22
Yerusalem dah Yaunos
1 Yhensain ngos lyis jis.
2 Nyang taiq, Lvcang eh, nvng dius sat bang yah dyingh dah wus lyis soetuon das zis cicont vnghuot shih lah? Nyang kuot goeus dah vchoqh vlhauq muh dvnganh lyis shang tyamp aq.
3 Ngos Yomzains Yhensain taiq nyeis zis hauh wus lyis taiq kyoh aq. Nvng nvnyang dius jens nyoshoq lyis sat las phvra lyis paiq zis yah nvnyang gungs lyis vwot v-oeu kuot, yvmvyah nah shishenh jweh los.
4 Nvng gas hau dius sat yaunos dap. Nvng kuot dah phvra yah vwot v-oeu xauh nyeis. Housoeh las nah buisnyeis jweh los. Nah shishenh thank goeus. Housoeh las ngos gohnyau bang lyis yah nvng lyis yisnaus toeuq nhang, mau dvnganh nvng lyis jwangh nhang.
5 Nah dah lyi ma chi cho gvng mas nah vyvm v wi mau mas bang, we dah mau mas bang nvng lyis jwangh.
6 Israel uhshe bang dvnganh gas nyamoq dah yom lyis loms las dius tsain sat.
7 Wus mas bang hank eq nyhiphoq lyis ma phauh kuot. Lvbaus lyis mhuih, chauhmuh chauhlo jens lyis mopzo.Ref 22.7: Dyu 20.12, 22.21-22; Lyi 5.16, 24.17
8 Nvng gyingshang joqyos lyis ma phauh, No Buisnyeis lyis ma chank.Ref 22.8: Lew 19.30, 26.2
9 Namoq dah dius dvyhamh gohyuk sat zis xauh das xiklyis hwah taiq. Dvyhamh gas phvra lyis kyangh dah shoh zo; dvyhamh gas nyamoq vjangh nyetnau cho tyink.
10 Dvyhamh gas nyamoq uwus dah yhensain nyhiq yah yhetgoh. Dvyhamh gas mesmus vmesbih yah tsoengh yhetgoh.Ref 22.10-11: Lew 18.7-20
11 Dvyhamh gas nyi shuot, dvyhamh gas nyamoq doeusmuh yah shuot goh, gohyhamh gas nyamoq nhamhmuh doeus bang yah shuot goh.
12 Nah dius jens dvyhamh phauh zo las dius sat. Gohtoeu Israel jens lyis ngwis jyeih las vmyat yoeus zis yah nyamoq lyis mopzo las dis los. Nyamoq ngos lyis tohnyhik goeus, ge Yomzains Yhensain taiq goeus.Ref 22.12: Dyu 22.25, 23.8; Lew 25.36-37; Lyi 16.19, 23.19
13 Nah thyoq zos cho yahge sat cho thoq mas ngah loqtsop khyoq kat das.
14 Nvng nghamh lyis ngos nvng yah dye thang lhyi nvng womh cho bos las nah loq yoh toeu das yom bos shih das lah? Ngos Yhensain taiq goeus las ngah dang doeng nhang das.
15 Ngos nah dius jens lyis mau khanghmuh yahge dius nyau khanghmuh mas sanh tyamp las nah ma gis wotwu lyis thyuk tyamp das.
16 Housoeh las gohnyau bang nvng lyis nyoqnho ngelang khyoq das. Nghuot laus eq nvng gas ngos Yhensain nghuot yvlyis seq das.
Yhensain dah Nyikhyomp
17 Yhensain ngos lyis taiq.
18 Lvcang eh, Israel jens gas ngah xiklyis yhung pvjus lo. Nyamoq gas nyikhyomp mas nyet joq dah thunk, thunk thyoeu, thyeq, cui teh nghuot. Houka ngwis ngheq shauq lyis nyet joq dah ngwis nyop nghuot.
19 Housoeh las gvshih ngos Yomzains Yhensain nyamoq lyis, nyamoq gas housoeh teh yhung pvjus bang nghuot oen taiq kyoh nyeis. Ngos namoq dvnganh lyis Yerusalem mas dvgeh shwih tsainh los das.
20 Ngwis, thunk, thyeq, cui yahge thunk thyoeu lhyi shauq kyink das xiklyis nyikhyomp mas kat zis yah dvyhangteh nghuot. Hauh vyhang lhyi nyi mas ngheq shauq teh, Ngos nhaiqyo zis yahge nhaiqlom dyis zis yah nyamoq lyis ngheq shauq das.
21 Nghuot goeus, ngos nyamoq lyis Yerusalem mas tsainh yoeus las, nyamoq lyis ngah nhaiqyo nyi kat las shauq tyamp das.
22 Nyamoq lyis Yerusalem mas, ngwis lyis nyikhyomp mas kat shauq teh, ngheq shauq tyamp zis xauh das. Housoeh lyis nyamoq Yhensain dah nhaiqyo zis xauh kham yvlyis seq das, ge.
Israel Uhshe bang Yaunos
23 Yhensain ngos lyis doms jis.
24 Nyang taiq, Lvcang eh, Israel jens lyis taiq aq, nyamoq mau gas ma lhoq ma shang, housoeh las ngos hauh yvlyis nhaiqyo zis yah joeng nyeis.
25 Hau uhshe bangnoteUhshe bang ge zis Hebre mas, ma gis khyvlyis chomp kuot dah lvpe jens, ge. gas, nyamoq sat das shoh thoq mas nyings dah khangkhyi jens teh nghuot. Nyamoq gas dius jens lyis sat las ngwis dvnganh, vyhang eq nyamoq yoh yoeus nyhoq yoeus. Nyamoq gas dius sat zis yah chauhmuh nyoshoq nyet joq.
26 Phudyei bang gas ngah lyi lyis thyoq, gyingshang cho lhyi ma phauh ma nyang kuot. Nyamoq kha ka gyingshang, kha ka gyingshang zis ma nghuot yvlyis ma kangh. Nyamoq gas lhoqshang vyhang yahge ma lhoq zis shaih cho lhyi ma jyauh, nyamoq no nyeih lyis tyamp toh. Hauh vthang ka Israel dius jens ngos lyis ma phauh nyang.Ref 22.26: Lew 10.10
27 Vtsuya zau jens eq, cauhpau jens gas nyamoq sat goeus dah gaunyhauq jens lyis ngat chingh teh nghuot. Nyamoq dis los das xiklyis dius sat.
28 Lvpe jens gas haih yaunos lyis, muh zwi bang tyoyvm lyis vthyoeu cauh nghop teh nghop shung toh. Nyamoq gas ma ying nyoqnyvng nyvng las ma ying dah pho cho kuot. Nyamoq gas Yomzains Yhensain dah dang nghuot ge taiq hoeuh laus eq, Ngos Yhensain nyamoq lyis ma jis.
29 Yoh khuiq bang gas mhuih, lhuotzo. Nyamoq gas shohjyen bang lyis gyvzaiq gyvnang kuot, labaus lyis mopzo.
30 Ngos ciank yoh ci soeu, ciank gwi loh joqyos mas yoh yap las hauh mau lyis ngos nhaiqyo zis yah hauh yvlyis mhont bah oen lhyi yoh khomp toh soeu dvyuk yuk lyis xo, nghuot laus eq ngos hank lyis eq ma yoh xo nyvng.
31 Housoeh yvmvyah ngos ngah nhaiqyo nyi nyamoq thoq mas huot khyoq das, las nyamoq kuot goeus nyhenshang nyi teh ngos nyamoq lyis thyoqpi das, ge Yomzains Yhensain taiq goeus.