41
1 Hauh thang lhyi nyang ngos lyis Gyingshang joqyos, vgungs yvp mas shwih loh. Nyang houmha wvng loh dah cholo lyis keq lyis, houka 10 pe xing.
2 18 pe lvm las thyi shot haq shot tyoyvm gas 8 pe thoeu. Nyang hauh yvp lyis keq lyis houka xing choeu 68 pe, lvm choeu 34 pe nghuot.
3 Hauh thang lhyi nyang vkhau yvp pheh wvng loh. Nyang houmha loh dah cholo lyis keq lyis houka 3 pe nauh las 10 pe lvm. Thyishot haqshot tyoyvm gas 12 pe thoeu.
4 Nyang hau yvp lyis keq lyis houka 34 pe soehuq thunk nghuot. Haih yvp gas vgungs yvp dah thyishot yvp nghuot. Hauh thang lhyi nyang ngos lyis taiq. Haih zis gas Gyingshang thank joqyos nghuot, ge.
Yhenmuh Tyoyvm mas Yvp jens
5 Hauh vbusbih gas vkhau pheh Yhenmuh tyoyvm thoeu choeu keq lyis, houka 10 pe nghuot. Haih tyoyvm lyis nges las Yhenmuh yvmlhaink yah 7 pe lvm dah yvplo jens tsain bos.
6 Haih yvp jens gas somh tsank tsank nghuot las dvtsank dvtsank mas somhci yvp bos. Yhenmuh nghe pheh tyoyvm gas dvtsank dvtsank, nyhen mha vtsank thoq lyis zes zes bu doq loh. Housoeh las hauh yvp jens gas nyamoq ma nghweh goh goh, tyoyvm mas yoh joq.
7 Housoeh las Yhenmuh tyoyvm jens lyis nghe mhayah yoeuh lyis, vthyoh jweh shoq dvyhangteh thoeu doq joq teh dvdoeus. Hauh yvp jens dah nghe pheh, Yhenmuh dah nghe tyoyvm lyis nges las lvm dah zvmlhangh cho aiq khvt ci toh. Housoeh hauh zis gas nyhen tsank masyah vgungs tsank yahge nyhang tsank pheh yoh loh.
8-11 Haih yvp jens dah nghe pheh tyoyvm gas 8 pe thoeu. Houmha Yhenmuh dah mautsung pheh dah yvp jens mas loh dah khomh dvkoeuq, mautyi pheh yvp jens mas loh dah khomh dvkoeuq bos. Yhenmuh yvmlhaink yah 8 pe lywas shoq tsoh nhangh las nyhang joq yvlyis ngos nyvng. Houka nyeisjvng masyah 10 pe nyhang doq las Yhenmuh tyoyvm mas dah yvp jens dah vpom yah dvyih yih nghuot. Hau tsoh nhangh toh joqyos yahge phudyei bang yhung dah yhen jo mas, 34 pe lywas las ngo dah joqyos Yhenmuh yhen yvm chank yah bos.
Buiswvng pheh Yhen
12 Yhenmuh dah buiswvng shot pheh ngo joqyos vthang mha 150 pe xing lha 116 pe lywas dah yhen dvyhen bos. Hauh yvmlhaink tyoyvm gas 9 pe thoeu.
Yhenmuh Yhen Keq Cho
13 Hauh vbusbih Yhenmuh nghe pheh keq lyis houka 168 pe xing. Yhenmuh ganthung mhayah ngo dah joqyos lai las buiswvng pheh yhen thang jweh shoq eq 168 pe we.
14 Thyishot haqshot ngo joqyos yah dvgeh Yhenmuh ganthoq thyet loh zis eq 168 pe we.
15 Nyang, ganjangh aiq shot yah bos dah yhen xing choeu lhyi buiswvng pheh keq loh. Hou eq 168 pe bos.
Yhenmuh
16 Yhenmuh gyingshang joqyos wumuk yvp yahge Gyingshang Thank joqyos lyis thyangh mhayah khomhbaiq jweh shoq saiq yah ban shunk toh. Hau khomhbaiq jens lyis yoh nghop toh.
17 Yhenmuh vtheh tyoyvm mas khomh vtoeu hweq nyhang shoq shoq Kherubim yahge dyoms zains silho dyingh shoq yah thwang nghop toh.
18 Kherubim aiq koeuq jo mas dyoms dvzains zains mulas yvp yvmlhaink yah nghuot. Kherub dvkoeuq mas nyoqnho aiq koeuq koeuq dap.
19 Houka dius nyoqnho yahge khangkhyi nyoqnho nghuot las, dius nyoqnho dvshot dyoms zains pheh xoeu lha, khangkhyi nyoqnho ka gohtoeu dvshot dyoms zains pheh xoeu toh. Housoeh teh tyoyvm yvmlhaink yah bos.
20 Thyangh masyah khomh vtoeu jweh shoq shoq nghuot.
21 Gyingshang joqyos dah khomhzains gas soefangh tsain nghuot.
Saiq Phon
Gyingshang thank joqyos dah wumuk xik mas
22 saiq Phon teh doeus zis dvkoeuq joq. Houka 5 pe nyhang lha 4 pe lvm. Nyah vthunk zains jens, hauh vkhyei yahge nyah vyvm dvnganh gas saiq yah kuot toh. Hauh vbusbih ngos lyis taiq zis gas, Haih zis gas Yhensain dah xikkhonh mas toh dah kihgus nghuot, ge.
Khomh jens
23 Gyingshang joqyos mas loh dah cholo vthang mha khomh dvkoeuq bos. Gyingshang Thank Joqyos mas loh dah cholo vthang mha eq khomh dvkoeuq bos.
24 Vgungs masyah phank dah aiq shan khomh nghuot.
25 Tyoyvm mas thwang toh teh, Gyingshang Joqyos khomh mas Kherubim yahge dyoms zains silho tsain thwang tap toh. Wumuk yvp dah nghe pheh khomh cho mha thyeh yah mau toh.
26 Haih yvp dah tyoyvm jens mas khomhbaiq tsain bos. Tyoyvm jens eq dyomszains silho yah tsain shunk toh.