14
Thomh Nes Goeu
1 Hauh thang lhyi Yhensain Moshe lhyi taiq zis gas,
2 Israel jens lyis, Tauh los las Bal Zephon nvm Migdol yahge Thomh Nes vjo, Pi Hahirot xik mas thoengnote 14.2 Thoeng ge zis gas gyung suh bang no nyeis, ge zis nghuot. geh, oen taiq aq.
3 Hwankti ka, Israel jens cho whang lha, mhanhdyvp mas cholhunk lhunk toh goeus, ge nghamh das.
4 Ngos gas nyah nhaiqlom lyis lhoq than das las, nyang namoq lyis chank khat das. Nghuot laus eq ngos gas hwankti yahge nyah jesphung lhyi ung das. Hauh zis gas ngos lyis nyoqnho ngelang she los dyei. Hauh uhlyis ngos Yhensain nghuot yvlyis Egutu bang seq das, ge. Israel jens eq nyamoq lyis taiq vgus kuot.
5 Dius jens phang luiq loh cho Egutu hwankti lhyi kyoh los lyis, nyang yahge nyah zau jens auhuiq las taiq zis gas, Yang cha kuot goeus au? Yang Israel jens lyis phang luiq loh nhang goeus, yah jons jens chithyuk goeus, ge.
6 Housoeh las hwankti ka nyah jeslhyingh yahge nyah jesphung cicont tsain sont.
7 Gis thank jeslhyingh khyukxo, gohtoeu Egutu mas dah jeslhyingh dvnganh nyah zau yah nyang shwih las thuq loh.
8 Yhensain eq Egutu hwankti dah nhaiqlom lyis than nhang lha, nyang gas womh womh thuq khoq goeus dah Israel jens lyis chank khat.
9 Housoeh nyang jens dvnganh, jeslhyingh jens, lhyingh komp bang yahge Egutu jesphung ka nyamoq lyis chank khat las, Bal Zephon yahge Pi Hahirot nvm Thomh Nes yvm mas thoeng nyeis yvmas loh chank duons.
10 Hwankti yahge nyah jesphung nyamoq thang mha chank khat jweh los nyeis yvlyis Israel jens nyvng lyis lyis, nyamoq gyuk las Yhensain lhyi pangh aq ge tsain kaiq lui.
11 Nyamoq Moshe lhyi taiq zis gas, Egutu mas lop ma tsain bos lhyeh? nvng ngamoq lyis haih mhanhdyvp mas shei bas jungh ge shwih los lhyeh? Yoeuh aq, nvng ngamoq lyis Egutu masyah shwih thuq los!
12 Heisoeh teh mus das oen Egutu masyah ma thuq shih lyis ngamoq nvng lyis ma taiq lhyeh? Ngamoq Egutu bang dah jons mus nyeis das. Ngamoq mhanhdyvp mas shei das pvgyis gas Egutu bang jyank mas jonsmus das zis gis shih, ge.
13 Moshe toeuh zis gas, Vgyuk goh, samlo dvnyeis geh, khvnyhik Yhensain namoq lyis kuot dyei das khyuot yoeus cho lhyi nyvng das: namoq haih Egutu dius jens lyis khanhamp eq ma doms nyvng lo das.
14 Yhensain ka namoq shot pheh jeszan dyei das las, namoq samlo dvnyeis noh, ge.
15 Yhensain Moshe lhyi taiq zis gas, Nvng ngos lyis chamus kaiq lui? dius jens lyis, Xik pheh loh geh, oen taiq aq,
16 Nvng gas nah lhamloq toeu lha hau thomh thoq mas toeu toh aq. Jeis gas gang loh das las Israel jens hauh thomh mas tungyos cho yoh suh lai loh das.
17 Ngos Egutu bang lyis nhaiqlom than nhang das las, nyamoq eq hauh bang jyank mas bos chank wvng loh das: housoeh ngos hwankti yahge nyah Jesphung, nyah jeslhyingh yahge lhyingh komp bang lyis ung gvng mas ngos nyoqnho yoh das.
18 Housoeh ngos nyamoq lyis ung lhyi ngos Yhensain nghuot yvlyis Egutu bang seq das, ge. Egutu dvp yahge Israel dvp vjo mas los joq. Hauh jyommauh gas Egutu bang lyis xiklyis noq nhang laus eq Israel bang xiklyis gas bvng zis pank dyei las dvnyens gonh hauh jesphung jens gas dvdvp yah dvdvp ma yoh ni goh.
19 Israel dvp xik mas loh dah Mangso loeuswons soeu ka nyamoq dah thang pheh los cheh nyeis. Jyommauh punk eq nyamoq xik masyah cheh las,
20 Egutu dvp yahge Israel dvp vjo mas los joq. Hauh jyommauh gas Egutu bang xiklyis noq nhang laus eq, Israel bang xiklyis gas bvng zis pank dyei las dvnyens gonh hauh jesphung jens gas dvdvp yah dvdvp ma yoh ni goh.
21 Moshe ka nyah loq thomh thoq mas toeu toh. Yhensain eq dvnyens gonh svsoh than dah buisthuq lyeis yah jeis lyis muot tauh kat las hauh thomh gas tungyos bweh joq. Hauh jeis eq gang joq.
22 Israel jens gas hauh thomh mas tungyos chank suh loh. Jeis eq nyamoq dah loqwi loqyos tyoyvm duot joq.Ref 14:22 1Kr 10:1-2; Heb 11:29
23 Egutu bang eq nyamoq dah nyang jens, jeslhyingh yahge komp bang dvnganh nyamoq lyis chank khat las hauh thomh khau mha chank wvng loh.
24 Nyoq ma nyvng shih lyis Yhensain ka hau nyizains yahge jyommauh masyah Egutu jesphung lhyi yoeuh las nyamoq lyis lhoq yau.
25 Nyamoq dah jeslhyinghchvp dap nhang lha lhyingh svsoh loh nanh. Egutu bang taiq zis gas, Yhensain ka yang lyis tyi lha Israel jens shot pheh jeszan dyei, yang heimhayah thuq lo goh, ge.
26 Yhensain Moshe lhyi taiq zis gas, Hauh thomh thoq mas nah loq toeu aq, thomh jeis Egutu bang, nyamoq dah jeslhyingh yahge komp bang thoq mas tauh los bas jungh, ge.
27 Housoeh las Moshe ka thomh thoq mas nyah loq toeu lhyi, nyoqnyvng los lyis hauh jeis gas vgus doms yaus los. Egutu bang jeis masyah phang loh laus eq Yhensain ka nyamoq lyis hau thomh khau mha khyoq tyamp.
28 Hauh jeis tauh los las hauh thomh mas nyamoq lyis chank khat wvng los dah jeslhyingh, komp bang yahge Egutu jesphung dvnganh lyis nghop tyamp las dvyuk eq ma nyet lo.
29 Nghuot laus eq Israel jens gas hau thomh mas tungyos chank yoh suh lai los las hauh jeis gas nyamoq dah loqwi loqyos tyoyvm duot joq.
30 Hauh buisnyeis lyis Yhensain ka Israel jens lyis Egutu bang loq masyah khyuot yoeus. Hauh thomh jyankyvm mas Egutu bang shei joq yvlyis Israel jens nyvng.
31 Yhensain Egutu bang lyis yomsoq zainsmuh yah ung yvlyis Israel jens nyvng las nyamoq Yhensain lhyi tsain gyukwoms. Nyamoq gas Yhensain yahge nyah jyeidwis Moshe lhyi lomsjingh.