51
Yerusalem lyis Nhaiqtaink
1 Yhensain taiq,
Khyuot yoeus cho xauh mes bang eh,
Ngos lyis pangh cho los sang bang eh, ngah dang gyo geh.
Namoq thuq los dah luk yahge
namoq lyis thyet yoeus dah luk dwang lyis yoeuh geh.
2 Namoq yaus lyih dah namoq phauh thyeih Abraham yahge
Sara lyis yoeuh geh.
Ngos Abraham lyis lui uhlyis nyang lo ma bos.
Nghuot laus eq ngos nyang lyis shvmanh dyei las nyang lo bos.
Nyah dius jangh caiq lyis nyoshoq jebais los nhang.
3 Ngos Yerusalem yahge houmha nyeis bang dvnganh lyis
nhaiqnyen cho chixoeuq das.
Doeuh tyamp toh dah nyah maunyeis lyis eq
ngos tsungh toh dah Eden khyam teh, doms kuot das.
Houmha gauslaus cho yahge gausyis cho bos das.
Ngos lyis nhaiqshoqlang ge chungh dah chunghthwe tsain kat das.
4 Ngah dius jens eh, ngah dang gyo geh.
Ngos cha taiq zis gyo geh.
Ngos dius nyau jens lyis jyauh cho dyei.
Ngah lyi gas nyamoq jyank mas bvng zis chi los dyei das.
5 Ngos lvnyap los las nyamoq lyis khyuot yoeus das.
Ngos ung cho yoh das shishenh ni goeus.
Dius nyau jens lyis ngos nyang guon das.
We mau mas bang ngos los das zis langh nyeis.
Nyamoq lyis khyuot yoeus bas jungh ge nghamhloms zis yah ngos lyis langh nyeis.
6 Maukhung lhyi nghank yoeuh aq, nyeisjvng lyis gop yoeuh aq:
maukhung ka nyikhauh teh dyuk loh das.
Nyeisjvng gas mistyang seh teh tyang das.
Houmha nyeis bang gas yvngkhungh teh shei das.
Nghuot laus eq ngos chi los das khyuot yoeus cho ka vcaiq vto joq das.
Thang thank gas ngah ung cho nghuot.
7 Ngos jyauh cho lhyi nhaiqlom mas nghamh suon yoeuh las
jus cho cha nghuot yvlyis seq bang eh, ngah dang gyo geh.
Dius jens namoq lyis goessang lha
ma phauh gis kuot cho lhyi vgyuk goh.
8 Nyamoq gas dyimis lyis naus zo teh dyoq tyamp das.
Nghuot laus eq ngos chi los dah khyuot yoeus cho ka
vcaiq vto goeng joq das. Ngah dah ung cho eq vcaiq caiq joq.
9 Yhensain eh, toq las ngamoq lyis bos pangh aq!
Gohlhain nvng kuot khoq teh
nah yomsoq yhung lha ngamoq lyis khyuot yoeus aq.
Jeis dam Rahab lyis vchink chink jap chink soeu ka nvng nghuot.
10 Thomh lyis jeis kanh nhang lha
cho kuot zis yah khyuot yoeus zis xauh bang lyis
yoh lai loh nhang zis eq nvng nghuot.
11 Nvng khyuot lhuiq kat zis xauh bang gas gausyis zis yah
Yerusalem mas jweh las
gauslaus zis yah chunghthwe kaiq kat das.
Nyamoq vjangh pyo das.
Kuk cho mhayah vcaiq vto luiq das.
12 Yhensain taiq:
Ngos gas namoq lyis yomdyei nyeis soeu nghuot.
Mhanh thoq lyis ma zes kham, seq shei dah cangsoeu dius lyis
nvng chamus gyuk nyeis lah?
13 Maukhung lhyi lhywa,
nyeisjvng vpom kuot soeu,
nvng lyis gvnkhanh Yhensain lhyi nvng tohnyhik goeus lhyeh?
Nvng lyis zaiq bang dah nhaiqlom dyis zis,
nvng lyis mhont das zis cicont nghuot bang lyis
chamus vjangh gyuk nyeis goh lah?
Nyamoq dah nhaiqlom dyis zis nvng lyis ma los yoh tanh.
14 Thung lungh bang ma nyangh lyis luiq los das.
Nyamoq chah dah wom jeis dvnganh yoh das las
nyamoq thung mha ma shei das.
15 Ngos gas Yhensain, namoq dah Mangso nghuot.
Ngos thomh lyis zes nhau lha
jeisphauq toq nhang.
Ngah nyings Maukhung Jesphung Yhensain nghuot.
16 Maukhung lhyi lhywa,
nyeisjvng vpom kuot toh.
Ngos gas Yerusalem lyis, Nvng ngah dius jens nghuot!
Ngos nvng lyis ngah jyauh cho dyei goeus.
Ngah loq yah nvng lyis gos toh.
Shanghsenh cho Thank goeus
17 Yerusalem eh, soh los aq,Ref 51.17: Nyoq 14.10, 16.19
toq los aq! Yhensain nhaiqyo las shuk nhang,
joeng dah kom lhyi shuk goeus.
Nvng hauh zis shuk las vtyi vkamh bweh goeus.
18 Nvng lyis choshe das soeu hank ma bos.
Nah dius jens mas nvng lyis
nah loq lyis yah she das soeu dvyuk eq ma bos.
19 Nah thoq mas thyoqpi cho aiq huon jweh los.
Nah maunyeis gas jeszan zis yah jyamhjyuklhyuk mus loh.
Nah dius jens mas phanghkhauq gyoh goeus.
Nvng lyis hank eq nhaiqnyen cho ma chixoeuq.
20 Talhoeu khanghmuh dah chothunk mas
nah dius jens yomnhuk las lains phanh nyeis.
Nyamoq gas shoh khat soeu dah twih khyoq yvmas nyih dah cvt teh nghuot.
Nyamoq gas Mangso dah nhaiqlom tsoeu zis xauh kham goeus.
21 Yerusalem mas dah shanghsenh xauh bang eh,
shuk yet bang teh vtyi vkamh nghuot bang eh,
22 Yhensain, namoq dah Mangso namoq lyis khomp las taiq,
Ngos nhaiqyo zis yah namoq lyis dyei dah kom yoeus tyamp goeus. Ngos namoq lyis shuk nhang dah zvbiq namoq ma shuk lo noh das.
23 Ngos hauh zis namoq lyis zaiq bang lyis dyei das.
Talhoeu mha namoq lyis lains nhang lha
phvlhau lhyi teh nang loh bang lyis dyei das.