43
Mangso Khyuot das
1 Israel eh, nvng lyis gvnkhanh toh soeu Yhensain heisoeh ge:
Vgyuk, ngos nvng lyis khyuot yoeus das.
Nvng ngah zis nghuot oen ngos nvng lyis nyings yoeus las khi toh.
2 Nvng nauh dah jeis mas goeu lyis ngos nvng yah nghuot das.
Nah dah yau cho ka nvng lyis ma nghop das.
Nvng nyi mas suh lai lyis ma ngeh das.
Yau dah soe thuq los laus eq nvng lyis ma nos nhang das.
3 Khasoeh ge lyis ngos gas Yhensain, nah Mangso,
nvng lyis khyuot yoeus soeu, Israel dah Gyingshang Mangso nghuot.
Ngos nvng lyis khyuot das nyhenshang Egutu lyis dyei tyamp.
Sudan yahge Seba lyis eq hauh nyhenshang dyei.
4 Ngos dius nyau dvnganh lyis, nah kang lhyi khyuot kat nhang das:
khasoeh ge lyis nvng gas ngah xiklyis phauhdap las
ngos nvng lyis jyet zis yah nyoqnho ngelang dyei.
5 Vgyuk, ngos nvng yah nghuot!
We dah buisthuq pheh yah eq we thank buiswvng pheh yah eq
nah dius jens lyis yhen pheh shwih los das.
6 Ngos gas mautsung lhyi, Nyamoq lyis loh nhang aq,
mautyi lhyi, Nyamoq lyis vzwi toh, oen taiq das.
Ngah dius jens lyis we masyah, mungkvn khyiq khanghmuh masyah
tauh los nhang aq, oen das.
7 Nyamoq gas ngvnyang dius jens nghuot las,
ngah xiklyis phunk nyoqnho she los das nyhenshang ngos nyamoq lyis gvnkhanh toh, ge.
Yhensain dah Kanghjyoeng
8 Mangso taiq:
Ngah dius jens lyis yungh mas shwih los geh.
Nyamoq nyoqjeih dap las nyoqjet, no dap las no tsain jet!
9 Dius nyau jens soe taiq yvmas zain bas jungh.
Nyamoq dah mangso jens mas khah mangso ka jweh los das shishenh cho yoh taiq?
Khah mangso ka gvshih cha bweh nyeis cho yoh taiq?
Hauh zis jus cho kyink das zis yahge
hau jyoeng dang lyis taiq toenk dyei das xiklyis hau mangso jens mas dah
kanghjyoeng tsain shwih los bas jungh.
10 Israel dius jens eh, namoq gas ngah kanghjyoeng jens nghuot.
Ngos namoq lyis ngah jyeidwis jens duot nhang das zis khyen yoeus.
Housoeh namoq ngos lyis seq las ngos lyis lomsjingh zis yah
ngos gas dvso kyingh dah Mangso nghuot yvlyis seqgyo das.
Ngos mas lai las gohtoeu mangso ma bos lo.
Xik pheh khanhamp eq ma bos ku, thang pheh eq khanhamp eq ma bos das.
11 Ngos dvyuk kyingh Yhensain nghuot,
Ngos nvng lyis yoh khyuot yoeus soeu nghuot.
12 Cha bweh los das zis ngos taiq toh las
nvng lyis pangh das xiklyis jweh los.
Lvbaus mangso ka heiteh zis khanhamp eq ma kuot ku zis
namoq ngah kanghjyoeng tsain nghuot.
13 Ngos gas Mangso nghuot, vjangh yah nghuot das.
Hank eq ngah yomsoq masyah ma yoh phang luiq.
Ngos kuot yvlyis hank ma yoh thaiq tyamp.
Babilon Masyah Phang Luiq
14 Israel dah Gyingshang Mangso, nvng lyis khyuot yoeus Yhensain heisoeh ge:
Nvng lyis khyuot das nyhenshang ngos Babilon lyis tyi lha jes dvphung nhang das.
Ngos hau wus khomh lyis thyoq khyoq das,
houmha kaiq dah thwe ka ngaus yvpheh lhaiq kat das.
15 Ngos gas Yhensain namoq dah Gyingshang Mangso nghuot.
Israel eh, ngos nvng lyis gvnkhanh toh las ngos namoq dah hwankti nghuot.
16 Yhensain ka gohlhain thomh mas cho kuot,
nesthan jeis mas chokhyoh kuot.
17 Nyang gas jeslhyingh jens yahge nyang jens yah dvgeh
kank bos jesphung lyis dyoqbis loh nhang.
Nyitoengh mas nyiduk lyis nyizos thyet tyamp teh
nyamoq lyis gyoh tyamp nhang lha khanhamp eq ma toq los lo!
18 Nghuot laus eq Yhensain taiq zis gas,
Namoq lai loh goeus dah cho lhyi vlang toh goh.
Gohlhain dah vcauh lyis vnghamh yoeuh lo.
19 Ngos vsaiq kuot das yvlyis zungh yoeuh nyeis aq.
Hauh zis bweh joq goeus namoq gvshih yoh nyvng goeus.
Ngos mhanhdyvp thyet las cho kuot das,
houmha ngos namoq lyis jeislo lvng tsain dyei das.
20 Mhanhdyvp yewus jens yangh ngos lyis nyoqnho ngelang dyei das;
ye khuih jens, gola-u nghoq jens eq ngos lyis chungh das:
Khasoeh ge lyis ngos sihsho yos mas jeislvng tsain yaus nhang lha
ngos khyen yoeus ngah dius jens lyis jeis gvmshuk.
21 Nyamoq gas ngos ngvnyang xiklyis kuot toh dius jens tsain nghuot las
ngos lyis chunghthwe kat das.
Israel dah Yaunos
22 Yhensain taiq,
Nghuot laus eq, Israel eh,
nvng ngos lyis nghoengh las ma paiq lo.
23 Ngheq phudyei das xiklyis nvng nah yvng ngah jyank mas ma chi los.
Nah lomhxangh yah ngos lyis nyoqnho ngelang ma dyei.
Ngos nvng lyis phudyei jyungshuk ma tsoengh sang,
xangh sang lha ma nyung nhang.
24 Nvng ngah xiklyis xangh ma wis,
nghuot ya nah gaunyhauq coeu yah ngos lyis jo nhang zis ma nghuot.
Hauh gungsthaiq nvng nah yaunos yah ngos lyis yvwons lhoq lyei,
nah dah lyi ma chi cho yah ngos lyis nyung nhang.
25 Nghuot laus eq ngos gas nah yaunos khyuot dyei dah Mangso nghuot.
Ngos hauh soeu nghuot yvmvyah nah yaunos khyuot dyei.
Ngos nah yaunos lyis ma comh toh dyei lo das.
26 Soetuon jang mas loh goh; nah zaukauq cho chi los aq!
Nvng gas jus ge zis kyink das nyhenshang nah soe taiq aq.
27 Nah dah cangxeih phauh thyeih yaunos kuot goeus,
nah uhshe bang ngos lyis tyi lha yaunos kuot goeus.
28 Housoeh namoq dah guon bang gas ngah gyingshang joqyos lyis vwot v-oeu kuot.
Housoeh las ngos Israel thoq mas dyoqbis cho she los.
ngos ngvnyang dius jens lyis goessang joqyos kuot goeus.