31
1 Ngos nyetnau zis yah vmesbih lyis khanhamp eq
ma yoeuh das oen dangthoengh toh goeus.
2 Yomzains Mangso ka yang lyis cha kuot das?
Cangsoeu kuot yvlyis nyang khasoeh tauh dyei?
3 Nyang gas ma jus zis kuot bang jyank mas
dyoqbis zainsmuh yahge thyoqpi cho nhang.
4 Mangso ka ngos cha kuot zis dvnganh seq;
nyang ngah beszoh khanghmuh lyis nyvng.
5 Ngos lhung khyvlyis khanhamp eq ma kuot,
gohyuk lyis khanhamp eq ma mhuih oen maukhi.
6 Mangso ngos lyis jus dah jvng mas laiq yoeuh bas jungh,
housoeh lyis ngos tswi khasoeh ma bos zis nyvng das.
7 Ngos jus cho masyah tauh loh,
nghuot ya ngvnyang ma gis cho lhyi twih nhang lha
ngah loq yaunos mas lhoeuh lyis,
8 ngah jyo yonh loh bas jungh,
nghuot ya ngos xoh yvlyis toh dah zonoms gohyuk zo bas jungh.
9 Ngos, ngah yhenkyoh dah yhensain nyhiq lyis twih las
nyah khomh nghe pheh tamh langh nghuot lyis gas,
10 Ngah yhensain nyhiq gas gohtoeu yukgis dah wom jyauq dyei bas jungh,
gohtoeu yukgis dah yhetyos mas yhet bas jungh.
11 Housoeh teh lhung cho ka shei cho yah soetuon chah.
12 Houka dyoqbis nhang dah munyi thomh nyi teh nghuot las
ngos yoh zis dvnganh ngeh jom tyamp.
13 Ngah jyeidwis dvyuk yuk ngos lyis tyi lha lop lyis,
ngos nyamoq lyis gyo dyei las lyi bos khyvlyis kuot dyei.
14 Ngos ma kuot lyis gas Mangso yah khasoeh yoeuh goh das lah?
Mangso ngos lyis soe los tuon lhyi ngos cha yoh taiq das lah?
15 Ngos lyis gvnkhanh toh dah Mangso ka ngah jyeidwis lyis eq dvyhangteh gvnkhanh toh.
16 Ngos nyungs bang lyis pangh das zis khanhamp eq ma ngoek;
ngos chauhmuh jens lyis nhaiqlom ma thank nhang.
17 nghuot ya ngos zo uhlyis chauhlo jens lyis
yuot zis yah loh nhang lhyeh?
18 Ngos ngah dvcaiq gonh nyamoq lyis loqzamh zwi los.noteHebre mas ma bvng
19 Dyimis wis das zis nyo nyungs las
chah nyeis bang dvyuk yuk lyis nyvng lyis
20 ngvnyang yvng phung mhayah thuq dah yvng mauh yah kuot dah sauh dyimis nyang lyis dyei.
Housoeh nyang ngos lyis nyah ehnyet dvnganh yah chungh das.
21 Soetuon jang mas ngos yoh ung das zis seq las
chauhlo lyis mhuih lyis,
22 ngah loqyom gyau bas jungh,
hauh zis ngah kvtoq masyah gyau bas jungh.
23 Ngos Mangso joeng cho lhyi gyuk yvmvyah
hauh cho lhyi khanhamp eq ma kuot.
24 Ngos dis cho lhyi khanhamp eq ma loms;
25 nghuot ya ngos yohkhuiq cho mha khanhamp eq ma khwank.
26 Buis yahge nyah dah bvng yvmas,
nghuot ya lhamhmuh yahge nyah dah yungh cho mha khanhamp eq ma paiq.
27 Nyamoq lyis phauh nyang yvmas ngah loq lyis bvlot tanh zis yah
nyamoq lyis nyoqnho ngelang dyei khyvlyis ma shwih whang loh nhang.
28 Housoeh teh yaunos gas shei cho yah joeng chah.
Houka Yomzains Mangso lhyi peq tyamp zis nghuot.
29 Ngah jeswus kham zo zis xauh lyis ngos khanhamp eq ma gaus.
Nghuot ya nyamoq dyoqbis zainsmuh xauh lyis ngos nhaiq ma doeus.
30 Ngos nyamoq shei das xiklyis nhoengh zis yah
yaunos khanhamp eq ma kuot.
31 Ngos boenghwus lyis vjangh lhom zes cho
ngah yhen mha nyeis bang dvnganh seq.
32 Ngos gyung suh bang lyis ngah yhen khau mha khi hwank.
Nyamoq lyis khanhamp eq wus talhoeu mha ma yhet nhang.
33 Gohyuk gas nyamoq dah yaunos lyis shung toh laus eq
ngos ngah yaunos lyis khanhamp eq ma nghop toh.
34 Ngos dius jens cha taiq das zis khanhamp eq ma gyuk,
nyamoq jwangh nyhap das zis gyuk yvmvyah
khanhamp eq samlo ma nyeis nghuot ya yhen khau mha ma lungh.
35 Ngos cha taiq nyeis zis hank ma gyo das lah?
Dang khonh khanghmuh jyoeng oen, ngos maukhi.
Yomzains Mangso ngos lyis phuk taiq bas jungh.
Ngos lyis tyi lha loqyom tyonh soeu she los dah tsuk cho
lhaih toh lyis ngos yoh nyvng das.
36 Jyoengh, ngos hauh yvlyis ngah kvtoq mas wuot toh das,
uhloms mas buismuk soeh tsungh toh das.
37 Ngos Mangso lhyi ngos kuot goeus zis dvnganh taiq kyoh las
ngos nyah xikkhonh mas nghank das.
38 Ngos gas, ngos zwi zo dah maunyeis lyis khauh,
yos sain gyingh jyank masyah tsain yoeus,
39 ngos houmha yuk dah zonoms zo laus eq
hau yos zwi bang lyis gas yuot nhang lhyi ka,
40 sunghso gungsthaiq zoeuzains,
bali gungsthaiq nyoq yuk bas jungh, ge.
Yoba dah dang thank goeus.