37
Shohyau Kyuk Langhkhau
1 Ngos mas Yhensain dah yomsoq jweh joq zis soh. Nyah dyos gas ngos lyis shwih loh las nyeisjvng mas shohyau yah nghop joq dah langhkhau mha toh.
2 Nyang ngos lyis hau langhkhau dvkhauyah shwih loh. Ngos houmha shohyau vbomsdom joq yvlyis nyvng, houka svsoh kyuk goeus.
3 Nyang ngos lyis taiq, Lvcang eh, haih shohyau jens kang vyoh dwis los das lah, ge. Ngos gas, Yomzains Yhensain eh, hauh yvlyis nvng kyingh dvyoh phuk taiq, oen.
4 Nyang taiq, Haih shohyau jens lyis pe aq: Haih shohyau kyuk jens lyis Yhensain dang gyo geh, oen taiq aq.
5 Nyamoq lyis ngos Yomzains Yhensain taiq nyeis oen taiq kyoh aq. Ngos namoq vkhau mha soq kat dyei das las namoq lyis dwis los nhang das.
6 Ngos namoq lyis gyi kat dyei las shoh dap los nhang zis yah shohyeis kyop das. Ngos namoq mas soq kat dyei las kang dwis nhang das. Housoeh ngos Yhensain nghuot yvlyis namoq seq das, ge.
7 Housoeh las ngos lyis taiq vgus ngos pe. Ngos taiq nyeis lyis, nhont thwe dvkoeuq xauhgyo. Hauh uhlyis shohyau tsain tsoqgoh loh.
8 Ngos zungh yoeuh nyeis uhlyis, shohyau mas gyi dap shoh dap los zis yah shohyeis kyop los. Nghuot laus eq gungsdom mas soq ma bos.
9 Mangso ngos lyis taiq, Lvcang eh, soqnote 37.9 Soq, Dyos nghuot ya, Lyeis nghuot. lyis pe aq. Shot khanghmuh masyah los las haih shei gungs khau mha soq muot kat dyei zis yah tsain dwis los nhang aq, ge Yomzains Yhensain tying toh, oen soq lyis taiq kyoh aq, ge.
10 Housoeh las ngos lyis taiq vgus ngos pe. Hau soq gas gungs jens khau mha wvng las nyamoq tsain dwis los toq yap joq. Nyamoq gas jes dvphung zainsmuh bweh joq.Ref 37.10: Nyoq 11.11
11 Mangso ngos lyis taiq, Lvcang eh, Israel dius jens gas haih shohyau jens yah doeusgoh. Nyamoq taiq lyis hauh zis gas kyuk goeus, nghamhloms chank ma bos lo, dyoqbis goeus, ge.
12 Housoeh las ngah dius Israel jens lyis pe aq, ngos Yomzains Yhensain ka nyamoq dah lop lyis tsain phank das oen taiq kyoh aq. Ngos nyamoq lyis shwih thuq las Israel mau mas shwih tauh los das.
13 Ngos ngah dius jens nyhop toh dah lop tsain phank las nyamoq lyis shwih thuq los lyis ngos Yhensain nghuot zis nyamoq seq das.
14 Ngos nyamoq mas ngah dyos kat dyei lyis nyamoq dwis das las, nyamoq nyang mau mas nyeis nhang das. Housoeh lyis ngos Yhensain nghuot zis nyamoq seq das. Ngos gas haih zis kuot das oen dangthoengh toh las kuot tyink. Ngos Yhensain taiq goeus.
Yuda yahge Israel
15 Yhensain ngos lyis doms jis.
16 Nyang taiq, Lvcang eh, nvng wuseh dvkoeuq yoeus las houmha, Yuda munghdan, ge dah dang lhaih aq. Gohtoeu wuseh dvkoeuq doms yoeus las, houmha Israel munghdan, ge dah dang lhaih aq.
17 Hauh wuseh aiq koeuq tsoq aq; nah loq mas dvkoeuq teh bweh los das.
18 Nah dius jens nvng lyis, Hai vjyuk cha nghuot zis taiq kyoh aq, ge nyei lyis,
19 Nvng nyamoq lyis, ngos Yomzains Yhensain ka Israel gungsthaiq wuseh lyis yoeus las Yuda gungsthaiq wuseh yah tsoq das. Ngos hau aiq koeuq lyis dvkoeuq kuot las ngah loq mas zwi das, ge oen taiq kyoh aq.
20 Hau wuseh aiq koeuq nah loq mas chi toh aq, hauh zis dius jens lyis nyvng nhang aq.
21 Hauh thang lhyi nvng nyamoq lyis taiq kyoh aq, ngos Yomzains Yhensain ka ngah dius jens dvnganh lyis nyamoq loh goeus dah dius nyau jens masyah dvgeh tsainh las nyamoq nyang dah mau mas shwih tauh los das.
22 Hauh mau mas dah Israel boms thoq mas ngos nyamoq lyis dius dvnyau kyingh xonh las nyamoq thoq mas guon das zis hwankti dvyuk bos das. Nyamoq gas dius aiq nyau ma gang das, munghdan eq aiq koeuq ma gvm das.
23 Vchoqh vlhauq phvra yah nyamoq gungs lyis vwot v-oeu ma kuot lo das, yaunos yah nyamoq gungs lyis ma dyoqbis nhang lo das. Nyamoq yaunos kuot cho yahge ngos lyis kyauh tyamp cho dvnganh masyah luiq los nhang das. Ngos nyamoq lyis cheihshang das. Nyamoq ngah dius duot das. Ngos eq nyamoq Mangso duot das.
24 Ngah jyeidwis Dawi teh dah hwankti ka nyamoq hwankti duot das. Nyamoq gas guon soeu dvyuk dah o mha dvgeh xonh las ngah lyi lyis lomluk luk domsyos gyo das.Ref 37.24: Ezk 34.24
25 Nyamoq gas ngos ngah jyeidwis Yakop lyis dyei toh las nyamoq phauh thyeih moq nyeis khoq mau mas nyeis das. Nyamoq houmha vcaiq caiq nyeis das. Nyamoq lo jens yahge nyamoq vnyau vshih nyeis das. Ngah jyeidwis Dawi teh dah hwankti ka nyamoq lyis vcaiq vto guon das.
26 Nyamoq dah vcaiq vto sam cho xiklyis pauh toh das zis ngos nyamoq yah thanghchvp chap toh das. Ngos nyamoq lyis houmha khyei khyoq nhang lha dius jebais los nhang das. Housoeh nyamoq mau mas ngah Yhenmuh vcaiq vto toh das.
27 Ngos houmha nyamoq yah nyeis das. Ngos nyamoq dah Mangso duot las, nyamoq gas ngah dius jens duot das.Ref 37.27: 2Kr 6.16; Nyoq 21.3
28 Ngos houmha ngah Yhenmuh nyamoq mas vcaiq vto toh lyis, ngos Yhensain ka Israel jens lyis ngvnyang dius jens duot das xiklyis khyen yoeus toh cho dius nyau jens seq das.