19
Nhaiqkuk Lvkhyank
1 Yhensain ngos lyis Israel zaulo aiq yuk xiklyis hai nhaiqkuk lvkhyank kat aq, ge.
2 Nah ungwes gas khangkhyi zains nghuot khoq!
Nyang gas gyukphoh khangkhyi lus jens mas nyah khangkhyi lo jens lyis nyhoeu tsoh kat.
3 Nyang lo dvdoeu nyhoeu lha shoh khat das zis jyauh.
Hauh lo gas dius lyis zo das zis xuq.
4 Dius nyau jens nyah cho xauhgyo las
dwang doeu zis yah nyang lyis nyhik.
Nyamoq gas nyang lyis nghweh yah Egutu pheh she e.
5 Ungwes gas nghamhloms chank ma bos zis seq shoq langh.
Hauh thang lhyi nyang lo jens mas
gohtoeu dvdoeu lyis doms nyhoeu las nyang gyukphoh khangkhyi kuh los.
6 Nyang kuh los lyis
gohtoeu khangkhyi jens yah zomh.
Nyang shoh khat das zis,
dius zo das zis eq xuq.
7 Nyang thoenkgus jesdvp lyis thyoq, wus jens lyis tsain thyoq khyoq.
Hauh mau mas bang gas nyang nyings los
khanghmuh tsain gyuk dvn.note 19:7 Hebre mas bvng bvng ma nghuot.
8 Dius nyau jens gas,
nyang lyis zan das zis joqyos khyiq khanghmuh mas bang zain los.
Nyamoq gas nyamoq dah shoh twih tsain khyoq las
nyang lyis nyhik yoeus.
9 Nyang lyis nghweh yah zungs mas kat las
Babilon hwankti jyank mas yoeus loh.
Thang pheh Israel boms mas
nyang nyings thwe khanhamp eq
ma doms xauhgyo lo shoq tsain zungh las lhunk toh.
10 Nah ungwes gas jeislo lvng yvm mas
tsungh dah zvbiq nwis teh nghuot.
Houmha jeis nyoshoq yoh yvmvyah
zvbiq nwis gas vhuq yahge vshih yah dyingh joq.
11 Nyah vko jens gas yangh las
zau lhamloq kuot phoh kuh los.
Hau zvbiq nwis gas jyommauh lyis duons bah ge shoq nyhang.
Hauh zis kha iq nyhang lha vhuq yungh joq yvlyis yuk khanghmuh nyvng.
12 Nghuot laus eq, nhaiqyo dah loq gas
hauh yvlyis vnyet masyah khuot las nyeisjvng mas doeuh tyamp toh.
Nyah vshih lyis buisthuq lyeis yah muot kyuk tyamp.
Nyah vko jens lyis eq khyauh zis xauh las
kyuk zis yah ngheq zis xauh goeus.
13 Gvshih heika jeis ma joq mau,
kyuk dah sihyos mas tsungh toh zis nghuot.
14 Zvbiq zains vpom mha nyi ngeh las
nyah vko yahge shih ngeh tyamp.
Nyah vko jens khanhamp eq ma doms yangh los lo.
Zau lhamloq khanhamp eq ma bweh lo das.
Heika kuk dah lvkhyank nghuot. Hauh yvlyis puk las puk las yhang.