34
Mangso Jeswus lyis Joeng das
1 Dius nyau jens dvnganh los huom lha gyo geh. Nyeisjvng gonh yahge houmha nyeis bang yuk khanghmuh heimha los las gyo bas jungh.
2 Yhensain ka dius nyau dvnganh yahge nyamoq dah jesphung lyis nhaiqyo. Nyang nyamoq lyis dyoqbis nhang zis yah joeng.
3 Nyamoq dah mvng lyis ma xauh nyhop, houmha bop joq las tsain nvm das. Boms jens gas suih yah nes joq das.
4 Buislom, lhamhmuh yahge kyi jens gas phih soeh mhont tyamp das. Maukhung ka sauhdain lom tyamp teh dyuk loh das. Kyi jens eq zvbiq nwis nghuot ya, maiphang zain masyah vhuq gywis teh gyoh tyamp das.Ref 34.4: Mat 24.29; Mak 13.25; Luk 21.26; Nyoq 6.13-14
5 Mangso ka maukhung mha nyah sham sont toh las gvshih dyoqbis nhang zis yah joeng das, Edom bang lyis zan das.Ref 34.5-17: Esa 63.1-6; Yer 49.7-22; Ezk 25.12-14, 35.1-15; Amo 1.11-12; Oba 1-14; Mal 1.2-5
6 Yhensain dah sham ka nyamoq dah suih yahge coeu yah dyingh das: houka yvnglo jens yahge shvbeqlo jens phudyei lyis dah suih yahge coeu teh tsain nghuot das. Yhensain ka hau lomhxangh lyis Bozra wus mas lainh das; Hai sat cho zainsmuh Edom mau mas kuot das.
7 Dius jens gas noeuphuk jens, noeuchoq lu lo jens lains teh lains das las nyeisjvng gas suih yah nes las coeu yah dyingh das.
8 Heika Yhensain Zion lhyi khyuot las nyah jeswus jens lyis ung shishenh lyis nghuot das.
9 Edom jeislvng jens gas xoeuhgyei duot loh das, hauh tsohmop gas hwank duot las mau gonh xoeuhgyei ngeh teh ngeh das.
10 Houka nyeih nyenh ngeh las hou mhayah nyikhauh gas vcaiq vto thuq nyeis das. Hauh mau gas dvcaiq thang lhyi dvcaiq jyamhjyuklhyuk joq das las houcho hank ma suh lai das.Ref 34.10: Nyoq 14.11, 19.3
11 Khunghbop yahge kvnhoq jens hauh mau mas dyingh das. Gvnkhanh zis ma bos shih dah yoq lyis teh Yhensain ka hauh mau lyis jyamhjyuklhyuk doms kuot das.
12 Hauh mau lyis guon das hwankti hank ma nyeis, uhshe bang dvnganh eq ma nyeis lo.
13 Hwankti yhen jens yahge ciank ci wus jens mas zoeu zains, zoeu gyomh bos joq. Hauh yvmas khunghbop jens yahge ye khuih jens nyeis das.
14 Yewus jens houmha nyeis yenh das, yius jens dvkoeuq yah dvkoeuq lui goh das. Nyenh dam eq nyang no das joqyos los xo das.
15 Khunghbop jens houmha sot sot zis yah uq uq das las houmha nghoqlo jens muk las nyhoeu kuh kat das. Lvngda jens eq dvdoeu thang lhyi dvdoeu houmha zain los das.
16 Yhensain dah Sauhbuk mas cha ge zis xo nghap yoeuh geh. Hauh yvmas dwis zis dvkoeuq eq ma dyuk das. Nyah dyenschangh ma bos ma mus das. Housoeh bweh aq ge Yhensain vmingh dyei toh, nyang hauh yvlyis dvgeh shwih tsomp dyei das.
17 Nyamoq dvkoeuq dvkoeuq lyis maunyeis gvmboms gvm dyei soeu ka Yhensain nghuot. Nyamoq gas hauh mau mas dvcaiq thang lhyi dvcaiq nyeis las houka nyamoq yah vcaiq caiq sen.