YEREMIA SAUHBUK
(JEREMIAH)
Yeremia buk lyis o mha khyvlyis yoh gvn: (1) Yeremia lyis lui cho; (2) Yuda dius nyau jens, nyamoq dah guon bang: Yosia, Yehoiakim, Yehoiakhin yahge Zedekia moq zaih lyis Mangso jyank mas loeus; (3) Yeremia kang dwis yoq lyis pe cho vja ja, yhaugyen dah bweh cho bos, Yeremia dah muhsain Baruk cho comh yvmas dah cho jens; (4) Gohnyau bang cho Yhensain jyank mas dah nyoqnyvng; (5) Yerusalem gyoh das cho, Babilon pheh jonsdoeus das cho chixoeuq dah sungson vthang.
Yeremia gas ehnyet nhuk soeu nghuot. Nyang gas nyah dius lyis svsoh jyetdap las, nyamoq thoq mas soetuon cho ma mes bweh nhang. Mangso ka nyang lyis lvpe pe das zis khi yvmvyah, nyang xauh kham cho, ehnyet mas zangh cho taiq thuq yvlyis jyomp dang mas yoh nyvng. Mangso dang gas nyah ehnyet mas nyi soeh ngeh las hauh yvlyis ma yoh tsomh toh.
Haih buk mas Yeremia dah yaukyenh shanghsenh cho shishenh lyis lai las thanghchvp vsaiq yoh das shishenh lyis tuonh xoeuq dah dangzains tsain bos. Hau thanghchvp saiq lyis chank das xiklyis Mangso dah dius nyau lyis ma taiq kyingh noh: khasoeh ge lyis, hauh thanghchvp gas nyamoq dah nhaiqlom mas lhaih toh goeus.
1
Yeremia
1 Haih buk gas Benyamin mau Anathot wus mas dah phudyei bang mas dvyuk nghuot dah Hilkia lo Yeremia taiq dah dang cho nghuot.
2 Amon lo Yosia Yuda hwankti bweh zis dvci somh vzvn lyis Yhensain ka Yeremia lyis jis.Ref 1.2: 2Hw 22.3—23.27; 2Ss 34.8—35.19
3 Yosia lo Yehoiakim hwankti kuot uhlyis eq nyang lyis doms jis. Hauh thang lhyi Yosia lo Zedekia guon zis dvci das vzvn jweh shoq Yhensain ka Yeremia lyis nyoshoq lhain jis. Hauh zvn lhamhmuh oeng vkhyvp lyis Yerusalem mas bang lyis shwih jons loh.Ref 1.3: 2Hw 23.36—24.7, 18—25.21; 2Ss 36.5-8, 11.21
Yeremia lyis Khi
4 Yhensain ngos lyis taiq zis gas,
5 Ngos nvng lyis kang ma dyei shih lyis yah ngos nvng lyis khyen goeus. Nvng ma khoeu los shih lyis yah dius nyau jens xiklyis lvpe kuot das zis ngos nvng lyis khyen toh goeus.
6 Ngos phuk taiq, Yomzains Yhensain eh, ngos dang khasoeh taiq das zis ma seq, ngos svsoh ngis shih, oen.
7 Nghuot laus eq Yhensain ngos lyis taiq, Nvng svsoh ngis shih oen vsang, ngos nvng lyis nhang kat dah dius jens jyank mas loh aq, ngos nvng lyis taiq nhang zis dvnganh nyamoq lyis taiq kyoh aq.
8 Ngos nvng yah nghuot das, nvng lyis gos das las nyamoq lyis vgyuk. Ngos Yhensain taiq goeus.
9 Hauh thang lhyi Yhensain ka jweh zis yah ngah nhuotkuk lyis tanh las taiq, Gyo aq, nvng taiq chah dang ngos nvng lyis dyei nyeis.
10 Khvnyhik ngos nvng lyis dius nyau jens yahge munghdan jens thoq mas yoeuh das toeuh dyei toh. Khuot las thyoq khyoq das, mhont las thyoqpi das, tsuk las tsungh toh das.
Nyoqnyvng Aiq Koeuq
11 Yhensain ngos lyis nyei, Yeremia eh, nvng cha nyvng, ge. Ngos toeuh zis gas, Batan ko lhyi nyvng, oen.
12 Yhensain taiq, Nvng nyvng cho jus, ngos ngah dang nyuk los yvlyis nyvng das zis zungh yoeuh nyeis, ge.
13 Hauh thang lhyi Yhensain ngos lyis doms taiq zis gas, Nvng cha nyvng shih, ge nyei.
Ngos phuk taiq zis gas, mautsung pheh tsoeu nyeis dah auh dvlom nyvng, hauh zis gas heipheh xoeu toh, oen.
14 Nyang ngos lyis taiq, Dyoqbis cho ka mautsung pheh yah hai mau mas nyeis bang dvnganh thoq mas tsoeu gyuon das.
15 Khasoeh ge lyis ngos mautsung pheh dah dius nyau jens dvnganh lyis los das xiklyis khi nyeis. Nyamoq dah hwankti jens gas nyamoq dah hwankti tank lyis Yerusalem wus khomh mas eq, nyah wusciank yvmlhaink yah eq, Yuda wus jens yvmlhaink mas eq toh das.
16 Ngah dius jens yaunos kuot goeus yvmvyah ngos nyamoq lyis joeng das. Nyamoq ngos lyis tyamp las gohtoeu mangso lyis phudyei, phvra kuot las tsain paiq.
17 Yeremia eh, cicont kuot las, ngos nvng lyis taiq nhang zis dvnganh nyamoq lyis loh taiq aq. Gvshih nyamoq lyis vgyuk, ma nghuot lyis nvng nyamoq yah nyeis lyis hauh thoq lyis zes gyuk nhang das.
18-19 Yeremia eh, gyo aq. Haih mau mas bang yuk khanghmuh - Yuda hwankti jens, zau jens, phudyei bang, dius jens nvng lyis tsain tyi das. Nghuot laus eq nyamoq lyis yoh thoenk kham das yom khvnyhik ngos nvng lyis dyei nyeis. Nvng gas thoenkgus jesdvp bos wus teh, thyeq zains teh, thunk ciank teh nghuot das. Nyamoq nvng lyis ma ung das: khasoeh ge lyis nvng lyis gos das zis ngos nvng yah dvgeh nghuot das. Ngos Yhensain taiq goeus.