18
Yethro Moshe jyank Kwang los
1 Moshe dah yukphoq Midian phudyei soeu Yethro ka, Moshe nyah vnyau Israel jens lyis Egutu masyah shwih los uhlyis Mangso kuot dyei cho dvnganh xauhgyo.
2 Housoeh las nyang gas nungs pheh nyet joq khoq, Moshe dah yhensain nyhiq Zipora lyis shwih las Moshe jyank mas jweh los.Ref 18.2-3: Dyu 2.21-22
3 Nyah loloeu tang Gershomnote 18.3 Gershom ge zis Hebre mas Lvbaus, ge. yahge Eliezanote 18.3 Elieza ge zis Hebre mas Mangso ngos lyis pangh, ge. eq bos. Moshe taiq zis gas, Ngos lvbaus mau mas boengh duot yenh, ge loloeu dvyuk lyis Gershom ge nyhink.Ref 18.3: Lgy 7.29
4 Gohtoeu dvyuk gas Elieza nyhink. Houka ngah uwus dah Mangso ngos lyis pangh las Egutu hwankti yah sat das yvmas yah khyuot yoeus, ge zis nghuot.
5 Yethro ka Moshe dah yhensain nyhiq yahge nyah loloeu tang yah dvgeh hau mhanhdyvp Moshe thoeng nyeis, Mangso dah gyingshang boms mas jweh los.
6 Ngos nah yukphoq Yethro ka nah yhensain nyhiq yahge nyah lotang yah dvgeh nah jyank los nyeis, ge Moshe lhyi dang tying kat.
7 Housoeh las Moshe ka nyang lyis zes das ge thuq las paiq lho lha bvlot tanh. Nyamoq nyang changh nyang dah yanghzan cho nyei goh lho lha Moshe dah zvng khau mha tsain wvng loh.
8 Moshe ka Yethro lyis Israel jens lyis khyuot das xiklyis Yhensain ka Egutu hwankti yahge dius jens lyis kuot cho dvnganh, cho mha nyamoq yaukyenh cho dvnganh, Yhensain nyamoq lyis khasoeh khyuot yoeus cho tsain taiq kyoh.
9 Yethro ka hauh cho dvnganh xauhgyo lyis nyang gaus zis yah Yhensain lhyi chungh.
10 Nyang taiq, Egutu hwankti yahge dius jens masyah khyuot yoeus dah Yhensain lhyi chungh. Nyah dius jens jons duot nyeis masyah khyuot yoeus dah Yhensain lhyi chungh.
11 Israel jens lyis ma phauh ma danh kuot goeus dah Egutu bang lyis Yhensain housoeh kuot goeus yvmvyah Nyang gas mangso jens dvnganh thoq lyis zes kuhxing yvlyis gvshih ngos seq goeus, ge.
12 Hauh thang lhyi Yethro ka Mangso lhyi ngheq dyei jyungshuk yahge gohtoeu phudyei jyungshuk chi lyih las, Aron yahge Israel uhshe bang dvnganh gas nyang yah dvgeh paiq thang lhyi wom dvgeh tsain zo.
Soetuon bang Toeuq Kat
(Lyi 1:9-18)
13 Nungs nyeih Moshe ka dius jens mas xam ma xonh cho soetuon dyei nyeis. Dius jens eq nvpsangh masyah nyenhthang jweh shoq Moshe vnvm mas yap joq.
14 Moshe kuot chah cho dvnganh Yethro nyvng lyis, nyang nyei zis gas, Dius jens xiklyis nvng kuot cho ka cha nghuot? Dius jens gas nvpsangh masyah nyenhthang jweh shoq nah vyvm mas yap joq, chamus nvnyang kyingh kuot lah, ge.
15 Moshe toeuh zis gas, Hauh dius jens Mangso dah ehnyet lyis xuq das ge ngah jyank mas los yvmvyah ngos haih zis kuot chah.
16 Dius aiq yuk soe bos lyis ngah jyank mas los las ngos gas hau aiq yuk mas hank jus zis nghamh thyet dyei lho lha, Mangso dah tyingtoh dang yahge lyi tsain taiq kyoh, ge.
17 Yethro taiq, Nvng heisoeh kuot zis gas ma jus.
18 Nvng eq, hai dius jens eq nyo shangh das. Haih muh gas nvng kyingh kuot das xiklyis sunk nyo.
19 Gvshih ngos nvng lyis joeui gis dyei bah, ngah dang gyo aq. Mangso eq nvng yah dvgeh nghuot: nvng gas nyamoq xiklyis Mangso xikkhonh mas yap las nyamoq dah soe Mangso lhyi taiq kyoh aq.
20 Nvng nyamoq lyis Mangso dah tyingtoh dang jyauh las nyamoq khasoeh nyeis chah cho yahge cha kuot chah cho phui kyoh aq.
21 Hauh thoq lyis dius jens mas dolhain bang dvyhamh lyis khyen lha uhjyung jens toeuq kat aq. Houka dvkhyoengh, dvxo, oengci, dvci dah uhjyung tsain toeuq kat aq. Nyamoq gas Mangso lhyi gyukwoms las yoh loms bang, khau whot ma zo bang nghuot chah.
22 Nyamoq gas dius lyis soetuon dyei bas jungh, yau dah soe kyingh nah jyank chi los bas jungh, soelo gas nyamoq tuon dyei bas jungh, hauh zis nyamoq nvng lyis thuk las nah muh sunghhuq das.
23 Nvng Mangso tying toh zis heisoeh kuot lyis nvng ma nyung das, dius jens eq nyamoq soe dye thyet lyis nhaiq dainh las nyenstap zis yah yhen pheh loh das, ge.
24 Moshe eq Yethro dah joeui yoeus las,
25 Israel jens dvnganh mas gis bweh bang lyis khyen lha, dius dvkhyoengh, dvxo, oengci, dvci dah uhjyung tsain toeuq kat.
26 Nyamoq gas dius jens dah soelo xiklyis gas nyamoq dah soetuon bang kuot dyei. Soe zains lyis gas Moshe jyank chi los, soelo gas nyamoq nyang dvtuon.
27 Hauh thang lhyi Moshe ka Yethro lyis pont kat las, Yethro eq nyah yhen pheh tauh loh.