39
Babilon Loeuskyoh bang
(2Hw 20:12-19)
1 Hauh yoq lyis Babilon hwankti Baladan lo Merodak Baladan gas hwankti Hezekia nos khoq cho xauhgyo. Housoeh las nyang gas Hezekia jyank mas maussauh yahge jyungshuk huon kat.
2 Hezekia gas hau loeuskyoh bang lyis lhom yoeus las nyamoq lyis nyah yhen mha zisyos ge, ngwis xing, xangh ja, phauhdap coeu, jeszis kyonhkhyi dvnganh chixoeuq. Nyang gas nyah zisyos toh yhen yahge nyah munghdan mas joq zis nyamoq lyis ma chixoeuq zis cha ma bos lo.
3 Hauh thang lhyi lvpe Esaia gas hwankti Hezekia jyank mas loh las nyei zis gas, Haih bang khalhye yah los? Nyamoq nvng lyis cha taiq, ge.
Hezekia toeuh zis gas, We dah mau Babilon masyah tsain jweh los, ge.
4 Nyang gas, Nyamoq hwankti yhen mha cha nyvng loh? ge lyis Hezekia gas,
Nyamoq dvnganh nyvng goeus. Ngah zisyos toh yhen mha ngos nyamoq lyis ma chixoeuq zis cha eq ma bos lo, ge.
5 Housoeh las Esaia Hwankti lyis taiq zis gas, Maukhung Jesphung Yhensain taiq.
6 Hwankti yhen mha vyhang dvnganh, khvnyhik jweh shoq nah phauh thyeih moq xo tsainh yung toh zis dvnganh lyis Babilon pheh yoeus loh shishenh jweh los das. Cha eq ma nyet joq lo das, ge.
7 Nvng mas yaus loloeu jens dvyhamh lyis eq shwih loh las Babilon hwankti yhen mha unuk jens khyvlyis phuqsoe das, ge.
8 Hwankti Hezekia gas nyah zaih lyis gas nyenstap cho yahge sam cho bos das ge seqgyo las Esaia lyis toeuh zis gas, Nvng ngos lyis dyei los, Yhensain dah loeus gas gis, ge.