8
Yoh Phuk Zan Das cho taiq
1 Hauh nyeih lyis nyang Hwankti Xerxes gas, Jew jens dah jeswus Haman dah vyhang dvnganh hwankti nyhiq Esther lhyi kyauh. Esther ka hwankti lhyi, Mordekhai gas nyang cha doeus cho taiq kyoh las hauh nyeih masyah Mordekhai ka hwankti xikkhonh mas yoh wvng.
2 Hwankti eq Haman jyank masyah tauh yoeus dah nyah kyihau loqkyop khyuot las Mordekhai lhyi dyei. Esther eq Mordekhai lhyi Haman dah vyhang lhyi yoeuh guon nhang.
3 Hauh thang lhyi Esther ka hwankti khyeiyang mas gop ngaus las doms taiq. Agag dah vnyau vshih Haman gas Jew jens lyis tyi lha lhaink dah ma gis cho kuot goeus yvlyis tomp tyamp dyei das cho doms dung.
4 Hwankti ka nyah xing dunghkuq Esther jyank pheh tuonh kat. Housoeh las nyang toq yap las taiq.
5 Hwankti nhaiqdoeus lyis, nvng ngah cho loqzamh zwi lyis, lho lha hwankti xiklyis jus teh nghuot lyis, Hwankti dah munghdan mas nyeis Jew jens dvnganh lyis sat tomh das ge Agog vnyau vshih, Hamedatha lo Haman kuot das ge vmingh dyei yvlyis gos dah hoeuh cho jenh thuq kat dyei aq.
6 Ngah dius jens thoq mas haih dyoqbis zainsmuh jweh lyis, ngvnyang dah sainhchangh jens sat xauh yvlyis ngos khasoeh yoh yoeuh nyeis das lah, ge.
7 Housoeh hwankti Xerxes gas hwankti nyhiq Esther yahge Jew Mordekhai lhyi taiq zis gas, Yoeuh aq Haman gas Jew jens lyis tyi lha lhaink dah xiklyis ngos nyang lyis lhangh sat goeus. Nyah vyhang eq Esther lhyi kyauh goeus.
8 Nghuot laus eq hwankti nyings yah lhaih las hwankti kyihau tap zis yah hoeuh cho thuq kat goeus yvlyis hank eq ma yoh yoeus tyamp lo. Nghuot laus eq namoq Jew jens lyis lhaih mes khyvlyis gis lhaih. Hauh zis ngah nyings yah lhaih, hwankti kyihau tap las Jew jens lyis lhaih kat geh, ge.
9 Haih zis bweh zis gas Siwan ge lhamhmuh somh vkhyvp, aiqci somh vnyeih lyis nghuot. Mordekhai gas hwankti maussauh lhaih bang lyis khi, nyang taiq zis lhaih nhang dah maussauh lyis India mau masyah Ethiopia mau jweh shoq 127 mauxom mha nyeis Jew jens, mungh zau Guon bang yahge zau jens dvnganhmoq jyank mas lhaih kat. Hauh maussauh gas nyah mauxom Kat dah nyingh, nyang lhaih maussauh khyvlyis, Jew jens lyis eq nyamoq nyingh, nyang lhaih maussauh khyvlyis lhaih dyei.
10 Mordekhai gas hauh maussauh lyis hwankti Xerxes nyings yah lhaih goeus, hwankti kyihau tap. Hauh maussauh lyis nyang ji bang gas hwankti nyang zungs mas yvng dah nyang jens ji las loh tsain dih.
11 Hauh maussauh mas phui kyoh cho ka, hwankti ka, wus khanghmuh mas nyeis dah Jew jens gas nyamoq nyang kang lhyi khomp zo das xiklyis xamxom cho kuot das zis toeuh dyei. Khah mauxom mha laus eq Jew jens lyis los zan bang lyis yoh phuk zan, nyamoq dah loshang jens yahge vmesbih jens lyis eq yoh sat, yoh mhont, nyamoq dah zisyos lyis yoh lhuot yoeus, ge.
12 Haih zaudang gas Persian munghdan dvkhauyah Adar ge, lhamhmuh dvci aiq vkhyvp, dvci somh vnyeih, Jew jens lyis sat tomh das ge toeuq toh nyeih lyis kuot das zis nghuot.
13 Hauh buisnyeis jweh lyis Jew jens gas nyamoq dah jeswus jens lyis lvto yoh phuk das xiklyis cicont nghuot das nyhenshang hauh zis lyi khyvlyis mauxom khanghmuh mas, dius yuk khanghmuh seq shoq taiq hoeuh chah.
14 Hwankti dah vmingh yah nyang ji bang gas hwankti nyang jens ji las tsain pant thuq khoq. Hauh zau dang gas wusmuh Susa mas eq tsain taiq hoeuh kat.
15 Mordekhai ka vthyoeu, vlanh hwankti dyixing wuot, nes noq misyhwiq lungphauq wuot yunghshop xing buismuk tsungh zis yah hwankti yhen masyah thuq loh. Hauh uhlyis Susa wus talhoeu mha chungh dah thwe, gauslaus thwe yah tsain kaiq.
16 Jew jens xiklyis ehnyet sunghhuq las gauslaus cho, pyo cho yahge ung cho yoh shishenh nghuot.
17 Hwankti dah hoeuh kat cho nghap kyoh dah wus khanghmuh, mauxom khanghmuh mas dah Jew jens gas gauslaus xent nyeih toh, pyo pyo pwe tsain kuot. Gvshih gohtoeu dius jens nyoshoq gas Jew jens lyis gyuk yvmvyah Jew tsain bweh loh.