47
Yaus nyeis Jeislo Lvng
1 Hauh dius yuk gas ngos lyis Yhenmuh wumuk pheh shwih tauh loh. Jeis gas wumuk vjeis masyah thuq nyeis las Yhenmuh ganthoq xoeu toh dah buisthuq shot pheh yaus loh. Houka Yhenmuh mautyi vchink vkhyei mhayah yaus thuq las phon dah mautyi shot cho yaus lai loh.Ref 47.1: Zek 14.8; Yoh 7.38; Nyoq 22.1
2 Tsai, nyang ngos lyis Yhenmuh khyam mhayah mautsung khyam khomh cho shwih thuq las buisthuq pheh xoeu toh dah khyam khomh pheh shwih lhain los. Mautyi shot hau khyam khomh mas jeislo dvlvng yaus thuq nyeis.
3 Hauh soeu ka nyah keqseh yah hau jeislvng lyis buisthuq pheh 560 gaiq keq gyoh loh. Lho lha nyang ngos lyis houmha goeu loh aq, ge. Jeis gas ngah khyeinyoqtyon mha kyingh dvjweh.
4 Tsai, nyang gohtoeu 560 gaiq doms keq lyis jeis gas ngah phvlukchvp mas jweh los. Tsai, gohtoeu 560 gaiq we shoq keq gyoh loh lyis jeis gas ngah thyikdom mas jweh los.
5 Nyang 560 gaiq keq shih, hauh jeislvng gas svsoh nauh las ngos ma yoh goeu loh lo. Houka nyo nauh las jeisbat bat ma nghuot lyis gas ma yoh goeu loh lo.
6 Nyang ngos lyis taiq, Lvcang eh, haih dvnganh lyis vlhomuh comh toh aq, ge.
Hauh thang lhyi hauh soeu ngos lyis jyankyvm pheh shwih tauh los.
7 Ngos houmha jweh lyis, jyankyvm aiq shot chank saiq nyaus zains nyoshoq lyis nyvng.
8 Nyang ngos lyis taiq, Haih jeis gas haih mau chank yah buisthuq shot pheh yaus lai loh las Yodan Langhkhau chank Coh Thomh mas wvng loh. Hauh zis Coh Thomh mas wvng lyis coh ngvm jeis lyis jeis nghamh thaiq dyei.
9 Hau jeislo lvng khalhye yaus loh khalhye gaunyhauq ja khanghmuh yahge oengdoq nyeis das. Hau jeislo lvng gas Coh Thomh jeis lyis jeis nghamh kuot dyei das, hauh jeis khalhye yaus loh khalhye houka kang dyei das.
10 Engedi jeisthuq dwang jens masyah En Eglaim jeisthuq dwang jens mas jweh shoq thomh yvm chank yah oeng nhoh bang nyeis das. Nyamoq houmha nyamoq dah nyho lhap das. Houmha Mediteranean Thomh mas teh oeng vja ja nyoshoq nyeis das.
11 Nghuot laus eq Gyoplang jeis yahge thomhlo jeis gas ma nghamh das: houka coh xiklyis nyet joq das.
12 Hau jeislo lvng jyankyvm aiq shot chank yah zonoms dyei dah saiqzains vja ja yuk das. Nyamoq dah vhuq khanhamp eq ma nyhauh, vshih eq ma wui das: lhamhmuh khyvp khanghmuh nyhink dah shih bos das. Khasoeh ge lyis hau shih zains jens gas Yhenmuh masyah yaus thuq dah jeis xauh shuk. Hau saiqzains jens gas zonoms dyei, nyah vhuq gas dius lyis nos yhoh das yvmas yhung.Ref 47.12: Nyoq 22.2
Maukyo jens
13 Yomzains Yhensain taiq. Heika Israel dvci aiq koq mas gvm das maunyeis maukyo tsain nghuot. Yosep gas mau gvmboms aiq koeuq xauh yoeus das.
14 Ngos namoq dah phauh thyeih moq lyis mau sain das zis dyei das oen dangthoengh toh. Gvshih hauh mau namoq mas dvyih yih gvm yoeus geh.
15 Mautsung pheh maukyo ka Mediteranean Thomh masyah buisthuq pheh Hetlon wus, Hamat langhwuq, Zedad wus,
16 Damasku munghdan yahge Hamat munghdan jo mas joq dah Berotha yahge Sibraim wus jens pheh, Hauran wuxom maukyo nvm mas joq Tikhon wus jweh shoq loh.
17 Housoeh mautsung pheh maukyo ka, Mediteranean Thomh masyah buisthuq pheh Enon wus jweh shoq loh. Heika Damasku dah mautsung maukyo nghuot. Hamat mau gas hauh maukyo dah mautsung pheh nghuot das.
18 Buisthuq pheh maukyo ka Damasku mau yahge Hauran mau vjo dvjoq masyah mautyi pheh gyoh loh. Yodan lvng gas buiswvng pheh Israel mau dah maukyo yahge buisthuq pheh Gilead mau dah maukyo bweh joq. Houka Coh Thomh thoq, Tama wus jweh shoq nghuot.
19 Mautyi pheh maukyo ka, Tama masyah buiswvng mautyi pheh Kadesh Meriba jeisdwang jens chank gyoh thang lhyi buiswvng mautsung pheh Egutu maukyo chank yah Mediteranean Thomh jweh shoq nghuot.
20 Buiswvng shot Mediteranean Thomh yah maukyo kuot toh, mautsung pheh Hamat langhwuq dah buiswvng pheh dvjoq mas loh zop. Houka buiswvng shot maukyo nghuot.
21 Haih mau lyis namoq vkoq jens mas gvm yoeus geh.
22 Haih zis gas namoq vjangh sain toh das vso nghuot. Namoq maunyeis gvm uhlyis namoq mas nyeis dah lvbaus haih mau mas lo jens khoeu los bang eq nyamoq dah gvmboms maunyeis xauh yoeus das. Nyamoq lyis Israel jens teh kuot chah. Doeugoh zis yah nyamoq lyis Israel vkoq jens yah dvyih maunyeis gvm dyei chah.
23 Vjangh nyeis dah lvbaus dvnganh gas khah vkoq mas nyeis lyis houmha maunyeis gvmboms yoh das. Ngos Yomzains Yhensain taiq goeus.