SOETUON BANG SAUHBUK
(JUDGES)
Nyamoq gas lyi shot pheh yah yoeuh lyis soetuon bang ma nghuot, jes thoeuqzoe jens dvtsain nghuot. Nyamoq mas nyings hoeuh soeu dvyuk gas Samson nghuot. Haih lyes cho kuot zis lyis sonzoh 13-16 mas nyvng.
Israel jens gas Mangso lhyi lomluk nyeis lyis kang dwis cho doengs joq las Mangso lhyi lom ma luk kuot los lyis dyoqbis cho vjangh thungh phuh cho, haih buk mas phauhdap dah xuq yoeus cho yoh. Hauh thoq lyis zes phauhdap xuq yoeus cho ka, nyamoq Mangso lhyi lom ma luk las dyoqbis zainsmuh xauh uhlyis, nyamoq nhaiqlom thaiq las Mangso jyank pheh doms los lyis, Mangso ka nyamoq lyis khyuot yoeus das zis cicont nghuot joq cho nghuot.
1
Adonibezek lyis Nyhik
1 Yoshua shei thang lhyi Israel jens Yhensain lhyi nyei zis gas, Khanan bang lyis zan das zis ngamoq xik pheh kha koq shih loh das lah, ge.
2 Yhensain taiq zis gas, Yuda vkoq shih loh das. Ngos hauh mau lyis joeu das zis nyamoq lyis kyauh, ge.
3 Yuda jens Simon dah dius jens lyis taiq zis gas, Khanan bang lyis loh zan das zis ngah vso mau mas ngos yah dvgeh loh goh. Nah vso mau mas eq ngamoq nvng yah dvgeh loh das, ge. Housoeh Simon vkoq yahge
4 Yuda vkoq jes dvgeh loh zan. Yhensain ka nyamoq lyis Khanan yahge Perizi jens thoq mas ung nhang lha Bezek wus mas dius dvmons lyis ung.
5 Nyamoq houmha Adonibezek lyis xo nyvng las nyang lyis zan.
6 Nyang gas phang loh, nyamoq eq nyang lyis chank khat nyhik las, nyah loqmuhchamh khyeimuhchamh tsain thyet tyamp dyei.
7 Adonibezek taiq zis gas, Ngos hwankti nyhetci lhyi loqmuhchamh khyeimuhchamh thyet las nyamoq ngah kihgus jeis mas zos pop kui zo. Ngos kuot zis yah dvyhangteh Mangso ngos lyis kuot, ge. Nyang lyis Yerusalem mas shwih kat las nyang houmha shei.
Yuda Yerusalem lyis Zan ung
8 Yuda jens gas Yerusalem wus lyis zan yoeus, dius lyis sat, wus lyis ngheq.
9 Hauh thang lhyi Yuda jens gas boms mau mas, boms khyei mha, mautyi pheh dah nyeis kyuk yos mas nyeis dah Khanan jens lyis tsoq zan loh.
10 Yuda jens gas, Kiriat Arba ge gyangh lui dah Hebron mas nyeis Khanan jens lyis loh zan. Houmha Sheshai, Ahiman, Talmai vhuh lyis ung.
Otniel Debir wus lyis Zan ung
(Yosh 15:13-19)
11 Hou mhayah Yuda jens gas Debir vnyau vshih lyis loh zan. Debir lyis xik pheh gas Kiriat Sepher ge lui.
12 Khaleb taiq, Kiriat Sepher wus lyis yoh zan ung soeu lhyi ngah lonyi Aksa dyeizo das, ge.
13 Housoeh las Khaleb dah vnoeuh Kenaz lo Otniel gas hauh wus lyis yoh zan yoeus las Khaleb gas hauh soeu lhyi nyah lonyi Aksa dyeizo.
14 Nyi hwank nyeih lyis Otniel gas nyang lyis nyah uwus jyank mas yos dvkhyangh sang das zis yomdyei. Housoeh nyang gas mauhlyihzoe masyah gyoh los. Khaleb eq, Nvng cha o, ge nyei. note 1.14 Haih cho: Hebre mas Aksa yah Otniel lyis yomdyei, ge bos.
15 Nyang taiq zis gas, Nvng ngos lyis dyei dah maunyeis gas nyeis kyuk yos nghuot las ngos jeis dwang jens tsain o, ge. Housoeh las Khaleb gas nyang lyis goq pheh jeisthuq dwang eq, o pheh jeisthuq dwang eq dyei.
Yuda yahge Benyamin Ung
16 Moshe dah yukphoq Ken vnyau vshih jens gas Yuda jens yah dvgeh Dyoms zains wus ge, Yerikho masyah loh las Arad dah mautyi shot, Yuda mhanhdyvp mas jweh loh. Houmha nyamoq Amaleknote 1.16 Amalek ge zis gas, Hebre mas, Dius ge vjyuk nghuot. yah dvgeh nyeis.
17 Yuda jens gas Simon jens yah dvgeh Zephat mas nyeis dah Khanan jens lyis loh ung. Hauh wus lyis nhoengh las dvnganh mhont tyamp. Hauh wus lyis Horma ge nyhink.note 1.17 Horma ge zis gas Hebre mas, Monh loh ge vjyuk bos.
18-19 Yhensain ka Yuda jens lyis pangh las nyamoq gas boms mau lyis xauh sain yoeus. Nghuot laus eq Gaza, Ashkelon, Ekron yahge nyamoq dah wuxom jens lyis gas ma yoeus. Thomh yvm chank yah nyeis bang gas thyeq lhyingh tsain yoh yvmvyah Yuda jens nyamoq lyis ma thyeh khat tyamp.
20 Moshe taiq toh zis yah dvyhangteh Khaleb lyis Hebron wus dyei. Nyang gas hauh wus mas dah Anak vnyau vshih somh huh lyis khat tyamp.
21 Nghuot laus eq Benyamin vkoq gas Yerusalem mas nyeis Yebusi jens lyis ma khat tyamp las, Yebusi jens gas khvnyhik jweh shoq Yerusalem wus mas Benyamin jens yah dvgeh tsoq nyeis loh.Ref 1.21: Yosh 15.63; 2Sa 5.6; 1Ss 11.4
Ephraim, Manase Zan ung
22-23 Ephraim vkoq yahge Manase vkoq gas Bethel wus lyis loh zan. Hauh uhlyis hauh wus lyis Luza ge lui. Yhensain eq nyamoq lyis pangh. Nyamoq hauh mas joh yoeuh nhang.
24 Hauh bang gas hauh wus masyah thuq los dah dius dvyuk yah xauhgoh las nyang lyis, Ngamoq lyis wus mas wvng loh cho shet aq, ngamoq nvng lyis ma nos nhang das, ge.
25 Housoeh las nyang nyamoq lyis cho shet. Ephraim yahge Manase jens gas nyang yahge nyah yhenbang mas lai las hauh wus mas bang dvnganh lyis sat.
26 Thang lhyi nyang gas Hiti mau mas loh las wus kuot zis yah Luza ge nyhink toh.
Israel ma Khat tyamp Dius
27 Manase vkoq gas Bet Shean, Tanak, Dor, Ibleam, Megido wus jens yahge nyamoq dah vyvm vwi wus jens mas nyeis bang lyis ma khat tyamp. Housoeh Khanan jens hauh mau mas tsoq nyeis loh.Ref 1.27-28: Yosh 17.11-13
28 Israel jens yombos los lyis eq Khanan jens lyis shank shoq ma khat tyamp, nyamoq xiklyis muh tsoengh zwi nhang.
29 Ephraim vkoq eq Gezer mas nyeis dah Khanan jens lyis ma khat tyamp, housoeh las Khanan jens gas houmha nyamoq yah dvgeh tsoq nyeis loh.Ref 1.29: Yosh 16.10
30 Zebulun vkoq eq Kitron yahge Nahalo mas nyeis dah Khanan jens lyis ma khat tyamp. Housoeh las Khanan jens gas nyamoq yah tsoq nyeis las muh tsoengh zwi nhang zis xauh.
31 Asher vkoq eq Akho, Sidon, Alab, Akzib, Helba, Aphek, Rehob wus jens mas tsain nyeis bang lyis ma khat tyamp.
32 Asher jens gas houmha nyeis cauh Khanan jens lyis ma khat tyamp tyamp nyamoq yah dvgeh nyeis.
33 Napthali vkoq eq Bet Shemesh yahge Bet Anat mas bang lyis ma khat tyamp. Napthali jens gas houmha dah nyeis cauh Khanan jens yah nyeis las nyamoq lyis muh tsoengh zwi nhang.
34 Amori jens gas Dan vkoq jens lyis boms mau mas tsoengh nyeis nhang. Pa mha ma gyoh los nhang.
35 Amori jens gas Aiyalon, Shalbim yahge Here boms mas tsoq nyeis shih. Nghuot laus eq Ephraim vkoq yahge Manase vkoq jens gas Amori jens thoq lyis yom zes bos las hauh bang lyis nyamoq xiklyis muh tsoengh zwi nhang.
36 Amori jens dah maukyo ka Akrabim langhwuq masyah Sela dah mautsung pheh tsoq loh.