49
Dius Nyau xiklyis Bvng zis
1 We we nyeis bang, we dius nyau jens eh, gyo geh!Ref 49.1: Yer 1.5
Ngos ma khoeu shih lyis yah
Yhensain ka ngos lyis khyen lha
nyah jyeidwis duot das xiklyis toeuq toh.
2 Nyang ngah dang lyis moengsa teh zuk nhang.Ref 49.2: Heb 4.12; Nyoq 1.16
Nyang nyah loq yah ngos lyis gos toh dyei.
Nyang ngos lyis nyo teh,
chon lha yhung das xiklyis cicont kuot dyei.
3 Nyang ngos lyis taiq,
Israel eh, nvng ngah jyeidwis nghuot.
Nah gvng mas dius jens ngos lyis chungh das, ge.
4 Ngos gas, Ngos zwi khank goeus, nghuot laus eq hauh zis gas cha vkyuh ma bos lo!
Ngos yomkat goeus laus eq vkom dvnghuot lo.
Nghuot laus eq ngah soe lhyi khomp dyei das xiklyis ngos Yhensain lhyi yoh loms.
Ngos kuot goeus nyhenshang ngos lyis phauh shangh das, oen.
5 Ngos ma khoeu los shih lyis Yhensain ngos lyis toeuq toh.
Nyang ngos lyis dyos joq dah Israel lyis shwih tauh los das nyhenshang,
nyah dius jens lyis shwih tauh los das nyhenshang nyah jyeidwis kuot toh.
Yhensain ngos lyis nyoqnho ngelang dyei;
nyang gas ngah yom vpom nghuot.
6 Yhensain ngos lyis taiq,Ref 49.6: Esa 42.6; Luk 2.32; Lgy 13.47, 26.23
Ngah jyeidwis eh, ngos nah xiklyis zes kuh dah muhzains yoh.
Doeng los dah Israel dius jens lyis
kuhxing cho doms kuot dyei das zis kyingh ma nghuot,
ngos nvng lyis dius nyau khanghmuh dah bvng zis eq kuot nhang das.
Housoeh nyeisjvng gonh khyuot yoeus zis xauh mvbeh, ge.
7 Mangso nyah jyeidwis lyis taiq,
Israel dah gyingshang Mangso,
khyuot yoeus soeu ka, longis khyoq zis xauh soeu,
dius nyau jens yah hoeng zis xauh soeu yahge
guon bang dah jyeidwis lyis taiq:
Nyamoq lyis hwankti jens nyvng das las
phauh nyang cho chixoeuq das xiklyis nyamoq toq das.
Hauh yvlyis zau lo jens eq nyvng das las
nyamoq dupaiq zis yah namoq lyis nyoqnho ngelang dyei das, ge.
Yhensain ka nyah jyeidwis lyis khyen yoeus yvmvyah haih zis bweh los das.
Israel dah gyingshang Mangso ka nyah dangthoengh lyis tyink.
Yerusalem lyis Doms Toeu
8 Yhensain taiq:Ref 49.8: 2Kr 6.2
Nvng lyis khyuot yoeus das shishenh jweh lyis
ngos nvng lyis nyoqnho dyei cho chixoeuq das las
nvng dung dah pangh cho phuk taiq das.
Ngos nvng lyis zungh las gos toh dyei das las nvng masyah dius dvnganh lyis thanghchvp toh.
Gvshih hwangh toh dah maunyeis mas
ngos nvng lyis dvlhain doms toh das.
9 Ngos thung lungh bang lyis,
Luiq loh geh! Chuot yvmas nyeis bang lyis,
Bvng yvmas thuq los geh, oen taiq das.
Nyamoq gas jing jens mas mhanh zo nyeis dah yvng teh tsain nghuot das.
10 Nyamoq khanhamp eq ma yuot ma shet das.Ref 49.10: Nyoq 7.16-17
Nyamoq lyis jyet soeu yah cho she das yvmvyah
buis yahge sihmuis yos mas dah gywes zis nyamoq lyis ma yoh nos nhang.
Nyang gas nyamoq lyis jeisthuq dwang pheh shwih loh das.
11 Ngos boms jens lyis thyet las chomuh kuot das.
Ngah dius jens gyung suh das nyhenshang cho sont das.
12 Ngah dius jens gas we masyah los das.
Buiswvng pheh yah, mautsung pheh yah, mautyi Aswannote 49.12 Aswan wus gas Egutu mau mautyi pheh joq las Jew jens nyoshoq nyeis dah joqyos nghuot. masyah tsain los das, ge.
13 Maukhung jens eh, lvkhyank kat geh.
Nyeisjvng eh, gauslaus zis yah kaiq geh.
Boms jens chunghthwe kaiq hoeu bas jungh.
Yhensain ka nyah dius jens lyis nhaiqtaink das;
shanghsenh dah nyah dius jens lyis nhaiqnyen das.
14 Nghuot laus eq Yerusalem dius jens taiq,
Yhensain ngamoq lyis tyamp goeus!
Nyang ngamoq lyis tohnyhik goeus, ge.
15 Housoeh las Yhensain phuk taiq,
Vmesbih gas nyah lonoeuh lyis yoh tohnyhik lhyeh?
Nyang khoeu dah lo lyis ma jyet lhyeh?
Ungwes yangh nyah lo lyis tohnyhik das.
Ngos gas khanhamp eq nvng lyis ma tohnyhik das.
16 Yerusalem eh, ngos nvng lyis khanhamp eq ma yoh tohnyhik!
Ngos nah nyings lyis ngah loqwu mas tsain lhaih toh goeus.
17 Nah lo jens lvnyap los das,
nvng lyis mhont bang loh lo das.
18 Vyvm vwi yoeuh las cha bweh nyeis yvlyis nyvng aq!
Nah dius jens huom toh - Nyamoq yhen pheh los nyeis!
Ngos Mangso, dwis nyeis zis yah dvyhangteh,
nvng gas nah dius jens gvng mas,
lonyi saiq gas nyang shunk zis lyis khwank teh khwank das.
19 Nah mau gas dyoqbis las jyamhjyuklhyuk mus joq -
nghuot laus eq gvshih gas
houmha los nyeis das bang xiklyis joqyos zvvs das.
Nvng lyis thyoq sanh khoq bang gas
nah jyank masyah we we thot loh goeus.
20 Jonsdoeus loh yvmas khoeu los dah
nah lo jens gas dvnyeih buis lyis nyamoq nvng lyis taiq das zis gas,
Haih mau nyo ngis,
ngamoq nyeis das joqyos chah shih, ge.
21 Hauh thang lhyi nvng nvnyang taiq zo das zis gas,
Ngah xiklyis haih lo jens hank yah yoh zis nghuot au!
Ngos ngah lo jens chithyuk las cha ma yoh lo.
Ngos gas jonsdoeus loh las khat tyamp zis xauh -
Haih lo jens lyis hank nyhoeu bes kat?
Ngvnyang kyingh dvnghuot lo -
Haih lo jens khamhayah los, ge.
22 Yomzains Yhensain nyah dius jens lyis taiq,
Ngos dius nyau jens lyis vsoh dyei das las
nyamoq gas nah lo jens lyis yhen mha shwih los das.
23 Hwankti jens gas nah uwus moq teh,
hwankti nyhiq jens gas nah ungwes moq teh nghuot das.
Nyamoq gas nah xikkhonh mas los dupaiq zis yah nyoqnho ngelang dyei das.
Nyamoq o mha gyoh zis yah phauh nyang cho chixoeuq das.
Housoeh lyis ngos Yhensain nghuot yvlyis nvng seq das.
Ngos pangh das cho lhyi langh nyeis bang hank eq yom ma gyau das.
24 Nvng jeslo dah lvnyhvp yoh yoeus lhyeh?
Lhoeng soeu jyank masyah thung dius lyis yoh khyuot lhyeh?
25 Yhensain phuk taiq,
Heika hau bweh los das cho nyang nghuot.
Jeslo dah thung dius jens lyis shwih loh das.
Lhoeng soeu dah lvnyhvp lyis nyhik das.
Nvng lyis zan bang lyis ngos zan das las
nah lo jens lyis khyuot das.
26 Ngos nvng lyis zaiq bang lyis nyamoq nyang changh sat goh nhang das.
Nyamoq gas dius sat cho yahge nhaiqlom tsoeu cho yah tsain yet das.
Housoeh lyis cangsoeu dius dvnganh gas ngos Yhensain, namoq lyis khyuot yoeus soeu,
namoq lyis luiq los nhang soeu nghuot yvlyis seq das.
Nyamoq ngos Israel dah yomsoq bos Mangso nghuot yvlyis seq das, ge.