17
Zonsmuh Zvbiq Nwis
1 Yhensain ngos lyis taiq.
2 Lvcang eh, Israel jens lyis dangtoeuq yah taiq aq.
3 Ngos Yomzains Yhensain nyamoq lyis cha taiq zis seq nhang aq. Mauh yungh las dungs kuh dah zonsmuh dvdoeu dungs tyo toh. Nyang Lebanon boms pheh dang loh las arit saiqthyoh lyis khyauh.
4 Nyang hauh yvlyis soenghi mau mas dvng los las ungh bang wis bang dah wus mas toh.
5 Nyang Israel mau mas dah gyvlung zains teh dah saiqlo dvzains yoeus las hau nyeis coeu bos dah yvmas tsungh toh. Hauh yvmas hauh zis kuh los das xiklyis vjangh yah jeis yoh.
6 Hauh vzains gas vnyuk nyonh las nyhen nyhen nwis dah zvbiq nwis bweh los. Hauh vko ka nyhang mha zonsmuh nyeis yvpheh nwis loh, vnyet eq nauh nauh chent loh. Hauh zvbiq zains lyis vko yahge vhuq yah tsain nghop toh.
7 Dungs kuh las mauh thoeu dah gohtoeu zonsmuh dvdoeu nyeis. Gvshih hau zvbiq nwis gas nyah vnyet yahge nyah vhuq lyis hau zonsmuh jyank pheh chent kat. Houka vkhang yuk joq dah khyam mha thoq lyis jeis zes yoh dyei das zis nghamhloms las nghuot.
8 Nghuot laus eq hau zvbiq nwis gas, jeis vlhomuh yoh las nyeiscoeu bos yvmas tsungh toh goeus. Housoeh las hauh zis gas vhuq gis zis yah vshih shih las khoek khoek yungh joq.
9 Housoeh las ngos Yomzains Yhensain nyei: Hauh zvbiq nwis gas yoh yuk kuh los das lah? Xik lyis dah zonsmuh yah vnyet masyah khot, zvbiq shih shang lha vko lhyi khyauh zis yah nyhauh loh nhang das ma nghuot lhyeh? Hauh vzains lyis nuot tyamp das zis yom nyoshoq ma kat noh, yomzains dius nyau eq ma chah das.
10 Nghuot goeus, hauh zis tsungh toh goeus, nghuot laus eq yuk kuh los das lhyeh? Buisthuq lyeis yah bat lyis ma nyhauh loh das lhyeh? Hau yuk yvmas ma nyhauh loh das lhyeh, ge.
Dangtoeuq Vjyuk phui
11 Yhensain ngos lyis taiq,
12 Haih dangtoeuq vjyuk vseqgyo goh lah, oen gomloeus seq toq bang lyis nyei aq. Babilon hwankti ka Yerusalem mas los las hwankti yahge zauguon bang lyis Babilon pheh shwih loh, oen nyamoq lyis taiq aq.Ref 17.12-15: 2Hw 24.15-20; 2Ss 36.10-13
13 Nyang hwankti yhenbang mas zis dvyuk shwih las nyang yah buisnoms kuot las nyang lyis wontang das cho maukhi nhang. Nyang yhaugyen dah dius jens lyis kham toh khyvlyis shwih loh.
14 Houka hau dius nyau gas ma doms toeu-nghank das zis yahge, nyang yah kuot toh dah buisnoms toh cho goeng joq das xiklyis nghuot.
15 Nghuot laus eq Yuda hwankti ka gomloeus toq zis yah Egutu mas dah nyang jens yahge jesphung zainsmuh yoh das xiklyis Egutu mas lvgyo nhang. Nyang ung das lah? Nyang yoh luiq lhyeh? Nyang buisnoms cho thyoq las, joeng cho ma yoh luiq.
16 Yomzains Yhensain taiq, Ngos jyoengh dwis nyeis zis yah dvyhangteh, haih hwankti Babilon mas shei das. Khasoeh ge lyis nyang lyis hwankti kuot nhang soeu Babilon hwankti yah toh dah buisnoms kuot cho maukhi toh yvlyis thyoq goeus.
17 Babilon bang gas, dius nyoshoq lyis sat das xiklyis gvduk doeu, khyohlang los doeu thoenkgus jesdvp los khyoq lyis, Egutu hwankti dah yomsoq bos jesphung yangh nyang lyis ma yoh pangh zan.
18 Nyang gas nyang maukhi lha kuot toh dah buisnoms kuot cho lhyi thyoq. Nyang hauh zis tsain kuot goeus las gvshih nyang phang ma luiq das.
19 Yomzains Yhensain taiq, Ngos jyoengh dwis nyeis Mangso nghuot zis yah dvyhangteh, hau buisnoms kuot cho chank das ge ngah nyings mas maukhi zis thyoq yvmvyah ngos nyang lyis joeng das.
20 Ngos shoh khat soeu dah lhyik thung lha nyang lyis nyih nhang das. Ngos nyang lyis Babilon mas shwih loh las houmha nyang lyis joeng das. Khasoeh ge lyis nyang ngos lyis lom maluk.
21 Nyah lyes thank jeslo jens jes mas shei das, doeng nyeis bang gas dvkhauyah dyos loh das. Hauh uhlyis ngos Yhensain hauh cho taiq goeus yvlyis namoq seq das, ge.
Nghamhloms Dangthoengh
22 Heika Yomzains Yhensain taiq zis nghuot.
Ngos arit saiq nyhang zainsthyoh yoeus das,
vnyuk noeuh lyis khyauh das;
ngos hauh yvlyis boms nyhang mha tsungh toh das.
23 Ngos hauh yvlyis Israel boms nyhang thoq mas tsungh toh das.
Houka vkoq koq, vshih shih das las khoek dah arit zains bweh das:
Houmha nghoq vja ja nyeis las
hauh buisshen mha khaugus xo nyvng das.
24 Hauh mau dah saiqzains dvnganh gas
Ngos Yhensain nghuot yvlyis seq das.
Saiq nyhang zains lyis zan khyoq las
saiqlo zains lyis kuh nyhang nhang das.
Saiq nyaus zains lyis nyhauh nhang lha,
saiq kyuk zains lyis nyaus nhang.
Ngos Yhensain taiq goeus. Ngos kuot das, oen taiq goeus zis lyis kuot das.