26
Yoba
1-2 Nvng ngos lyis ma pangh jus -
ngos gas yomnhuk las shohjyen soeu nghuot.
3 Nvng ngos teh koh soeu lhyi hou iq gis dah joeui dyei las
nah seqcho gvm dyei.
4 Haih dang taiq das nyhenshang nvng lyis hank pangh?
Heisoeh taiq das zis nvng lyis soq hank muot kat dyei lah?
Bildad
5 Sidyos gas nyeis khau jeis mas gyuk nvn nyeis.
6 Shei mau gas Mangso xikkhonh mas phank toh;
nyah nyoqlvtjvng mas hauh zis gos vnghop ma bos.
7 Mangso ka mautsung pheh maukhung lhyi tyo kat las,
nyeisjvng lyis cha yah ma tanh yvmas lhangh toh.
8 Jyommauh mas jeis lyis tyink las hau lyei dah jeis
ma buk thuq loh shoq zwi toh soeu ka Mangso nghuot.
9 Nyang lhamhmuh lainh yvlyis jyommauh nungsthank, hwankti tank mas shung toh.
10 Nyang jeis thoq mas mauyvm khomh jyiq toh las
houka chuot zis yahge bvng zis kangh toh dah vkhomp nghuot.
11 Nyang maukhung lhyi thuk toh dah zains lyis nyho lhyi,
nyamoq gyuk las ko zis yah tsain nvn nyeis.
12 Nyah yom yah thomh lyis ung,
nyah dah lyes cho yah Rahab mvnjung lyis yoh mhont.
13 Nyah soq yah maukhung lhyi lhyang shoq kuot.
Nyah loq yah phang luiq loh dah mvnjung lyis sat.
14 Haih zis gas nyah yomsoq vsoh dvnghuot,
yang xauhgyo ku dah nhuotsot dvnghuot.
Mangso jyoengh kha iq kuhxing yvlyis hank yoh seq, ge.