58
Jyoeng Womkyi Cho
1 Yhensain taiq, Namoq yoh kaiq nyhoq kaiq geh, ngah dius Israel jens lyis nyamoq dah yaunos cho taiq kyoh geh.
2 Nyamoq ngos lyis nyeih khanghmuh paiq zis yah, ngah cho lhyi seq mes, ngah lyi lyis domsyos gyo mes ge sang. Nyamoq ngos lyis lyi jus cho dyei nhang mes. Ngos lyis paiq cho mha yoh pyo das cho vguons tsain kuot taiq.
3 Dius jens nyei zis gas, Yhensain khanhamp eq ma soh dyei zis ngamoq chamus womkyi das lah, ma gyo dyei zis chamus ngamoq ma zo ma shuk nyeis das lah, ge.
Yhensain nyamoq lyis taiq, Namoq womkyi yvmas jyoeng cho ka namoq o khyvlyis suh e zis yah nah uhkung jens lyis nhiq zaiq zo.
4 Nah womkyi zis gas nvng lyis thyoq zo nhang lha nvng dyoqgoh, zan goh. Haih ja womkyi shvmanh dung yvlyis ngos gyo dyei das oen nvng nghamh lhyeh?
5 Namoq dah womkyi zis gas namoq nyang lyis dvnos nhang. Mhanh teh nah uhloms lyis nyhen mha gop gyoh las yanghthung dyi wuot, nyiyvp boms mas lhoeuh goeus. Namoq hauh yvlyis womkyi oen lhyeh? Ngos hauh yvlyis nhaiqdoeus das oen nghamh lhyeh?
6 Ngos o dah womkyi cho ka haih zis nghuot. Zaiq zo dah jvngchoh yahge lyi ma jus dah tanzoe lyis tsain yoeus tyamp las zaiq zis xauh bang lyis luiq loh nhang geh.
7 Yuot soeu lhyi gvmtsoh, shohjyen lha yhen ma yoh bang lyis namoq yhen mha phank dyei geh. Wuot das zis cha ma yoh bang lyis dyimis dyei geh. Namoq dah sainhchangh lyis pangh das zis vngoek.Ref 58.7: Mat 25.35
8 Housoeh lyis ngah nyoqnho dyei cho nah thoq mas nvpsangh buis soeh bvng das. Nah dvm eq lvnyap gis das. Ngos nvng lyis khyuot yoeus das nyhenshang vjangh nvng yah nyeis das. Ngos nyeis gvng mas shot khanghmuh masyah nvng lyis gos toh dyei das.
9 Nvng shvmanh dung lyis ngos nvng lyis gyo dyei das. Nvng ngos lyis lui lyis ngos nvng lyis toeuh das.
Nvng zaiqzo cho lhyi toh tyamp, ma phauh ma danh cho ma kuot lo, ma gis dang khanghmuh lyis eq tyamp las,
10 yuot soeu lhyi womtsoh, nyungs bang lyis jo nhang lhyi nah vyvm vwi mas dah mauchuotdwang gas nyeih gungs dah bvng yvpheh lhaiq los das.
11 Ngos namoq lyis vjangh cho she das, gis dah vyhang yah jo nhang das. Ngos nvng lyis yombos nhang lha nyeisgis yaplhoq nhang das. Nvng gas jeis nyoshoq bos dah khyam teh, khanhamp eq ma kyuk loh dah jeisthuq dwang teh bweh nhang das.
12 Namoq dah dius jens gas nyangh nyangh dyoqbis joq goeus yvlyis doms ci das. Hauh zis gohlhain dah vpom mha doms ci das. Housoeh namoq gas, Ciank doms soq ci bang, dyoq gyoh goeus dah yhen jens lyis doms tsuk bang, ge nyings hoeuh das.
No Nyeih Phauh shangh Cho
13 Yhensain taiq, Nvng no nyeih lyis gyingshang khyvlyis toh las hauh nyeih lyis nah nhaiq wvng cho ma chank. Nvng ngah gyingshang buisnyeis lyis phauhtap las gyung ma suh, muh ma zwi, vkyuh ma bos dang ma taiq chank kuot nghuot lyis,
14 Ngos lyis phuqsoe mhayah gauslaus cho yoh xo nyvng das. Mungkvn gonh mas ngos nvng lyis nyoqnho ngelang dyei das las ngos nah phauh thyeih Yakop lyis dyei dah mau mas nvng pyo pyo xauh nyeis das. Ngos Yhensain taiq goeus.