7
Kang dwis cho Suon yoeuh
1 Nyings gis hoeuh zis gas phauh changh xangh coeu thoq lyis zes gis. Shei nyeih gas khoeu los nyeih thoq lyis zes gis.Ref 7.1: Sod 22.1
2 Kukxi yhen mha loh zis gas pwe kuot yvmas loh thoq lyis zes gis. Khasoeh ge lyis shei cho ka yang dvnganh lyis langh nyeis cho, dwis nyeis bang vjangh soh chah.
3 Nhaiqkuk zis gas yis thoq lyis zes gis: khasoeh ge lyis nyoqnho nhaiqngis laus eq nvng seqgyo cho yangh los.
4 Dvyuk yuk vjangh pyo cho lhyi nghamh nyeis soeu ka koh soeu nghuot. Joeui bos soeu ka shei cho lhyi nghamh yoeuh.
5 Nvng lyis joeui bos bang nyho zis xauh kham zis gas bang dah dius jens nvng lyis lvkhyank kat las chungh zis xauh kham thoq lyis zes gis.
6 Koh soeu yis lyis houka zoeuzains nyi ngeh buk teh nghuot. Houka chah vjyuk ma bos.
7 Nvng joeui bos mvbeh, nghuot laus eq nvng dvyuk yuk lyis muih lyis gas, nvng koh soeu teh kuot. Nvng khauwhot yoeus lyis gas, nah wotwu lhoq thyoq.
8 Dvja ja dah vthang ka hauh zis kuot xi thoq lyis zes gis. Jhen zis gas khwank thoq lyis zes gis.
9 Nah ehnyet lyis joeu toh aq; nhaiq vyo, hauh zis gas koh cho nghuot.Ref 7.9: Yak 1.19
10 Gohlhain dah buisnyeis gas chamus hou iq zes gis au, oen khanhamp eq vnyei. Heika yik dah nyeidang ma nghuot.
11 Dwis nyeis bang yuk khanghmuh gas joeui bos chah. Houka yhenzis vso xauh kham yoeus teh gis.
12 Ngwis yah gau cho yoh dyei nyhoq joeui eq gau cho yoh dyei das. Joeui ka nvng lyis jesluiq nhang. Houka seq cho dah vkyuh nghuot.
13 Mangso cha kuot goeus yvlyis nghamh yoeuh aq. Mangso kuot toh dah vguih lyis dvyuk yuk khasoeh yoh lhoeu dan?
14 Nah xiklyis shonsi nyeisgis nyeis lyis gaus aq, yau cho jweh los lyis suon yoeuh nyeis aq. Mangso ka pyo cho yahge yau cho aiq ja yah nhang kat. Thang pheh cha bweh los das zis nvng khanhamp eq ma seq.
15 Ngos kang dwis zis vkom nghuot laus eq houmha vyhang dvnganh lyis nyvng goeus. Dius gis gas shei loh las gohtoeu ma gis soeu ka kang xing nyeis zis lyis nyvng.
16 Housoeh las nyo gis, joeui nyo bos vkuot, chamus nvnyang gungs lyis sat mes lah?
17 Nghuot laus eq vnyo lhung, vnyo koh, nvng ma shei chah shih lyis chamus shei mes?
18 Haih dvmsunk zis aiq ja yah jhank aq. Nvng Mangso lhyi gyukwoms lyis cha nghuot nghuot yoh jhank das.
19 Joeui ka joeui bos soeu dvyuk lyis wus dvwus mas guon bang dvci yuk thoq lyis yomsoq zes bos nhang.
20 Nyeisjvng thoq mas, vjangh jus zis kuot las, yaunos khanhamp eq ma kuot soeu dvyuk eq ma bos.
21 Dius jens taiq ya taiq zis vgyo. Nah jyeidwis nvng lyis laihwangh zis xauhgyo mvbeh.
22 Nvng nvnyang gohyuk lyis nyoshoq lhain laihwangh goeus zis seq.
23 Ngos ngah joeui yhung lha haih dvnganh lyis shi yoeuh. Ngos gas joeui bos chah, oen nghamh thyet. Nghuot laus eq houka ngos yah we joq.
24 Kang dwis cho ka chah vjyuk nghuot yvlyis dvyuk yuk khasoeh yoh xo thuq kat? Houka yah xiklyis nyo noq las ma yoh thoq seqgyo.
25 Ngos gas joeui lhyi xo nyvng das xiklyis yomkat las xuq. Ngos ja khanghmuh dah vjyuk lyis tungh xo. Ma gis zis kuot das zis gas koh cho nghuot yvlyis seq los. Koh soeu teh kuot das zis gas huonh cho nghuot.
26 Ngos gas shei cho thoq lyis zes khoh zis dvja xo nyvng. Houka lhyik teh dah vmesbih nghuot. Nyang nvng lyis dyei dah jyet cho ka nvng lyis nyho teh thung yoeus das; nyah loqyom gas nah yvmlhaink shamjvng teh po toh das. Mangso lhyi nhaiqdoeus nhang dah vbusbih gas yoh phang loh, nghuot laus eq hau vmesbih gas yaunos wons soeu lhyi nyhik loh das.
27 Nghuot goeus, joeui nghamh soeu taiq, Ngos phuk dang xo uhlyis haih zis dvmhauh dvmhauh xo nyvng.
28 Ngos gohtoeu phuk dang xo goeus laus eq ma nyvng. Vbusbih dvkhyoengh mas ngos yoh phauh nyang soeu dvyuk nyvng. Vmesbih mas gas dvyuk eq ma nyvng.
29 Heika ngos xuq zis dvnganh nghuot goeus. Mangso ka yang lyis diuslaiq shang shang gvnkhanh toh laus eq, yang yvnyang ma gis cho lhaink goeus.