YOHAN
LHAIH, YESU DAH GAUSYIS DANG
(JOHN)
Yesu gas Mangso dah vcaiq vto Dang nghuot ge cho taiq phui kyoh thang lhyi Gausyis dang dah cangxeih vdoeus gas Yesu gas Mangso dah Lo, dangthoengh toh Khyuot yoeus soeu nghuot ge cho chixoeuq dah Yomsoq muh nyoshoq ja lyis lhaih toh. Hauh thang lhyi yomsoq muh chixoeuq cho lhyi taiq phui dah xamgoh cho lhyi lhaih toh. Haih vdoeus mas dius dvyhamh Yesu lyis khasoeh lomsjingh los zis yahge Nyah changlo bweh los yoq lyis, dvyhamh gas Yesu lyis tyi lha ma lomsjingh. Sonzoh 13-17 mas Yesu nyang nyhik xauh das nyens lyis nyah changlo jens yah thang thank zomh goh cho bos, Nyang tapzains mas shei kham das nyenhthang lyis nyamoq mas bweh das cho taiq kyoh cho, yomdyei dang bos. Sonzoh 18-21 mas Yesu lyis nyhik zis yahge soetuon cho, Tapzains mas tap lhangh cho yahge dwis toq cho lhaih toh.
Sonzoh 8:1-11 mas nyishuot lvngshuot dah vmesbih cho lhyi vkhomp khau mha kat toh. Khasoeh ge lyis cangxeih loq yah lhaih toh dah maussauh nyoshoq yahge cangxeih thaiq lhaih dah maussauh gas haih cho lhyi nyhet toh. Gohtoeu mas gas gohyos loh kat lhaih toh.
Yohan gas, Yesu lyis cho, jyoeng zis yahge kang nghuot ge, lomsjingh bang gas Khristu jyank masyah vcaiq vto kang jyungshuk gvshih nyang yoh ge cho lhyi vgungs toh. Yohan lhaih gausyis dang dah senhtyau cho ka nyeihyau kang dwis cho mha hank eq seq dah jeis, ohlhyoq, bvng zis, yvng yoeuh soeu yahge nyah yvng, zvbiq nwis yahge nyah vshih teh zis lyis yhung lha dyos dah jyoeng cho lhyi Yesu jyauh, ge.
1
Kang Dang
1 Cangxeih lyis Dang bos: hauh Dang gas Mangso yah nghuot las Dang gas Mangso nghuot.
2 Nyang gas cangxeih lyis yah Mangso yah nghuot.
3 Vyhang dvnganh zis lyis nyang yah kuot toh. Kuot toh yvmas, nyang ma bos bos kuot zis dvkoeuq eq ma bos.
4 Nyang mas kang bos, hauh kang ka dius jens dah bvng zis nghuot.
5 Hau bvng zis gas chuot yvlyis pank dyei; chuot zis gas bvng zis lyis ma duot.
6 Mangso jyank masyah nhang kat dah dius dvyuk bos: nyah nyings gas Yohan nghuot.Ref 1.6: Mat 3.1; Mak 1.4; Luk 3.1-2
7 Kanghjyoeng kat das nyhenshang nyang los zis gas bvng zis yah sen lha nyang kanghjyoeng kat lyis, nyang masyah dius dvnganhmoq yoh lomsjingh bas jungh ge zis nghuot.
8 Nyang gas hauh bvng zis ma nghuot, bvng zis lyis kanghjyoeng kat das xiklyis dvlos.
9 Hau jyoeng dah bvng zis gas mungkvn mas los nyeis dah dius yuk khanghmuh lyis pank dyei.
10 Hauh soeu ka haih mungkvn mas nyeis khoq: haih mungkvn lyis eq nyang yah kuot toh goeus; nghuot laus eq mungkvn gas nyang lyis ma seq kat.
11 Nyang gas nyah vnyau jyank mas jweh nyeis laus eq, nyah vnyau gas nyang lyis ma tsain lhom yoeus.
12 Nghuot laus eq nyang lyis lhom ya lhom yoeus bang ge, nyah nyings lyis lomsjingh bang lyis Mangso dah lo jens duot das dah yomsoq dyei goeus.
13 Hauh bang lyis khoeu kat toh zis gas, suih masyah eq ma nghuot, gungsshoh ehnyet masyah eq ma nghuot, dius ehnyet khyvlyis eq ma nghuot, Mangso mhayah dvnghuot.
14 Dang gas suihshoh lyih duot las yah jyank mas nyeis ku. Yang nyvng dah nyah phunk gas Uwus dah Loteh phunk nghuot las, jyoeng zis yahge jyehjuh yah dyingh joq.
15 Yohan gas nyah cho lhyi kanghjyoeng kat las kaiq taiq zis gas, Ngah thang mha los soeu ka ngah xik lyis yah nhaiqdoeus zis xauh soeu nghuot, oen ngos taiq soeu ka haih soeu nghuot. Khasoeh ge lyis nyang gas ngah xik lyis yah nyeis goeus, ge.
16 Yang dvnganhmoq gas dyingh joq dah nyah jyehjuh lyis dvsoenk thang lhyi dvsoenk xauh kham yoeus.
17 Khasoeh ge lyis, Lyi gas Moshe yah dyei khoq; nghuot laus eq jyehjuh yahge jyoeng cho ka, Yesu Khristu masyah los zis nghuot.
18 Mangso lhyi hank khanhamp eq ma nyvng yoeuh ku: nghuot laus eq Uwus sainhkhonh mas nyeis dah Loteh gas nyah cho lhyi taiq hoeuh goeus.
Jeisnyhop Yohan Loeus
(Mat 3:1-12; Mak 1:1-8; Luk 3:1-18)
19 Yerusalem mas dah Yuda jens gas phudyei bang yahge Lewi jens lyis Yohan jyank mas nhang lha, Nvng hank nghuot lah, ge nyei uhlyis Yohan kanghjyoeng kat las,
20 Nyang rhen cho ka, Ngos gas Khristu ma nghuot, ge.
21 Hauh bang nyang lyis nyei zis gas, Housoeh lyis nvng Eliya nghuot lhyeh, ge lyis,Ref 1.21: Lyi 18.15, 18; Mal 4.5
Ma nghuot, ge.
Lvpenote 1.21 Nghamhloms toh soeu thuq los las Meshia jweh los das cho taiq hoeuh soeu nghuot lhyeh, ge lyis eq,
Ma nghuot, ge.
22 Hauh bang eq, Nvng hank nghuot lah? Ngamoq lyis nhang kat bang lyis doms taiq das dang bos shoq, nah gungs lyis nvnyang khasoeh oen zis taiq kyoh aq ge lyis,
23 Nyang taiq zis gas, Ngos gas lvpe Esaia taiq toh zis yah dvyhangteh,Ref 1.23: Esa 40.3 (LXX)
Yhensain dah cho lhyi dan nhang geh ge
mhanhdyvp mas dvyuk kaiq nyeis dah thwe nghuot.
24 Pharishe jens gas nyamoq mas bang lyis nhang kat las,
25 Nyamoq nyang lyis taiq zis gas, Nvng gas Khristu eq ma nghuot, Eliya eq ma nghuot, lvpe eq ma nghuot lyis gas chamus jeisnyhop dyei lah, ge.
26 Yohan nyamoq lyis phuk taiq zis gas, Ngos gas jeis mas jeisnyhop dyei. Nghuot laus eq namoq vgungs mas yap joq, namoq ma seq soeu ka,
27 ngah thang mha dvlos laus eq ngah thoq lyis zes las, ngos gas hauh soeu dah thyvkoq twih phui dyei das zis yangh ma mon, ge.
28 Hauh cho bweh dah joqyos gas, Yodan lvng thyitvp, Bethani wukhau, Yohan jeisnyhop dyei dah yvmas nghuot.
Mangso dah Yvnglo
29 Hauh thang lhyi nyeihyo Yohan gas, Yesu nyah jyank mas los nyeis yvlyis nyvng las taiq zis gas, Yoeuh aq, haih mungkvn mas yaunos lyis wons tyamp das, Mangso dah Yvnglo!
30 Ngah thang mha los soeu ka ngah xik lyis yah nhaiqdoeus zis xauh soeu nghuot oen ngos taiq toh soeu ka haih soeu nghuot. Khasoeh ge lyis nyang gas ngah xik lyis yah nyeis goeus.
31 Ngos gas nyang lyis ma seq, nghuot laus eq ngos jweh los las jeisnyhop dyei zis gas, nyang lyis Israel xikkhonh mas chixoeuq das zis nghuot.
32 Yohan kanghjyoeng kat zis gas, Dyos gas maukhung mhayah khotjyauh teh gyoh los las, hauh soeu thoq mas lyih no zis lyis ngos nyvng goeus.
33 Haih soeu hank nghuot zis lyis ngos ma seq, nghuot laus eq, jeis mas jeisnyhop dyei das xiklyis ngos lyis nhang kat soeu nyang taiq zis gas, Dyos dvyuk dah thoq mas lyih gyoh no joq yvlyis nvng nyvng das, hauh soeu ka Gyingshang Dyos mas jeisnyhop dyei soeu nyang nghuot, ge.
34 Ngos nyvng goeus las, Haih soeu ka Mangso dah Lo nghuot oen kanghjyoeng kat, ge.
Yesu Cangxeih Changlo jens
35 Hauh thang lhyi nyeihyo Yohan gas nyah changlo aiq yuk yah dvgeh yap joq lyis,
36 Yesu los nyeis zis lyis yoeuh las nyang taiq zis gas, Yoeuh aq, Mangso dah Yvnglo, ge.
37 Hauh dang lyis hauh changlo aiq yuk xauhgyo lyis, Yesu thang mha tsain chank loh.
38 Yesu lhain yoeuh kat lyis, hauh dius aiq yuk chank los zis nyvng las, Cha xo goh lah, ge nyei.
Nyah aiq yuk gas, Svra eh, nvng khamha nyeis lah, ge nyei.
39 Nyang nyah aiq yuk lyis taiq zis gas, Los yoeuh geh nyvng das, ge. Houka nyei shishenh ko lhyi nghuot. Nyang khamha nyeis zis loh nyvng las, hauh nyeihyo nyang yah dvgeh nyeis.
40 Yohan taiq dang xauhgyo las, nyah thang chank dah dius aiq yuk mas dvyuk gas Simon Petru dah vnoeuh Andre nghuot.
41 Hauh soeu ka nyah vmang Simon lyis shih xauhgoh las nyang lyis taiq zis gas, Ngamoq Meshia lyis nyvng goeus, ge. (Meshia vjyuk gas Khristu nghuot.)
42 Nyang lyis nyah jyank mas shwih e.
Yesu hauh soeu lhyi yoeuh las taiq zis gas, Nvng gas Yona dah lo Simon nghuot. Nvng lyis gas Kepha ge lui das, ge. (Hauh vjyuk gas lukzains, ge.)
Philip, Nathaniel lyis Lui
43 Hauh thang lhyi nyeihyo Yesu gas Galile mau pheh loh uhlyis nyang Philip lyis nyvng lho lhyi, Ngah thang mha chank los aq, ge taiq.
44 Philip gas Andre yahge Petru dah wukhau, Betsaida mas soeu nghuot.
45 Philip gas Nathaniel yah xauhgoh las nyang lyis taiq zis gas, Moshe dah lyi yahge lvpe jens lhaih toh, Yosep dah lo Nazaret Yesu lyis ngamoq nyvng goeus, ge.
46 Nathaniel nyang lyis taiq zis gas, Nazaret masyah gis zis dvja ja yoh thuq los lhyeh, ge.
Philip gas, Los yoeuh aq, ge.
47 Yesu gas Nathaniel los nyeis zis lyis nyvng lyis, nyang lyis toeuq las taiq zis gas, Yoeuh aq Israel gyingh soeu dvyuk nghuot las nyang mas ung lhung zis ma bos, ge.
48 Nathaniel gas nyang lyis, Nvng ngos lyis khalhye yah seq lah, ge nyei.
Yesu doms taiq zis gas, Philip nvng lyis ma lui shih shvhoeu lhyi nvng maiphang zains khyei mha nyeis zis lyis ngos nyvng, ge.
49 Nathaniel nyang lyis phuk taiq zis gas, Svra eh, nvng gas Mangso dah Lo nghuot; Israel dah Hwankti nghuot, ge.
50 Yesu nyang lyis taiq zis gas, ngos nvng lyis maiphang zains khyei mha nyvng oen yvmvyah lomsjingh lhyeh? Haih thoq lyis zes kuh zis eq nvng nyvng das, ge.
51 Ngos namoq lyis jyoengh taiq bah, vkhoeuq maukhung khomh phank los las Mangso dah loeuswons bang gas cangsoeu Lo thoq mas doq gyoh kuot nyeis zis lyis namoq nyvng das, ge taiq.Ref 1.51: Vpm 28.12