21
Yerusalem Dyoq lo das
1 Yuda hwankti Zedekia gas Malkhia lo Pashur yahge Maseia lo Phudyei Zephania lyis yah ngah jyank mas sang nhang zis gas,
2 Yah xiklyis Yhensain lhyi jenh jis aq, khasoeh ge lyis Babilon hwankti Nebukhaneza yahge nyah jesphung ka wus lyis los lhaink toh. Yhensain ka Nebukhaneza lyis yah jyank masyah tauh loh das xiklyis yah nyhenshang nyah yomsoq muh dvkoeuq koeuq kuot dyei das mvbeh, ge.Ref 21.2: 2Hw 25.1-11; 2Ss 36.17-21
3 Hauh uhlyis Yhensain ngos lyis taiq las ngos ngah jyank mas nhang jweh los bang lyis taiq zis gas,
4 Yhensain, Israel dah Mangso Zedekia lyis heisoeh ge oen taiq geh. Zedekia eh, Babilon hwankti yahge nyah jesphung lhyi tyi lha zan nyeis dah nah jesphung lhyi ngos somh nhang das. Ngos nah jeslo jens dah kyonhkhyi lhyi wus dah vgungs mas boms toh das.
5 Ngos namoq lyis tyi lha ngah yom dvnganh yah, nhaiqyo zis, nhaiqlom phot phot tsoeu zis yah zan das.
6 Ngos haih wus mas nyeis bang yuk khanghmuh lyis sat das. Dius eq, gaunyhauq eq dvyhangteh gyukphoh noslom yah shei das.
7 Nghuot laus eq nah xiklyis gas nah zau jens, jes masyah, phanghkhauq masyah, yomh masyah doeng los bang lyis, namoq lyis sat mes bang, namoq dah jeswus Babilon hwankti Nebukhaneza lyis yah los nyhik loh nhang das. Nebukhaneza namoq lyis sat das. Nyang gas namoq hank lyis eq ma nyhet toh lo, hank lyis eq nhaiqnyen cho ma chixoeuq lo das. Ngos, Yhensain taiq goeus, ge.
8 Hauh thang lhyi Yhensain ngos lyis dius jens lyis taiq nhang. Gyo geh! Ngos Yhensain namoq lyis khyen nhang zis gas, kang dwis cho pheh shwih cho yahge shei cho pheh shwih cho mhayah tsain nghuot.
9 Hauh wus mas nyeis soeu hank laus eq jes mas shei, phanghkhauq yah shei, yomh yah shei das. Nghuot laus eq wus nghe pheh thuq las hau zan nyeis dah Babilon jyank mas kyauh soeu ka sat zis ma xauh, nyamoq kang luiq das.
10 Ngos haih wus lyis ma lhuiq toh, mhont das zis nghamh thyet goeus. Hauh zis ngos Babilon hwankti lhyi dyei das las nyang gas hauh zis ngheq tyamp das. Ngos Yhensain taiq goeus.
Yuda hwankti Yhenbang
11-12 Yhensain ka ngos lyis Dawi dah vnyau vshih Yuda hwankti yhenbang lyis haih loeus dyei aq, ge. Ngos, Yhensain cha taiq nyeis zis gyo geh. Nyeih yau nyeih lyi jus cho bweh nyeis zis lyis yoeuh geh. Mhuih soeu yah nyang lyis mhuih zis xauh soeu lhyi gos dyei geh. Nvng ma kuot lyis gas, nvng kuot dah ma gis cho ka ngah nhaiqyo cho lhyi nyi ngeh nhang lha houka ma yoh sat lo das.
13 Yerusalem nvng gas Janggyon thoq mas zes joq dah luk teh, langhkhau dah thoq mas nyhang nyhang joq. Nghuot laus eq ngos nvng lyis tyi lha zan das. Nvng taiq lyis nvng lyis hank eq ma yoh zan das, hau goeng dah wus mas hank ma yoh los das, ge.
14 Nghuot laus eq ngos namoq lyis namoq kuot goeus cho mha namoq lyis joeng das. Ngos namoq dah hwankti yhen lhyi nyi ngheq das las houka hauh vyvm vwi dvnganh ngeh tyamp das. Ngos, Yhensain taiq goeus, ge.