60
Jweh los das Yerusalem Phunk
1 Yerusalem eh, toq las buis soeh tso aq.
Yhensain dah phunk gas nah thoq mas bvng joq.
2 Gohtoeu dius nyau jens lyis gas chuot zis yah nghop toh das.
Nghuot laus eq Yhensain dah bvng zis gas nah thoq mas pank dyei das.
Nyang jweh nyeis dah bvng cho ka nvng yah dvgeh nghuot das.
3 Dius nyau jens gas nah dah bvng yvpheh huom los das.
Hwankti jens nah buisnyeis vsaiq mau buh los yvlyis nyvng das.
4 Nah vyvm vwi yoeuh las cha bweh nyeis yvlyis nyvng aq.
Nah dius jens yhen pheh los das nyhenshang huom toh.
Nah loloeu jens we masyah los das.
Nah lonyi jens lyis eq loshang jens lyis teh shwih los das.
5 Nvng haih zis lyis nyvng das las gauslaus zis yah dyingh das.
Nvng sainh hwangh las nvn das.
Dius nyau jens dah dis cho nah jyank mas chi los das.
Thomh thyitvp masyah nyamoq dah dis cho jweh los das.
6 Gola-u phung zainsmuh gas Midian yahge Epha mau masyah tsain jweh los das.
Sheba mau bang gas xing yahge loban chi jweh los das.
Dius jens gas Yhensain cha kuot goeus cho loeus gis taiq kyoh das.
7 Keda yahge Nebaiot mas dah yvng jens dvnganh
phudyei das nyhenshang nah jyank mas chi los das.
Yhensain lhyi nhaiqdoeus nhang das xiklyis phon thoq mas phudyei das.
Yhensain ka nyah Yhenmuh lyis xikpheh thoq lyis phunk zes bvng nhang das.
8 Jyommauh dang teh los,
khotjyauh jens yhen pheh tauh los teh los nyeis dah haih sangpho jens gas cha tsain nghuot au?
9 Haih sangpho jens gas we mau masyah
Mangso dah dius jens lyis yhen pheh shwih los nyeis.
Nyamoq yah dvgeh ngwis xing lhyi thuq los.
Houka Israel dah gyingshang Yhensain Mangso nyings lyis nyoqnho ngelang dyei das nyhenshang nghuot.
Nyang gas nyah dius jens lyis nyoqnho ngelang dyei das zis dius nyau dvnganh lyis kuot toh soeu nghuot.
10 Yhensain Yerusalem lyis taiq zis gas,
Gohmau bang nah wusciank doms ci dyei las nyamoq hwankti jens eq nvng lyis phuqsoe das.
Ngos nhaiqyo las nvng lyis joeng goeus laus eq,
ngos nvng lyis nyoqnho dyei cho yahge
nhaiqnyen cho chixoeuq das.
11 Dius nyau jens dah hwankti jens nah jyank mas
nyamoq dah dis cho yoh chi los das nyhenshang
nah khyam khomh lyis nyeih nyenh phank toh chah.Ref 60.11: Nyoq 21.25-26
12 Nghuot laus eq nvng lyis ma phuqsoe dah dius nyau jens gas
shank shoq mhont tyamp zis xauh das.
13 Lebanon saiq khyam mha yungh dah xoeuh, shuk, shvxoeuh saiq gas
nvng Yerusalem lyis doms kuot das xiklyis,
ngah yhenmuh lyis shunk das xiklyis,
ngah wugungs lyis phunk bos nhang das xiklyis chi los das.
14 Nvng lyis zaiq khoq bang dah lo jens gas nvng lyis los paiq lasRef 60.14: Nyoq 3.9
nyamoq dah phauh nyang cho chixoeuq das.
Nvng lyis dius ngis khyoq bang nah khyeiyang mas los paiq das.
Nyamoq nvng lyis Yhensain dah wus, Zion,
Israel dah gyingshang Mangso wus, ge lui das.
15 Nvng lyis ma tyamp toh lo, ma hoeng lo,
dius ma nyeis jyamhjyuklhyuk wus ma kuot lo.
Ngos nvng lyis kuhxing lha yungh dah joqyos,
vcaiq vto gauslaus joqyos kuot das.
16 Ungwes gas nyah lo lyis dyangh teh,
dius nyau jens yahge hwankti jens gas nvng lyis dyangh das.
Housoeh ngos Yhensain ka nvng lyis khyuot yoeus las,
Israel dah Yomzains Mangso ka nvng lyis khyuot kat yvlyis nvng yoh seq das.
17 Ngos gas thunk gungsthaiq xing,
thyeq yahge saiq gungsthaiq ngwis yahge thunk,
luk gungsthaiq thyeq chi los das.
Nah guon bang nvng lyis ma zaiq lo das.
Ngos nyamoq lyis lyi jus cho yahge nyenstap cho yah guon nhang das.
18 Bat goh sat goh thwe ma xauhgyo lo das.
Nah mau mas thyoqpi cho ma doms bweh lo das.
Ngos nvng lyis ciank teh gos las khomp toh dyei das.
Ngos nvng lyis khyuot yoeus yvmvyah nvng ngos lyis chungh das.
19 Nyeih lyis buis, nyenh lyis lhamhmuh dah bvng zis nah xiklyis ma nghuot lo.Ref 60.19: Nyoq 21.23, 22.5
Ngos Yhensain ka nah xiklyis vcaiq vto bvng zis nghuot.
Ngah phunk dah bvng zis gas nah thoq mas bvng das.
20 Nvng nhaiqkuk buisnyeis thank goeus.
Ngos Yhensain ka nah dah vcaiq vto bvng zis nghuot las
buis yahge lhamhmuh thoq lyis zes goeng joq.
21 Nah dius dvnganh eq jus zis chank kuot das las
hauh mau lyis vcaiq vto xauh sain das.
Dvnganh lyis ngah kuhxing cho chixoeuq das nyhenshang
ngos nyamoq lyis tsungh toh, kuot toh.
22 Nah dah ngis thank nyhen thank yhenbang yangh
yomsoq bos dah dius nyau teh kuhxing los das.
Shishenh jweh lyis ngos haih zis lvnyap bweh los nhang das.
Ngos Yhensain nghuot.