54
Israel lyis Yhensain Jyet cho
1 Yerusalem eh, nvng gas lo ma bos dah vmesbih teh nghuot ku.Ref 54.1: Gal 4.27
Nghuot laus eq gvshih gas nvng gauslaus zis yah chunghthwe yoh kat.
Gvshih nvng gas yhensain phoq yah ma gang dah
vmesbih thoq lyis lo jens zes yoh das.
2 Nvng nyeis dah zvng jyeq kat aq.
Twih chent kat aq, jywangh jens lyis goeng nhang aq.
3 Nvng shot khanghmuh maukyo jyeq kat aq.
Gvshih gohtoeu dius nyau jens dyingh joq dah mau mas
nah dius jens tauh jweh los das.
Gvshih jyamhjyuklhyuk mus joq dah wus jens mas nyeis dius dyingh das.
4 Vchiq, nvng xoq ma doms phuh lo das.
Nyhen mha khyoq zis eq ma xauh lo das.
Nyenhkyi ngis, lom maluk dah yhensain nyhiq lyis tohnyhik teh,
chauhmuh dah nhaiqngis cho lhyi tohnyhik teh nvng eq hau dvnganh yvlyis yoh tohnyhik das.
5 Nvng lyis gvnkhanh soeu ka nah yhensain phoq teh nghuot das.
Nyah nyings Maukhung Jesphung Yhensain nghuot.
Israel dah gyingshang Mangso ka nvng lyis khyuot yoeus das.
Nyang gas mungkvn gonh dah guon soeu nghuot.
6 Israel eh, nvng gas yhensain phoq yah tyamp toh zis xauh las
nhaiqkuk dah nyelo teh nhaiqkuk nhaiqngis zis xauh.
Nghuot laus eq Yhensain nvng lyis nyah jyank mas doms lui yoeus las taiq:
7 Ngos nvng lyis dvsoq tyamp toh laus eq
jyetdap ehnyet zainsmuh yah nvng lyis doms shwih yoeus das.
8 Ngos nhaiqyo las nah jyank masyah dvsoq tauh loh.
Nghuot laus eq ngos nvng lyis ngah jyetdap cho vcaiq vto chixoeuq das, ge
nvng lyis khyuot yoeus soeu Yhensain taiq.
9 Ngos Noa zaih lyis nyeisjvng lyis Ref 54.9: Vpm 9.8-17
dvjeis khanhamp eq ma doms lhyi lo oen dangthoengh toh.
Gvshih ngos nvng lyis nhaiq ma yo lo das oen dangthoengh toh.
Dvm dyei jwangh cho eq ma kuot lo das.
10 Bausdoms jingkank jens gas gwi loh das laus eq
ngos nvng lyis jyet cho ka khanhamp eq ma thank loh das.
Ngah nyenstap dangthoengh lyis vjangh gomh nyeis das, ge nvng lyis
jyetdap dah Yhensain taiq.
Thang Pheh Yerusalem
11 Yhensain taiq, Ref 54.11-12: Nyoq 21.18-21
Yerusalem eh, nvng vshoh vjyen xauh dah wus nghuot.
Nvng lyis nhaiq hank ma taink.
Ngos nah yhenpom lhyi phauhdap luk yah doms ci das.
12 Ngos nah tyoeuqzvm jens lyis luknes ci das.
Nah khyam khomh lyis nyi soeh bvng dah luk yah kuot das.
Nah vyvm mas dah wusciank lyis phauhdap luk yah kuot das.
13 Nah dius jens lyis ngvnyang jyauh das. Ref 54.13: Yh 6.45
Nyamoq lyis nyeisgis yaplhoq cho yahge
nyenstap cho dyei das.
14 Lyi jus cho yahge jus cho ka nvng lyis yombos nhang lha
nvng gas zaiq cho yahge gyuk dvn cho mhayah luiq das.
15 Ngos ma bauh zis nvng lyis
thyoq soeu yahge
16 Nyikhyomp kuot las kyonhkhyi bat dah
thyeq shonh soeu lhyi ngos gvnkhanh toh.
Hau kyonhkhyi yhung lha sat dah
jeslo lyis eq ngos gvnkhanh toh.
17 Nghuot laus eq nvng lyis chah kyonhkhyi yah eq ma yoh nos nhang.
Nvng lyis kauq bang dvnganh lyis nvng phuk dang dyei chah.
Ngos ngah jyeidwis jens lyis khomp las
ung cho dyei das, ge Yhensain taiq goeus.