11
1 Gilead mas dah womh dah jeslo Yeptha ka nghe nyhiq dah lo nghuot. Nyah uwus Gilead mas,
2 nyah yhensain nyhiq khoeu dyei dah loloeu jens bos. Nyamoq bes los lyis Yeptha lhyi, Nvng gas gohtoeu vmesbih dah lo nghuot las ngamoq uwus dah vso cha eq ma xauh das ge taiq las yhen mhayah khat thuq.
3 Yeptha eq nyah vmang vnoeuh moq masyah phang lha Tob mau mas nyeis. Dius lamh jens nyah jyank mas lyih zop las nyang yah dvgeh loh.
4 Dvyoq lai thang lhyi Amon lo jens gas Israel jens lyis jes loh zan.
5 Haih zis bweh lyis Gilead mas dah uhshe bang gas Yeptha lhyi Tob masyah doms shwih das ge, loh.
6 Nyamoq Yeptha lhyi taiq, Ngamoq lyis uh los she dyei aq. Housoeh lyis yang Amon lyis yoh zan das, ge.
7 Yeptha toeuh zis gas, Namoq ngos lyis hoeng lha ngos lyis ngah uwus yhen mhayah khat tyamp. Gvshih yaukyenh los lyis chamus ngah jyank mas los goh lah, ge.
8 Nyamoq Yeptha lhyi taiq zis gas, Gvshih ngamoq nah jyank mas doms los. Nvng ngamoq yah loh las Amon jens lyis zan-goh. Housoeh nvng gas Gilead bang dvnganh dah uhshe soeu kuot nhang mes, ge.
9 Yeptha nyamoq lyis taiq zis gas, Amon jens lyis zan das xiklyis namoq ngos lyis yhen pheh doms shwih las, Yhensain yah nyamoq lyis ung nhang lhyi ngos namoq dah guon soeu duot das, ge.
10 Nyamoq phuk taiq zis gas, Ngamoq xamxonh, Yhensain ka yah kanghjyoeng nghuot, ge.
11 Housoeh las Yeptha ka Gilead uhshe bang yah loh las dius jens gas nyang lyis uhshe soeu yahge guon soeu tsain kuot. Housoeh Yeptha ka Mizpa, Yhensain xikkhonh mas nyah dang dvnganh doms taiq toh.
12 Hauh thang lhyi Yeptha ka Amon jens dah hwankti jyank mas loeuskyoh bang nhang lha taiq kat zis gas, Nvng chamus ngah mau mas nyhenh wvng los? Nvng Israel yah chah soe bos, ge.
13 Amon hwankti Yeptha dah loeuskyoh bang lyis phuk taiq zis gas, Israel jens Egutu masyah doq los uhlyis ngah maunyeis lyis Arnon lvng masyah Yabok lvng, Yodan lvng jweh shoq yoeus loh. Gvshih nyens nyens tap tap doms dyei aq, ge.
14 Yeptha ka Amon hwankti jyank loeuskyoh bang doms nhang kat.
15 Yeptha dang phuk kat zis gas, Israel jens Moab maunyeis, Amon maunyeis yoeus loh ge zis ma jus.
16 Haih zis gas hau bweh cho nghuot. Israel jens Egutu masyah doq los yoq lyis mhanhdyvp cho, Thomh Nes lai las Kadesh mas jweh loh.
17 Hauh thang lhyi nyamoq Edom hwankti jyank mas loeuskyoh bang lyis yah, Ngos nah mau cho jenh suh lai bah, ge sang nhang laus eq Edom hwankti ma gyo. Moab hwankti lhyi sang nhang laus eq hank eq nyah mau cho ma suh lai nhang. Housoeh las Israel jens Kadesh mas nyeis.Ref 11.17: Gyu 20.14-21
18 Hauh thang lhyi mhanhdyvp cho, Edom yahge Moab mau lyis suh lhain las Moab mau dah buisthuq shot, Arnon lvng thyitvp mas jweh loh. Nyamoq houmha dvp thoeng, nghuot laus eq hauh Arnon lvng gas Moab mau dah maukyo nghuot joq yvmvyah houmha ma goeu.Ref 11.18: Gyu 21.4
19 Tsai, Israel jens gas, Heshbon mas dah Amori hwankti Sihon jyank loeuskyoh bang nhang lha, Ngamoq lyis nah mau cho jenh suh lai loh nhang aq, ge dung.Ref 11.19-22: Gyu 21.21-24
20 Nghuot laus eq Sihon ka ma lai nhang. Nyang nyah jes dvphung gonh shwih, Yahaz mha thoeng zis yah Israel jens lyis zan.
21 Nghuot laus eq Yhensain, Israel dah Mangso ka Israel jens lyis Sihon yahge nyah jesphung thoq mas ung nhang. Housoeh Israel jens gas hauh mau mas nyeis, Amori jens sain dah maunyeis dvnganh sain yoeus.
22 Nyamoq gas Amori mau gonh, mautyi pheh Arnon lvng mas zis mautsung pheh Yabok lvng jweh shoq, Buisthuq pheh mhanhdyvp mas zis buiswvng pheh Yodan lvng jweh shoq loh nyeis.
23 Housoeh houka Yhensain, Israel dah Mangso ka nyah dius Israel jens xiklyis Amori jens lyis khat tyamp zis dvnghuot.
24 Nvng hauh zis doms yoeus das zis yomkat lhyeh? Nvng lyis nah mangso Khemosh dyei yvlyis yoh zwi toh. Ngamoq eq Yhensain, ngamoq dah Mangso ngamoq lyis yoeus dyei yvlyis zwi toh das.
25 Nvng gas Moab hwankti, Zipo lo Balak thoq lyis zes gis oen nghamh lhyeh? Nyang Israel lyis khanhamp eq loqyom ma tyonh ku, vnghuot lah? Nyang ngamoq yah zan-goh ku lah?Ref 11.25: Gyu 22.1-6
26 Israel jens Heshbon yahge Aroer, vyvm vwi wugungs jens yahge Arnon lvng yvm chank yah dah wugungs jens mas los wvng nyeis zis somhxo zvn bos goeus. Hauh yoq lyis chamus ma doms yoeus goh?
27 Ngos nvng lyis cha ma kuot cu. Nvng ngos lyis los zan zis shuot. Yhensain ka Soetuon soeu nghuot. Nyang khvnyhik Israel yahge Amon jens jo mas dang thang thyet das, ge.
28 Nghuot laus eq Amon hwankti ka Yeptha tying kat dang lyis ma gyo dyei.
Yeptha Nyhen Toh
29 Hauh thang lhyi Yhensain dah Dyos Yeptha thoq mas jweh los. Nyang gas Gilead mau, Manase mau pheh loh khoq las, Gilead mau Mizpa pheh tauh los las Amon pheh loh.
30 Yeptha Yhensain lhyi nyhen toh zis gas, Nvng ngos lyis Amon jens thoq mas ung cho yoh nhang lyis,
31 ngos nvng lyis jyungshuk ngheq dyei das. Houka ngos ung cho mhayah yhen pheh tauh los uhlyis, ngos lyis zes das ge yhen masyah cangxeih thuq los langh zis cha nghuot laus eq Yhensain lhyi lomhxangh khyvlyis dyei das, ge.
32 Housoeh Yeptha ka jeislvng goeu las Amon jens lyis zan. Yhensain eq nyang lyis ung cho dyei.
33 Nyang gas Aroer masyah Minit vyvm vwi, Abel Keramim mas jweh shoq, dvnganh lyis wus aiqci lhyi zan yoeus. Houmha dius nyoshoq sat. Housoeh Amon jens lyis Israel jens yah ung.
Yeptha Lonyi
34 Yeptha ka Mizpa wus nyah yhen mha tauh loh. Hauh uhlyis nyah lonyi gas janghau bat, goh zis yah nyang lyis zes das ge thuq los. Nyang gas nyah loteh nghuot.
35 Yeptha nyah lonyi lyis nyvng lyis, nyang kuk zis yah nyah dyi lang chuiq las taiq zis gas, Ngah lonyi eh, nvng ngos lyis kuk nhang goeus. Ngos lyis nos nhang soeu chamus nvng nghuot loh au? Ngos Yhensain lhyi nyhen toh goeus, ma yoh tauh yoeus lo, ge.Ref 11.35: Gyu 30.2
36 Lonyi nyang lyis taiq zis gas, Nvng Yhensain lhyi nyhen toh goeus ya, Yhensain ka nah jeswus Amon dius lyis lvto phuk dyei goeus las nvng ngos lyis kuot das oen taiq toh zis kuot aq.
37 Nghuot laus eq nyang nyah uwus lyis taiq zis gas, Ngos lyis heisoeh dvja kuot nhang aq ngos ngah dyenschangh jens yah boms mas lamh zis yah lonyi bon lyis shei chah cho kuk ngaus das xiklyis lhamhmuh aiq khyvp dyei aq, ge.
38 Nyang taiq zis gas, Loh aq, ge lhamhmuh aiq khyvp nhang. Housoeh nyang nyah dyenschangh jens yah boms mas nyah lonyi bon xiklyis kuk ngaus.
39 Lhamhmuh aiq khyvp thank lyis nyang nyah uwus jyank mas tauh los las, uwus eq nyang Yhensain lhyi nyhen toh zis kuot. Nyang lonyi dvnghuot shih lyis shei.
Heika Israel mas thungh vyang bweh los las,
40 Israel vmesbih jens gas Gilead dius Yeptha lonyi xiklyis zvn yau zvn nyei nyeih thuq las kuk ngaus.