12
Yoba
1-2 Nghuot goeus, namoq gas yhaugyen bang nghuot las,
namoq shei lhyi joeui eq namoq dvgeh shei das.
3 Namoq mas sohseq cho bos nyhoq ngos mas eq bos.
Namoq ngah thoq lyis ma zes gis.
Yuk khanghmuh nvng cha taiq zis dvnganh seq.
4 Gvshih ngah dyenschangh jens yangh ngos lyis yis;
Ngos Dan las yobos huon chank ma bos laus eq nyamoq ngos lyis yis.
Nghuot laus eq Mangso ngos dung lyis toeuh dyei shishenh bos.
5 Namoq yau cho ma bos las ngos lyis nyhap,
namoq gas lains bah ge soeu lhyi bat.
6 Nghuot laus eq lhuot zo dah khyanktau jens yahge mangso ma bos bang gas nyenstap zis yah nyeis.
Nyamoq dah mangso ka nyamoq dah yom dvnghuot.
7 Nghoq jens yahge gaunyhauq jens yangh namoq lyis yoh jyauh das zis nyoshoq bos.
8 Nyeisjvng thoq yahge thomh mas dah
dwis ya dwis zis lyis nyamoq dah joeui nyei aq.
9 Nyamoq lyis Yhensain loq yah kuot toh zis nyamoq dvnganhmoq seq.
10 Dwis ya dwis dah kang lhyi shwih soeu ka Mangso nghuot.
Yuk khanghmuh dah kang ka nyah yomsoq khau mha nghuot.
11 Dang gyo no chi aq, shoh shang zwi chi aq.
12-13 Dius cauh jens gas joeui bos;
nghuot laus eq Mangso ka joeui yahge yomsoq bos.
Dius cauh jens gas do lhain;
Mangso ka do lhain cho yahge kuot das yomsoq bos.
14 Mangso thyoq khyoq lyis hank yoh doms tsuk,
Mangso lhunk toh bang lyis hank yoh phui kat?
15 Mangso mau lyis zwi toh lyis mau phangh;
Nyang jeis doms phaiq kat lyis jeis nhauq los.
16 Mangso ka yombos las vjangh ung;
mhuih soeu yahge mhuih zis xauh soeu aiq yuk yah nyah yomsoq mas nghuot.
17 Nyang guon bang dah joeui lhyi yoeus tyamp.
Uhshe bang lyis eq koh nhang.
18 Nyang hwankti jens khyoq las thung lungh nhang.
19 Phudyei bang yahge yomsoq bos bang lyis nyhen mha khyoq.
20 Loms toh bang lyis nyang samlo kuot tyamp.
Logis jens dah joeui lhyi yoeus tyamp dyei.
21 Nyang yomsoq bos bang lyis xoqphuh nhang,
guon bang dah yom lyis eq thank loh nhang.
22 Nyang shei cho teh chuot dah joqyos mas bvng zis tsain pank dyei.
23 Nyang dius nyau jens lyis yombos kuhxing nhang,
nghuot laus eq hauh thang lhyi nyang ung lha nyamoq lyis mhont tyamp.
24 Nyang nyamoq dah uhshe bang lyis koh nhang lha
whang yenh zis yah khamkhvv lha dyuk loh.
25 Nyamoq gas mauchuot dwang mas sop yenh.
Nyamoq yheiyet bang teh vtyi vkamh loh.