12
Lhuiq Kat Pwe
1 Egutu mas Yhensain ka Moshe yahge Aron lyis taiq zis gas,Ref 12:1-13: Lew 23:5; Gyu 9:1-5, 28:16; Lyi 16:1-2
2 Haih lhamhmuh khyvp gas zvn yau zvn namoq xiklyis cangxeih vkhyvp nghuot lo das.
3 Israel moqphung lhyi heisoeh taiq geh: Haih lhamhmuh khyvp ci nyeih lyis vbusbih khanghmuh nyah yhenbang xiklyis dvyhen mha yvnglo nghuot ya beqlo dvdoeu khyen sont toh chah.
4 Dius nain las yvnglo dvdoeu ma yoh zo das lyis gas, dius suon yoeuh las nyah yhen yah ni thank dah yhenkyoh yah xonh lho lha yvnglo dvdoeu toeuq toh das. Dvyhen dvyhen yvnglo dvdoeu yoh zo ko dius suon yoeuh las kuot chah.
5 Yvnglo nghuot ya beqlo, namoq yoeus thuq das vdoeu gas mesyos ma bos, dvzvn dyingh dah vlus nghuot chah.
6 Hauh lhamhmuh khyvp dvci nyei vnyeih nyenhthang lhyi Israel moqphung gonh hauh gaunyhauq sat chah.
7 Shoh zo das yhen dius jens gas hauh suih dvkhamh yoeus las khomh bungs thoq yahge khomh vtoeu mha tsain juot toh chah.
8 Hauh nyenh lyis hauh shoh lyis nyi mas kank las bicheih ma bos dah ohlhyoq yahge anghkhoh huq yah zo chah.
9 Shoh jen eq, puh zis eq vzo goh, Uhloms, khyei, oeu sainh dvnganh nyi mas phot las dvzo geh.
10 Hauh shoh lyis nvpyo jweh shoq vnyhet toh goh. Nyet das zis lyis gas nyi mas ngheq tyamp geh.
11 Namoq haih yvlyis heisoeh zo chah: thyikdom mas dyichih chih, khyei mha thyvkoq koq, loq mas lhamloq chi lha lvnyap nyap zo chah. Houka Yhensain dah Lhuiq Kat Pwe nghuot.
12 Khasoeh ge lyis hauh nyenh lyis Egutu mau mas ngos lai loh las dius eq gaunyhauq eq Egutu yukgis loxeih dvnganh sat das. Egutu mangso dvnganh lyis eq ngos joeng das: ngos Yhensain nghuot.
13 Hauh khomh bungs mas dah suih gas namoq nyeis yhen mha namoq xiklyis vlho jyih toh zis bweh das las, ngos hauh suih nyvng lyis namoq lyis lai toh khoq das. Housoeh ngos Egutu mau lyis yobos dyei uhlyis, namoq lyis ma zangh das.
14 Hauh buisnyeis gas ngos Yhensain namoq lyis cha kuot dyei cho soh nhang lha Yhensain xiklyis pwe tsain kuot das. Houka namoq jweh los das shishenh dvnganh mas haih buisnyeis lyis pwe kuot das.Ref 12:14-20: Dyu 23:15, 34:18; Lew 23:6-8; Gyu 28:17-25; Lyi 16:3-8
Bicheih Ma kat Ohlhyoq zo Pwe
15 Yhensain taiq zis gas, Namoq nyhet nyeih top bicheih kat dah ohlhyoq vzo. Bicheih ma kat ohlhyoq kyingh dvzo geh. Cangxeih vnyeih lyis namoq yhen mha dah bicheih dvnganh tyungh tyamp chah. Khasoeh ge lyis hau nyhet nyeih gyo lyis bicheih kat dah ohlhyoq zo soeu lhyi ka ngah dius oen ma nghamh lo.
16 Cangxeih nyeih lyis eq, nyhet vnyeih lyis eq paiq cho kuot das nyhenshang huom chah. Hau aiq nyeih gyo lyis yuk khanghmuh zo chah wom ba zo laus eq gohtoeu muh cha eq ma gis zwi.
17 Namoq hau pwe lhyi chank kuot nyeis das. Khasoeh ge lyis hauh buisnyeis lyis ngos namoq dah vnyau jens lyis Egutu masyah shwih thuq los. Housoeh namoq jweh los das shishenh dvnganh mas haih buisnyeis lyis pwe yoh kuot das.
18 Cangxeih lhamhmuh khyvp dvci nyei vnyeih nyenh masyah aiqci dvnyeih nyenh jweh shoq namoq bicheih ma bos ohlhyoq zo nyeis das.
19-20 Namoq yhen mha nyhet nyeih top bicheih ma gis joq. Boenghwus laus eq, hauh mau mas khoeu los soeu laus eq bicheih kat dah ohlhyoq zo soeu lhyi ka ngah vnyau oen ma nghamh lo das, ge.
Cangxeih Lhuiq kat Pwe
21 Moshe ka Israel logis jens dvnganh lyis khi lha taiq zis gas, Namoq nyang yuk nyang yhen xiklyis yvnglo nghuot ya beqlo sat das zis khyen toh geh. Housoeh namoq yhenbang Lhuiq Kat Pwenote 12.21 Lhuiq Kat Pwe ge zis gas Mangso Israel jens lyis tying toh zis yah dvyhangteh, yhenkhomh thoq mas yvnglo suih ma dap dah yhen mha ka loxeih sat ge dah joeng cho xauh. Israel jens gas hau joeng cho mhayah luiq los. Hauh yvlyis soh dah pwe kuot zis nghuot. yoh kuot das.
22 Shomnhamh dvkyang yoeus las khuq mas bos dah suih mas jen lho lha khomhbungs thoq yahge khomh vtoeu mha buot tap toh chah: Nvpyo jweh shoq nah yhen nghe pheh hank eq vthuq loh.
23 Khasoeh ge lyis Egutu bang lyis yobos dyei das ge Yhensain lai loh das: hau khomhbungs thoq yahge khomh vtoeu mas dah suih nyvng lyis Yhensain hauh khomh lyis lai toh khoq das las mhont soeu lhyi namoq yhen mha ma wvng sat nhang das.Ref 12.23: Heb 11.28
24 Houka namoq yahge namoq lo jens gas haih lyi jens lyis vcaiq vto chank nyeis chah.
25 Yhensain namoq lyis dyei das ge dangthoengh toh dah mau mas jweh lyis namoq haih Lhuiq Kat Pwe kuot nyeis chah.
26 Namoq lo jens namoq lyis, Haih pwe dah vjyuk cha nghuot lah, ge nyei lyis,
27 namoq taiq das zis gas, Yhensain Egutu bang lyis sat uhlyis Israel jens yhen lhyi lai toh khoq zis yah yang lyis lhuiq kat yvmvyah Yhensain lhyi chungh dah Lhuiq kat phudyei nghuot, ge.
Housoeh Israel jens gas tsain paiq gop joq.
28 Hauh thang lhyi nyamoq gas Yhensain Moshe yahge Aron lyis tying toh zis loh tsain kuot.
Loxeih Shei
29 Yhensain ka gungsgvm lyis hwankti tank thaiq das Pharao dah yukgis loxeih masyah thung lungh nyeis soeu dah loxeih jweh shoq, Egutu yukgis loxeih dvnganh lyis sat; gaunyhauq suot xeih dvnganh lyis eq sat.Ref 12.29: Dyu 4.22-32
30 Hauh nyenh lyis Pharao yahge nyah zau jens eq, Egutu mau gonh mas bang shei uh toq ngauh nyeis. Khasoeh ge lyis houmha lo ma shei yhen dvlom eq ma bos lo.
31 Hauh nyenh lyis Pharao Moshe yahge Aron lyis khi lha taiq zis gas, Nah zomh yahge namoq dah Israel jens thuq loh geh; Ngah mau masyah thuq las namoq sang vgus Yhensain lhyi loh paiq geh.
32 Namoq dah yvng shvbeq gaunyhauq phung komp loh geh. Ngos lyis eq shvmanh dung dyei toh khoq geh, ge.
33 Egutu bang gas nyamoq lyis hauh mau masyah lvnyap thuq loh das xiklyis yomdyei. Nyamoq taiq zis gas, Namoq ma thuq loh lyis gas ngamoq dvnganh shei das.
34 Housoeh las dius jens gas bicheih ma bos ohlhyoq jen lyis auh mas tyink, hauh yvlyis dyimis yah thop las wuq loh.
35 Moshe taiq toh vgus, Israel jens kuot las ngwis, xing, phauhdap luk yahge dyimis Egutu bang jyank masyah sang yoeus.Ref 12.35-36: Dyu 3.21-22
36 Yhensain ka Israel jens sang zis yoh das nyhenshang Egutu bang nyamoq lyis phauh nyang los shoq kuot dyei. Housoeh Israel jens gas Egutu bang dah zisyos yoeus loh.
Israel jens Egutu masyah Thuq
37 Israel jens gas Ramese masyah Sukot pheh khyei cho loh. Nyamoq gas vmesbih jens, loshang jens ma suon yukgis khyuk sens ko nghuot.
38 Gohtoeu dius jens nyoshoq, yvng shvbeq, gaunyhauq phung nyoshoq eq nyamoq yah dvgeh bos loh.
39 Egutu masyah mangh mangh khat thuq zis tsain xauh las ma yoh sheq nyeis lo, zokho ma yoh ba lo yvmvyah Egutu masyah wons los dah ohlhyoq lyis bicheih ma bos bos housoeh tsain piq zo.
40 Israel jens Egutu mas e nyeis zis nyeixo somhci zvn nghuot.Ref 12.40: Vpm 15.13; Gal 3.17
41 Nyeixo somhci zvn dyingh nyeih lyis, Yhensain dah vnyau jens dvnganh Egutu masyah thuq khoq.
42 Yhensain nyamoq lyis Egutu masyah shwih gomh thuq los zis gas nyenh lyis nghuot. Hauh nyenh gas Israel jens vcaiq caiq chank kuot nyeis das, zes soh gis dah Yhensain dah nyenh nghuot.
Lhuiq Kat Pwe
43 Yhensain Moshe yahge Aron lyis taiq zis gas, Heika Lhuiq kat phudyei dah tyingtoh dang nghuot: gohnyau bang hank eq lhuiq kat lomhxangh ma gis zo.
44 Nghuot laus eq ngwis wis jons gas vthyoh tyomh goeus ya gis zo.
45 Dvsoq los dah boengh yahge uhkung phauh zo dah uhkung dvnghuot lyis gas hauh zis ma gis zo.
46 Dvyhen mha sont dah shoh gas hauh yhen khau mha dye shoq zo chah. Hauh shoh lyis nghe pheh ma gis chi thuq loh. Hauh shohyau dvkoeuq eq ma gis khyauh.Ref 12.46: Gyu 9.12; Yoh 19.36
47 Israel moqphung gonh hauh Pwe Kuot Chah.
48 Nghuot laus eq vthyoh ma tyomh soeu ka hauh pwe ma gis zo. Namoq jyank mas los nyeis dah boenghwus gas Lhuiq Kat Pwe kuot zis yah Yhensain lhyi phauh nyang mes lyis gas, nyamoq yhen gonh mas dah yukgis lo jens dvnganh vthyoh shih tyomh chah. Housoeh hauh soeu ka hauh mau mas choq thyet dah Israel jens teh nghuot goeus yvmvyah, nyang hauh pwe mha bos gis zo.
49 Houmha choq thyet bang yahge namoq jyank mas los nyeis boenghwus xiklyis lyi dvja kyingh dvnghuot, ge.
50 Yhensain Moshe yahge Aron lyis taiq toh vgus Israel jens dvnganhmoq chank kuot.
51 Hauh nyeih lyis nyang, Yhensain ka Israel vnyau jens lhyi Egutu masyah shwih thuq los.