37
Esaia lyis Joeui Sang
(2Hw 19:1-7)
1 Hwankti Hezekia hauh zis xauhgyo lyis kuk zis yah nyah dyimis langchuiq, yanghthung dyimis wuot las Yhensain dah Yhenmuh pheh e loh.
2 Nyang gas, Hwankti Yhen guon soeu Eliakim, lhaih soeu Shebna, phudyei logis jens lyis Amoz lo lvpe Esaia jyank mas nhang kat. Nyamoq eq yanghthung dyimis tsain wuot.
3 Heika Esaia lyis dyei das xiklyis nyang nyamoq lyis taiq kat dah loeus nghuot. Khvnyhik gas yaukyenh xauh dah buisnyeis nghuot: ngamoq gas joeng zis xauh las xoqphuh. Ngamoq gas lokhoeu shishenh jweh laus eq lokhoeu das yom ma bos mus dah vmesbih teh nghuot.
4 Dwis nyeis Mangso lhyi goessang das xiklyis Asiria hwankti ka nyah jeszau zains lyis nhang kat. Yhensain, nah Mangso hai goessang zis xauhgyo las hauh zis taiq bang lyis joeng bas jungh. Doeng los dah ngamoq dius jens xiklyis shvmanh dung dyei aq, ge.
5 Esaia, hwankti Hezekia dah loeus xauh yoeus lyis,
6 Esaia hai phuk dang tauh kat. Yhensain nvng lyis taiq zis gas, Asiria hwankti yah, Mangso nvng lyis ma yoh khyuot yoeus ge dah dang yah kyingh vgyuk vdvn goh, ge.
7 Yhensain ka hauh hwankti lhyi nyamoq mau mas tauh loh nhang das lyeis dang xauhgyo nhang das. Housoeh Yhensain ka nyang lyis houmha sat das, ge.
Asiria Dvlhain Doms Kyuk
(2Hw 19:8-19)
8 Asiria hwankti ka Lakhish wus masyah thuq loh las Libna wus nvm mas bang yah zan goh nyeis cho Asiria zau seq lyis, nyang houmha hwankti yah xamgoh das xiklyis loh.
9 Sudan hwankti Tirhaka uhshe dah Egutu jesphung ka Asiria lyis zan das nyhenshang los nyeis ge dah dang nyamoq jyank mas jweh los. Hauh dang Asiria hwankti xauhgyo lyis nyang Yuda hwankti Hezekia jyank mas maussauh huon lha taiq.
10 Namoq ngah loq mas ma gyoh das ge nvng loms nyeis Mangso nvng lyis taiq. Nghuot laus eq hauh zis nvng lyis vmhuih nhang.
11 Asiria hwankti ka kha mau lyis laus eq nyang mhont das ge nghamh thyet goeus dah mau lyis kuot cho nvng xauhgyo goeus. Nvng phang luiq das oen nghamh lhyeh?
12 Ngamoq dah phauh thyeih moq gas Gozan, Haran, Rezep wus jens lyis tsain mhont tyamp. Telasa wus mas nyeis dah Betheden dius jens lyis sat. Nyamoq dah mangso jens hank eq nyamoq lyis ma yoh khyuot yoeus.
13 Hamat, Arpad, Sephawaim, Hena yahge Iwa wus jens dah hwankti jens khalhye gah? Ma nyvng lo, ge.
14 Hwankti Hezekia gas loeuskyoh bang jyank masyah hauh maussauh yoeus las nghap. Hauh thang lhyi nyang Yhenmuh mas e lha hauh maussauh lyis Yhensain xikkhonh mas loh lhywa toh.
15 Hezekia shvmanh dung,
16 Kherubim jo mas nyeis soeu Israel Mangso, Maukhung Jesphung Yhensain eh, nvng kyingh mungkvn mas dah munghdan dvnganh lyis guon dah Mangso nghuot. Nvng gas maukhung yahge nyeisjvng lyis gvnkhanh toh. Ref 37.16: Dyu 25.22
17 Yhensain eh, xauhgyo dyei aq. Ngamoq mas cha bweh nyeis cho yoeuh dyei aq. Kang dwis Mangso lhyi Senakherib nvng lyis goessang dang dvnganh lyis xauhgyo dyei aq.
18 Yhensain eh, Asiria hwankti jens gas dius nyau nyoshoq lyis mhont las nyamoq mau lyis jyamhjyuklhyuk tsain kuot goeus zis ngamoq dvnganh seq.
19 Nyamoq mangso jens lyis tsain ngheq tyamp. Houka mangso jens ma nghuot, saiq yahge luk lyis dius loq yah kuot dah gungslho dvtsain nghuot.
20 Ngamoq Yhensain Mangso eh, gvshih ngamoq lyis Asiria masyah khyuot kat aq. Housoeh mungkvn mas dah dius nyau dvnganh gas nvng kyingh Mangso nghuot yvlyis yoh seq das.
Hwankti lhyi Esaia dah Loeus
(2Hw 19:20-37)
21 Hauh thang lhyi Amoz lo Esaia gas hwankti Hezekia lyis nyang Senakherib yah sen cho shvmanh dung dah phuk dang los cho loeus kyoh kat.
22 Yhensain taiq goeus: Yerusalem wus gas nvng Senakherib lyis yis, nvng lyis lains kamh nocwih kuot.
23 Nvng goessang soeu, ma phauh gis kuot soeu ka hank nghuot oen nghamh lah? Nvng ngos Israel dah gyingshang Mangso lhyi ma phauh ma nyang kuot.
24 Nvng gas nah jes lhyingh dvnganh yah Lebanon boms nyhang jens lyis ung goeus cho nah jyeidwis jens lyis yah ngos lyis los moengs kyoh nhang. Nvng houmha nyhang thank arit zains jens, yungh thank shvxoeuh zains jens thoeuq lhain lha Lebanon saiqkhyam gungs mas jweh goeus ge moengs.
25 Nvng gohmau mas jeisdwang doeu las jeis shuk, nah jeslo jens dah khyei yah Nile lvng nang kyuk goeus ge, moengs.
26 Ngos hai dvnganh yvlyis gohlhain yah nghamh toeuq goeus yvlyis nvng ma xauhgyo ku lhyeh? Housoeh ngos gvshih kuot kat. Gvshih eq nvng gas ciank ci wus jens lyis mhotkhyot boms kuot tyamp das yomsoq ngos nvng lyis dyei toh.
27 Houmha nyeis bang gas yomsoq ma bos. Nyamoq gas gyuk dvn las chuot lains loh bah ge loh. Nyamoq gas yos mas dah mhanh teh, yhenkhung mha dah nyoq lyis buisthuq lyeis gywes yah muot nyhauh teh nghuot.
28 Nghuot laus eq ngos nah cho dvnganh seq, nvng cha kuot, khalhye loh zis seq. Nvng ngos lyis khasoeh nhaiqyo zis seq.
29 Nvng nhaiqyo cho yahge khwank cho ngos lyis kyoh los, housoeh ngos nvng lyis nho chuq, lungthungh kat las nvng los yvcho shwih tauh loh das.
30 Hauh thang lhyi Esaia hwankti Hezekia lyis taiq. Heika cha bweh los das dah vlho nghuot. Namoq khvzvn yahge sangnhaiq kyingh nyang pheh yuk dah jyo lamh xauh zo das. Nghuot laus eq hauh zvn masyah gas namoq jyo khyoq las xauh yhomh zo das. Zvbiq khyam tsungh las zvbiq shih xauh zo das.
31 Yuda mau mas doeng nyeis shih bang gas, nyeisjvng mas vnyet nauh nauh chent las vshih shih dah vzains jens teh lho lho bweh das.
32 Doeng nyeis bang gas Yerusalem wus yahge Zion boms mas nyeis das. Khasoeh ge lyis heisoeh bweh das cho Maukhung Jesphung Yhensain nghamh thyet las kuot goeus.
33 Heika Asiria hwankti dah cho Maukhung Jesphung Yhensain taiq zis nghuot. Nyang haih wus mas ma wvng das. Nyo dvkhvt eq ma baiq das. Gos tsain chi dah jeslo jens wus nvm mas hank eq ma los das. Yvmlhaink yah gvduk ma doeu das.
34 Nyang los cho chank tauh loh das. Nyang haih wus mas ma wvng das, Ngos Yhensain taiq goeus.
35 Ngos ngah jyeidwis Dawi lyis dangthoengh toh gvng mas eq, ngvnyang dah nyoqnho ngelang gvng mas eq ngos haih wus lyis khomp las gos das.
36 Yhensain dah loeuswons soeu ka Asiria dvp mas loh las jeslo dvsens xetmons oeng khyoengh lyis sat. Nungsnvp mau buh los lyis nyamoq dvnganh shei joq goeus.
37 Hauh thang lhyi Asiria hwankti Senakherib hou mhayah thuq zis yah Ninewe pheh tauh loh.
38 Dvnyeih gas nyang nyah mangso Nisrok dah yhenmuh mha paiq nyeis lyis nyah lotang Adramelek yahge Sharezer gas nyang lyis moengsa yah sat khoq las Ararat mau pheh phang luiq loh. Nyah lo Esahadon gas nyah joqyos mas guon.