21
Benyamin Vkoq xiklyis
1 Israel jens Mizpa wus mha huom uhlyis nyamoq Yhensain lhyi dangthoengh tsain toh. Ngamoq hank eq Benyamin lyis lonyi dyeizo das toeuh ma dyei, ge.
2 Housoeh las gvshih Israel jens Bethel pheh loh. Dius jens gas Mangso dah xikkhonh mas nyenhthang jweh shoq houmha tsung toh. Nyamoq kuk zis yah tsain kaiq ngaus.
3 Yhensain, Israel dah Mangso eh, chamus haih zis bweh nhang? Chamus Israel masyah Benyamin vkoq dyuk loh bah ge lah?
4 Nungsnvp noq yah dius jens gas houmha phon toq ci lha nyenstap jyungshuk phudyei, doeu gonh ngheq phudyei.
5 Nyamoq nyei zis gas, Israel vkoq dvnganh mas Mizpa wus Yhensain xikkhonh mas ma los huom dah vkoq khah zis nghuot lah?note 21.5 Nyamoq Mizpa mha ma los soeu lyis sat das ge maukhi toh goeus
6 Israel jens gas nyamoq vnoeuh Benyamin xiklyis auhuiq las taiq zis gas, Khvnyhik Israel mas dvkoq dyuk loh goeus, ge.
7 Yang gas yah lonyi jens nyamoq lyis ma dyeizo das oen Yhensain lhyi maukhi goeus yvmvyah, nyet shih dah Benyamin yukgis jens xiklyis yhensain nyhiq jens yoeus dyei das xiklyis yang khasoeh kuot das lah, ge.
8 Israel mas Mizpa wus, Yhensain xikkhonh mas ma los huom soeu hank, ge nyei lyis, Gilead mau Yabesh wus mas bang hank eq ma los zis seq.
9 Khasoeh ge lyis jesphung mha dius nyings lui lyis, Yabesh mas bang hank eq ma toeuh.
10 Housoeh las huom nyeis bang gas womh thank bang dvmons aiq khyoengh lyis nhang lha taiq zis gas, Namoq Gilead mau Yabesh wus bang yuk khanghmuh lyis vmesbih, loshang jens eq cheq sat geh.
11 Vbusbih dvnganh, lonyi gyingh ma nghuot dah vmesbih dvnganh lyis sat geh, ge.
12 Nyamoq gas Yabesh wus bang mas lonyi gyingh nyeixo nyvng. Housoeh las nyamoq lyis Khanan mau mas joq dah Shilo thoenggus mas tsain shwih los.
13 Tsai moq huom gonh gas Rimon Luk-uk mas nyeis dah Benyamin jens lyis jes ma bos lo moeng dvm goeus cho kyoh kat.
14 Hauh uhlyis Benyamin jens tauh los. Gohtoeu Israel jens gas Yabesh wus mas nyamoq ma sat dah nyelo jens lyis dyeizo. Nghuot laus eq nyamoq xiklyis ma ngap.
15 Yhensain ka Israel vkoq jens dvdain dvlom lyis lhoeu thyoq goeus yvmvyah nyamoq Benyamin xiklyis auhuiq.
16 Housoeh moq huom mha dah uhshe bang taiq zis gas, Benyamin vkoq mas vmesbih jens ma nyeis lo. Nyet shih dah yukgis jens lyis yhensain nyhiq dyei das xiklyis yang khasoeh kuot das lah, ge.
17 Israel jens dvci aiq koq mas dvkoq ma gis dyuk. Benyamin vkoq doeng los das nyhenshang yang cho xo chah.
18 Nghuot laus eq yah lonyi nyamoq lyis ma gis dyeizo: khasoeh ge lyis yang dvyuk yuk Benyamin lyis lonyi dyeizo soeu ka nhoengh zis xauh bas jungh, oen nhoengh toh goeus, ge.
19 Hauh thang lhyi nyamoq nghamh zis gas, Shilo mas zvn yau zvn kuot dah Yhensain pwe jweh ni los goeus.note 21.19 Shilo gas Bethel mautsung pheh, Lebona dah mautyi pheh, Bethel yahge Shekhem jo cho dah buisthuq pheh joq.
20 Nyamoq Benyamin jens lyis taiq zis gas, Zvbiq khyam mha loh tamh las,
21 zungh nyeis geh. Shilo wus mas dah nyelo jens pwe gyo lyis goh das ge thuq los lyis, namoq zvbiq khyam mhayah thuq los geh. Hank eq hank hau nyelo jens masyah yhensain nyhiq nyhik yoeus las Benyamin mau pheh shwih loh geh.
22 Nyamoq dah uwus moq, nghuot ya vmang vnoeuh moq namoq jyank mas los kyoq lyis, namoq gas, Ngamoq lyis jenh yoeus toh nhang geh jeszan gyo lyis ngamoq nyi ma yoeus. Namoq dyei zis ma nghuot yvmvyah namoq maukhi toh zis thyoq dah yobos ma bos, oen yoh taiq das.
23 Benyamin jens eq housoeh kuot las Shilo wus mas los goh xoeuq bang lyis hank eq hank yhensain nyhiq khyen shwih loh. Hauh thang lhyi nyamoq nyang mau pheh loh. Houmha nyamoq nyang wus lyis doms soq kuot las nyeis.
24 Hauh shishenh lyis nyet shih dah Israel yuk khanghmuh eq nyah vkoq, nyah yhenbang jyank mas, nyah vso mau pheh tauh loh.
25 Hauh zaih lyis Israel mas hwankti ma bos. Hank eq hank nhaiqdoeus khyvlyis dvkuot.Ref 21.25: Soe 17.6