38
Yhensain Yoba lyis Phuk
1 Hauh thang lhyi Yhensain ka Yoba lyis lyeisjyang mhayah jis.
Yhensain
2 Seq cho ma bos, vjyuk ma bos dang yah
ngah joeui lhyi nyei soeu nvng hank nghuot?
3 Gvshih nvng zungh zungh toq yap las
ngos nyei dah nyeidang phuk aq.
4 Ngos mungkvn lyis kuot uhlyis nvng houmha nyeis lhyeh?
Nvng hounyhoq seq lyis hauh zis ngos lyis taiq kyoh aq.
5 Hauh zis kha iq kuh chah zis hank thyet?
Hauh thoq mas mvvs hank lang?
Nvng phuk dang dvnganh vseq lah?
6 Hau nyeisjvng lyis thuk dah zains lyis cha yah tsain toeu toh?
Hau nyeih lyis mungkvn dah vthunk luk hank kat toh?
7 Hauh nyeih maubuh los lyis kyi jens dvgeh chunghthwe kat las,
maukhung mha bang gauslaus zis yah tsain kaiq.
8 Nyeisjvng ung mhayah buiq thuq los dah thomh lyis
zwi toh das zis khyam khomh lyis hank tsain nyheih toh?Ref 38.8-11: Yer 5.22
9 Thomh lyis jyommauh yah nghop las
mauchuotdwang mas koek toh soeu ka ngos nghuot.
10 Ngos thomh xiklyis vkhomp tsain kat las
hauh nungsthank pheh khomhkyank kyank toh.
11 Ngos thomh lyis taiq goeus, houhweq dvnghuot, ma yoh lai lo.
Heimha nah yombos jeisphauq no toh chah.
12 Yoba eh, nvng nah caiq mas nyoq nyvng los
das zis dvnyeih vdoengs ku lah?
13 Nvng maubuh los yvlyis, nyeisjvng lyis zwi las lhung bang
tamh joqyos masyah ko khyoq aq oen vmingh dyei ku lah?
14 Nyeih lyis dah bvng zis gas jing jens langhkhau jens lyis dyimis nap toh teh thuq los nhang.
Houka tsohnyhon mha kyihau tap lyis dwvng joq teh nghuot.
15 Nyeih lyis dah bvng zis gas lhung bang xiklyis nyo bvng las
thyoq zo muh masyah lang tauh los.
16 Nvng, thomh noq dah jeisthuq dwang mas loh ku lhyeh?
Nvmukdra thomh theh mas cha joq zis xo ku lhyeh?
17 Dvyuk yuk nvng lyis Shei mau noq lyis
zungh dah khomh chixoeuq ku lhyeh?
18 Nvng mungkvn kha iq kuh zis vseq lah?
Nvng seq lyis ngos lyis phuk taiq aq.
19 Bvng zis kha mhayah los,
nghuot ya chuot zis dah vpom cha nghuot zis nvng vseq lah?
20 Nvng hau aiq ja lyis khahweq loh chah cho vyoh chixoeuq lah?
Nghuot ya nyamoq lyis doms tauh nhang kat das cho vyoh chixoeuq lah?
21 Nvng yoh kuot das oen ngos top seq: khasoeh ge lyis nvng hou iq kuh goeus,
mungkvn kuot uhlyis nvng houmha nyeis goeus.
22 Ngos gyu yahge gyutomp toh joqyos mas
nvng loh kwang ku lhyeh?
23 Ngos hauh yvlyis yau shishenh, moengdyoq,
jeszan buisnyeis xiklyis cicont kuot toh.
24 Nvng buis canh los joqyos mas jweh ku lhyeh?
Nghuot ya buisthuq lyeis kha mhayah muot los joqyos mas jweh ku lhyeh?
25 Mau hank wus nhang?
Maujau jau loh das cho hank shang?
26 Sihyos mas mau hank wus nhang?
27 Jeis ma joq dah mhanh yos mas jeis hank sanh?
28 Mau, nghuot ya jyweh gas uwus bos lhyeh?
29 Nghan yahge gyutomp dah ungwes gas hank nghuot?
30 Hauh zis jeis lyis lukzains teh kuot las
thomh thoq mas gyamh joq.
31 Nvng gas Kyijyon lyis yoh dain toh lhyeh?Ref 38.31: Yob 9.9; Amo 5.8
Shohkhat kyi dah dyichih lyis yoh phui tyamp lhyeh?
32 Nvng kyi lhyi dvyoq thang lhyi dvyoq cho yoh she lhyeh?
Woms kyi yahge Womslo kyi lyis cho yoh shet lhyeh?
33 Nvng maukhung lhyi guon dah lyi tsain seq lah?
Hauh zis yah nvng nyeisjvng lyis yoh guon nhang lah?
34 Nvng lyis mau yah jyweq nhang das xiklyis
nvng jyommauh lyis yoh kaiq sang lah?
35 Nvng maunyoq nyik das zis tying lhyi,
hauh zis nah jyank mas los las, Ngamoq nyeis, ge das lah?
36 Nile lvng nhauq los das ge nghoq lyis hank taiq?
Nghuot ya Gyoqphoq lyis mauwus das ge hank taiq?
37 Jyommauh lyis suon das iq joeui hank bos?
Mauwus los shoq hank huot khyoq?
38 Hauh mau gas tsohmop lyis thomh bop bweh nhang.
39 Nvng khangkhyi zo das zonoms xo lha
yuot dah khangkhyi lo jens nhaiqshoq lhyeh?
40 Nyamoq gas nyamoq dah luk-uk mas tamh joq,
nghuot ya nyamoq dah khyung mha lhom nyeis.
41 Kvnhoq jens dang jyon yuot yenh lyis,
nyamoq dah lo jens ngos lyis zonoms sang lhyi
nyamoq lyis zonoms dyei soeu hank nghuot?