47
Babilon lyis Soetuon
1 Yhensain taiq:Ref 47.1-15: Esa 13.1—14.23; Yer 50.1, 51.64
Babilon eh, nah hwankti tank masyah gyoh los aq,
nyeisjvng phvlhau boms mas tsung aq.
Nvng gas dvlhain lonyi gyingh teh hank ma zan ung ku dah wus nghuot laus eq,
nvng gas noeuh las lyes soeu ma nghuot lo.
Nvng gvshih jons dvnghuot lo.
2 Mhoq lang las sunghso phih mhoq aq!
Nyoqnghop khyuot aq, nah dyimis yungh khyuot tyamp aq!
Jeislo lvng tsain goeu das zis nah lhuh toeu aq.
3 Dius jens nvng shohchen nghuot zis nyvng das.
Nyamoq nvng nyhen gyoh zis yahge xoq zis nyvng das.
Ngos lvto phuk das las hank eq ngos lyis ma tomp toh.
4 Gyingshang Israel Mangso ka ngamoq lyis khyuot kat.
Nyah nyings Maukhung Jesphung Yhensain nghuot.
5 Yhensain Babilon lyis taiq,
Soeng soeng noq yvmas samlo tsung toh aq,
nyamoq nvng lyis dius nyau jens dah hwankti nyih ge ma lui lo das.
6 Ngos ngah dius jens lyis nhaiqyo las,
ngah zis ma nghuot lo khyvlyis kuot goeus.
Ngos nyamoq lyis nah yomsoq mas kyauh las,
nvng nyamoq lyis nhaiqnyen cho ma chixoeuq.
Mang goeus bang lyis yangh than than kuot goeus.
7 Nvng gas vjangh hwankti nyih bweh nyeis das ge nghamh las
haih cho jens nah ehnyet mas ma nghamh.
Thang thank cha bweh das zis ma nghamh.
8 Pyo cho lhyi ngwis soeu eh, haih zis gyo aq. Ref 47.8-9: Nyoq 18.7-8
Nvng gas sam joq gau joq ge nghamh.
Nvng gas Mangso teh kuhxing lha
nvng yah doeusgoh zis hank ma bos ge taiq.
Ngos khanhamp eq chauhmuh ma muh das,
nghuot ya nah lo jens dyuk loh zis khanhamp eq ma xauh das, ge nghamh.
9 Nghuot laus eq, hai dvnganh dvnyeih dvm lyis dvsoq kyingh lyis
hai aiq ja yah bweh loh das.
Nvng mandan muot cho vbomsdom kuot laus eq
nvng nah yhensain phoq yahge nah lo jens som loh das.
10 Nvng gas nah dah lhung cho mha nges toh.
Ngos lyis hank ma nyvng das ge nghamh.
Nah joeui yahge seq cho ka nvng lyis shwih whang loh las
nvng nvnyang taiq zo zis gas,
Ngos Mangso nghuot. Ngos yah hank ma doeusgoh, ge.
11 Nah thoq mas dyoqbis zainsmuh jweh los das las hauh yvlyis,
nah mandan cha yah eq ma yoh tomp toh.
Nvng khanhamp eq yhetmoq ma moq dah dyoqbis cho ka
nah thoq mas nyetlos nyettant jweh los das.
12 Loyvm bon masyah nvng kuot dah
hweq kat muh yahge mandan muot muh tsoq kuot aq.
Hauh zis nvng lyis dvtsiq yoh pangh mvbeh.
Nah jeswus jens lyis yoh kyuk tant mvbeh.
13 Nvng joeui dyei cho yoh laus eq nvng gas yomsoq ma bos.
Kyi dah vlho lhyi seq yoeuh bang nvng lyis los khyuot yoeus bas jungh.
Hauh bang gas maukhung mha kyi jens dah cho xuq zis yah suon yoeuh las
nvng mas cha bweh los das cho
nvng lyis nhuot tsuk taiq kyoh das.
14 Nyamoq gas nyisont teh nghuot las
nyi ngeh jom tyamp das.
Nyamoq gas nyamoq nyang yangh ma yoh khyuot yoeus zo.
Hauh nyilhyam ka nyamoq vyvm mas nyi gvng das nyi ma nghuot,
nyamoq xiklyis sunk ngeh zis nghuot.
15 Houka nvng lyis kuot dyei das dah gis cho dvnganh nghuot.
Nah dvzaih gonh nvng yah xamgoh dah kyi cho suon yoeuh bang nghuot.
Nyamoq dvnganh gas nvng lyis tyamp khoq las nyamoq nyang cho pheh loh.
Nvng lyis khyuot yoeus das zis hank ma nyet lo das.