2
Satan Yoba lyis doms Shi
1 Maukhung mha bang Yhensain xikkhonh mas los doms thuq xoeuq nyeih lyis Satan eq nyamoq yah dvgeh houmha bos los.
2 Yhensain Satan lyis nyei, Nvng khalhye yah jweh los, ge.
Satan ka, Ngos nyeisjvng thoq mas suh kwang yenh, ge.
3 Satan lyis Yhensain nyei, Ngah jyeidwis Yoba lyis vsoh yoeuh lah? Nyeisjvng thoq mas nyang teh gis las lomluk soeu hank ma bos. Nyang ngos lyis paiq, ma gis zis ma kuot das xiklyis jhank. Nvng ngos lyis chah soe ma bos yvmas nyang lyis mhont nhang aq ge jyoeuq. Nghuot laus eq Yoba gas khanhamp eq yobos huon chank ma bos, ge.
4 Satan toeuh zis gas, dius dvyuk gas nyang kang dwis das xiklyis nyah zis dvnganh tyamp das.
5 Nghuot laus eq gvshih nvng nyah gungs lyis nos nhang oen goh, nyang nvng lyis nhoengh das.
6 Housoeh las Yhensain ka Satan lyis taiq, Nghuot goeus, nyang nah loq khau mha nghuot. Nghuot laus eq, nvng nyah kang lhyi vzeh, ge.
7 Hauh thang lhyi Satan ka Yhensain xikkhonh masyah thuq las, Yoba lyis dvgungs gonh dvm bos shoq kuot.
8 Yoba gas, nyah dvm mas khyik das auhjvp yoeus toh las, nyiyvp boms mas tsung toh.
9 Nyah yhensain nyhiq nyang lyis taiq, Nvng lomluk nyeis shih vnghuot lah? Chamus Mangso lhyi nhoengh las ma shei loh, ge.
10 Yoba phuk taiq zis gas, Nvng Mangso lhyi ma loms soeu teh chamus taiq. Mangso gis zis dyei lyis yang lhom yoeus las shanghsenh cho dyei lyis khasoeh gis lop das lah, ge. Yoba gas haih dvnganh xauh laus eq Mangso yah tyi zis cha ma taiq.
Yoba Dyenschangh jens Los
11 Yoba dah dyenschangh somh yuk gas Teman wus mas dah Elipha, Shua mau mas dah Bildad, Nama mau mas dah Zopha tsain nghuot. Nyamoq gas, Yoba kha iq shanghsenh xauh nyeis cho xauhgyo lyis, nyang lyis nhaiqtaink das xiklyis loh das ge tsain nghamh thyet.
12 Nyamoq we mas dvnghuot shih lyis Yoba lyis nyvng laus eq ma daq yoeuh. Housoeh las nyamoq kaiq ngaus zoh lyis nyamoq dyimis langchuiq, nyamoq uhloms mas eq lyeis mas eq tsohmop tsain doeuh lhank.
13 Housoeh nyamoq gas dang dvkhonh eq ma taiq taiq nyang yah dvgeh nyhet nyeih nyhet nyens hau tsoh boms mas tsung toh. Khasoeh ge lyis nyamoq gas nyang kha iq shanghsenh yvlyis tsain nyvng.