwankti Zedekia, nyah zau jens, haih mau mas nyet nyeis shih dah Yerusalem wus bang, Egutu pheh dyung loh bang xiklyis, Ngos, Yhensain nyamoq lyis hau ma yoh zo lo shoq ma gis dah maiphang shih teh kuot das.
9 Ngos nyamoq thoq mas houteh dyoqbis zainsmuh she kat das las mungkvn dius nyau jens dvnganh gyuk bas jungh. Dius jens nyamoq lyis jwangh, yisnaus toeuq, goes sang, dvkhauyah nyamoq nyings gas nhoengh gus teh yhung bas jungh oen nyamoq lyis sanh tyamp.
10 Ngos nyamoq yahge nyamoq dah phauh thyeih moq lyis dyei dah mau mas dvyuk eq ma nyet lo shoq ngos nyamoq thoq mas moeng zan cho, phanghkhauq yahge yomh she kat das, ge.